بە سەرمەشقایەتیی تەڤگەروو ژەنە ئازاڎا (تەژەئا)، بە بەشداریی چندین لایەن و پارت و ئەرەمەرزیایا، دەربارەو "ڕاپیمانی ئازاڎی"ی، کە ١٨و تشرینوو دووەمینە گەملیکنە کریۊ،ئەرەیاونیاێوە ونیاوە.  

ئەرەیاونایەکە بە کوردی ئەندامەو تەژەئا، سافیە ئاکداغ و بە تورکی هامسەرۊکەو فیدارسیۊنی پەشتیوانی و یاسایی بنەیانەو زیندانییا و حکومدریایاو مەد (MED TUHAD-FED)، ئەمینە کایێوە ونیاوە.

ئاکداغە واتش کە  ئەرەمەرزیایاو دەوڵەت-نەتەوەی، ئەوەڵۊ نکۊڵیکەرڎەی بییەن جە گەلی و باوڕی و ڕەنجدەرا، بەتایبەت سیاسەتوو نکۊڵیکەرڎەی دژوو کورڎا لوان ڕاوە. هەڵای ئی سیاسەتە جە سەدەو دووەموو کۊمارینە بەرڎەواما. دەسەڵاتوو ئاکەپەی و مەهەپەی، سەروو نەیارێتیی کورڎا و ژەناوە مەرزیانرە.  

ئینجا ئەوەخوایش کەرڎۊ، کە فشارێوە فرە سەروو زوانی کوردیوە هەن. ئی سیستمە بە زیهنیەتوو دەوڵەتپارێزنی پیاسالاری گەرەکشا تندوتیژی سەروو ژەنا ئاسایی کەرۊوە. سرووشتی تاڵان کەرۊ و دارستانۍ بڕۊوە و سۊچنۊ و بەحرەکا پیسۍ کەرۊ و کۊچبەرۍ و بێسەروشۊن کەرۊ و هەژاری وەڵا کەرۊوە.

ئاکداغ تیشکەش وستە سەروو گۊشەگیریی ئیمراڵی، ئەوەخوایش کەرڎۊ، گۊشەگیری سەروو ڕابەروو گەلوو کوردی عەبدوڵڵا ئۊجالانی، پاگێرتەیرەین سەروو چارەسەرنەکەرڎەی پەرسەو کوردی. گۊشەگیری تەنیا پەرسەو گەلوو کوردی و ژەناو کوردی نییا، بەڵکوم پەرسەی هامبەشەو گردوو گەلا و ژەنە چەوسیاوان. چونکوم ئینە حەوڵیوەنە دژوو دەسکەوتەکاو گردوو گەلا و ژەنە ئازاڎیوازا.

ئاکداغە داوایچش کەرد، کۊشیای دژوو گۊشەگیری فرەتەر کریۊ، چونکوم کۊشیای دژوو گۊشەگیری، ئەرەگێرتەی قڕکەرڎەی ژەنان، کۊشیاین پەی چەسپنای ئاشتیێوە شکۊداری.

ئاکداغە ئاخرۊ واتش: "ئازاڎیی جەستەیی بەڕێز ئۊجالانی، بابەتی گرنگوو سەرەکیی ئێمەن، پەی چارەسەری دیموکراتیکوو پەرسەو کوردی ئێمە ئازاڎیی بەڕێز ئۊجالانیما گەرەکا. پەوکای پەی ئاشتیێوە هەمیشەیی، ١٨و تشرینوو دووەموو ٢٠٢٣ێنە بەرەو گەملیک ڕا پیممۍ، بیمۍ هەنگامێوە پەی ئازاڎیی، بیمۍ بە ڕاێوە پەی ئازاڎی".