واتەواچەو دەم پارتی ئایشەگوڵ دۆغانە جە جورنەڕەشەن قسێش کەردێ کە قەرارو واوەی کەردەیۆ هۆرچنیەی دریانوو واتش: " ٢ێ حوزەیرانینە دیسان سەرێ گنمێ، جورنەڕەش دەمە، دەم جورنەڕەشە".
پارتوو یەکسانی و دیموکراسی گەلا (دەم پارتی) خەباتو هۆرچنیەیش جە جورنەڕەشەنە دەس پەنە کەرد. کە قەراربێ هۆرچنیەکەی جە ٢ ێ حوزەیرانی دووبارە کریۆوە، پەی ئی مەبەسیە نووسینگەو هۆرچنیەیش کەردۆ.
وەردەموو نووسینگەو هۆرچنیەینە، هامشان چنی هاموڵاتیا جورنەڕەشی، واتەواچەو بەشێوە جە پەرلەمانتاراو کاندیدا هامسەرۆکا شارەوانی جورنەڕەشو دەم پارتی کۆبیێوەو.
واتەواچەو دەم پارتی ئایشەگوڵ دۆغانە ئەرەیاوناش جورنەڕەش ٣١ و ئاداری قەرارو وێش دا ، واتش: "هەرمانەو ئاریشا هەر فێڵێ و ساختەکارینێ. بەڵام هەرمانێ ئێمە ئاوەڵان کەردەیۆن. جورنەڕەش دیسانۆ قەرارو وێش دا. ئێمە جە ٢ ی حوزەیرانی دیسانۆ سەرێگنمێ. جورنەڕەش دەمە، دەم جورنەڕەشە، پەی ئی مەبەسیە شەو و ڕۆ خەبات کەرمێ".
چێش قۆمیا؟
جە هۆرچنیەو ٣١ وئادارینە کاندیدا هامسەرۆکو شارەوانی جورنەڕەش و دەم پارتی سەرحان پایداش و غەریب یەشیل بە ٥٢١ دەنگێ سەرێ کەوتێ. بەڵام وێرەگاو هۆرچنیەی جەلایەنو برازێوە کاندیدو ئاکەپەی عەلی ئاسڵان بایک، موستەفا بایک و ٥٠ کەسێ تەریۆ، دووێ سنووقێ دەنگدای سۆچنریێ. دماتەر ئاکەپەیەکێ تانەشا دا و کۆمیسیۆنو باڵاو هۆرچنیەی قەرارو دووبارەکەردەیۆ هۆرچنیەکەیش دا. هۆرچنیەکەی جە ٢ ێ حوزەیرانی دووبارە کریۆوە.
