هیزی دەگاو بۊسکێنوو سەر بە شارۊچکەو ڕانیەینە پانیشتوو کوردستانینە، دەوڵەتوو تورکی هجوومێوەش کەرد، کە چند هاموەڵاتێوەش چەنە  بریندارۍ بیۍ و زەرەری ماددی بە چند یانە و دوکانێوە یاوا، تەڤگەروو ئازاڎیی گلێرگەو کوردستانی ئەرەیاوناێوەش بارەشۊ وەڵا کەرڎۊ.  

جە ئەرەیاوناکەینە ئامان: " جارێوە تەر دەوڵەتی فاشستوو تورکیای، ڕووەی سیاوە و تیرۊریستییەو وێش نیشانە دا و وەڵێنیمەڕۊو  ڕۊو دووشەممەی هجوومێوە تیرۊریستییش بەدرۊن کەرد سەروو خەڵکی نیشتمانپەروەری و بێچەکی، دەگاو بۊسکێنوو سەر بە قەزاو ڕانیەینە دەڤەروو ڕاپەڕینینە، کە بەداخۊ بی بایسوو برینداربییەی دووۍ کوردا".

ئینجا ماچۊ: "ئا هجوومە تیرۊریستییۍ  تورکیای، دەسوو ئا سیخوڕا و خائیناشە ئینا پەشتیوە، کە فرەشا نەمەنەن گنا وەروو سزاو دادگاو گەلی و تا هەتان شەرمەزارۍ با".

ئەرەیاونایەکە ئەوەخوایش کەرۊوە، ڕانیە و مەنتێقەو ڕاپەڕینی تەلیسموو فاشیزموو بەعسیشا ماڕا، ماچۊ: "گومانش نییا چەنە چێگەوە دەسی سیاوو خائینا مەڕییۊ، ھاموەڵاتاو ڕاپەرینی ھۊشیاری و وەڵاتپارێزنییشا ئینا ئاستێوەنە حەرگیز پا هەرمانە تیرۊریستییاو تورکیای فاشستی و سیخوڕە تەرسنۊکەکاش دەسبەردارۍ ھەڵوێستە نەتەوەیی و وەڵاتپارێزنییەکاشا مەبا".

ئاخریچۊ تەڤگەروو ئازاڎی هومێدوو خاسبییەیوەش پەی بریندارەکا واستەن.