هامسەرۆکە گردیناو دەم پارتی تولای حاتەم ئۆغۆللاری و تونجەر باقرخان سەرێ شارەوانیی مێردینیشا دا، لاو هامسەرۆکاو شارەوانیی مێردینیوە، دەڤریم دەمیر و ئەحمەد تورک و پەرلەمانتارێ ساڵیحە ئایدەنیز و کاموران تانهان و هامسەرۆکاو شارەوانیی مەنتێقەکاوە خێرامایشا وەنە کریا.

ئەحمەد تورک تیشکەش وستە سەرو وێرانکارییەکاو قەیومی و واتشا ئینێ جە ڕەوشێوی خراپنە ئانە تا ئیساتێ ڕۆشن بیەنوە، ٥ ملیارێ و ٤٠٠ ملوێنێ قەرز کەوتەن سەرو شارەوانییەکەی، واتش: "ڕاسا قۆناغێوی دژوارا، بەڵام بڕوام پاسنێنە سەرمگنمێ".

دەڤریم دەمیر خێرامای هامسەرۆکاش کەرد و واتش بڕواما پاسنێنە گردو کێشەکا مویەرنمێ و مۆدێلێوی شیا بە گەلەکەیما مارمێ دی.

هامسەرۆکەی گردینەو دەم پارتی، تولای حاتەم ئۆغۆللارییە تیشکەش وستە سەرو سەرکەوتەی گەورەو مێردینی و واتش مێردین شارێوی تایبەتا، واتش: "ڕاسیی گردو شارەوانییەکاما ئینا هەمان چێوەنە، قەیومەکێ لوێ، گرد لاێوەشا پەڕ کەرد قەرز. شارەوانییەکێشا تاڵانێ کەردێنێ. فرەو شارەوانییەکا هەمان ڕەوششا هەن".

هامسەرۆکی گردینو دەم پارتی، تونجەر باقرخان واتش ئێمە هاگادارێ کێشەکاو شارەوانیی مێردینینمێ، قەیوم شارەوانییەکەش وستێنێ چێروو قەرزیوە، واتش ئی قۆناغەیە ویەرنمێ و خزمەتی زیاتەرو گەلی مکەرمێ. هومێدو سەرکەوتەیش پەی هامسەرۆکاو شارەوانیی واست.