ئاڤاشین مستۆیە ئاماژەش پانەی دا کە سی پی تی چوارچێوەو ئەرک و ۋەرپرسیارییەتیەکا ۋێشەنە مەجمۊوە و تەنیا مەسڵەحەتوو ۋێش پەیش گرنگا و هەرمانە پەی کەسانۍ دیاریکریای مکەرۆ. حەرپاسە مستۆیە باسش چانەی کەرد بە هێزو گەنجا ئازاڎیی جەستەیی ڕابەر ئاپۆی مسۆگەر مکەرمۍ.
گۆشەگیری سەروو ڕابەروو گەلو کوردی عەبدوڵا ئۆجالانی هەتا مۍ زیاتەر و سەختتەر مکریۆ، پۊکاتی سەروو ئاستی نەتەوەی و میان نەتەوەیی هەڵوێسەکۍ پەی ماڕای گۆشەگیری ئیمراڵی ۋەرفراوانتەرۍ با. پەیوەس پی مژاریە هامسەرۆکەو گەنجا و وەرزشی کانتۆنوو فراتی ئاڤاشین مستۆیە پەی ئاژانسوو هەواڵوو فوراتی (ANF)ی قسێش کەردۍ.
ئاڤاشینە باسش جە زیاتەربیەی گۆشەگیری سەختوو سەروو ڕابەروو گەلوو کوردی کەرد و واتش: "گوایە سی پی تی پەی پارێزنای مافوو مرۆڤی ئەرەمەرزیان. بەڵام ئاستوو گۆشەگیرکەردەی ڕابەر ئاپۆینە ئی ئەرەمەرزیا کەڕ و لاڵا. پەی چی هەتا مۍ گۆشەگیری سەروو ڕابەر ئاپۆی گرانتەر مکریۆ و گرڎ کەسێوە بێدەنگا؟ حەرپاسە بە مەڵامەتوو بەتەمەنبیەی ڕابەر ئاپۆیچ بۆ، پێویسا چەمپنەکەوتەی ئەنجام بڎریۆ، ئینە جە گرڎ یاسێوەنە بیەیش هەن. بەڵام چی مژارەنە گرڎ کەس و لایەنێوە هامشێوەو سی پی تی بێدەنگیش هۊرچنیەن، وەختۍ مژار بۆ بە ڕابەر ئاپۆ گرڎوو یاساکا پاشێلۍ مکریا."
ئاڤاشینە ئاماژەش پەنەی دا کە سی پی تی تەنیا پەی کەسانۍ دیاریکریای هەرمانە مکەرۆ و واتش: "گوایە سی پی تی پەی گرڎ کەسێ هەرمانە مکەرۆ و مافش پارێزنۆ، بەڵام پېسە ئانەی موینمێش تەنیا پەی کەسانێوە هەرمانە مکەرۆ. هەر وێش سی پی تی تەنیا پەی مەسڵەحەتەکا ۋێش هەرمانە مکەرۆ. پېسە گەنجا دەوروو ڕابەریمارە گلېرۍ بیێنمێوە و مەتاوا جە فکروو ڕابەریما بڕامارە. ماوەو زیاتەر جە ٢٥ ساڵان ڕابەر ئینا گۆشەگیریینە، پۊکاتی بە ملوێنان کەسۍ ئینۍ چەمەڕایی ئازاڎیی جەستەیی ڕابەر ئاپۆینە. پۊکای پەی ئازاڎیی جەستەیی ڕابەر ئاپۆی هەتا دما نەفەس ئەرەکۊشای بەرمۍ ڕاوە."
ئاڤاشین مستۆیە جە دمادمایی قسەکاشەنە واتش: "پێویسا گرڎوو گەنجا پەی ئازاڎیی جەستەیی ڕابەر ئاپۆی ئەرەپڕا و هەڵمەتەو "ئازاڎیی پەی عەبدوڵا ئۆجالانی، چارەسەری سیاسی پەی پرسوو کوردی" بەقوەتتەر و ۋەرفراوانتەر بکریۆ."
