وەعد قەدۊ ئەنداموو پەرلەمانوو عێراقی سەرجەموو بانگەشەکاو پەدەکەی بارەو دۊخی ئەمنیی شەنگالیوە ڕەت کەرۊوە و ماچۊ، قەزاکۍ ئینا دۊخێوە ئەمنیی سەقامگیرەنە، وەلۍ پێویسییش خزمەتگوزاریی زیاتەری هەن پێشکەشش کرییۊ.
وەعد قەدۊ بارەو دماین وەڵێئامایەکا و پەرەسانایەکاو پارێزگاو نەینەوای و بانگەشەو ورچنیەی ئەنجوومەنوو پارێزگاکا و هەوڵەکا پەی دەسملەرەگێرتەی کورسیی کۊتاکا ئەنجوومەنەکەنە قسێش پەی ئاژانسوو ڕۊژ نیوزی کەرڎێنۍ و واتەنش، پارێزگاو نەینەوای دووەم گەورەتەرین پارێزگاو عێراقین جە ڕووەو ژمارەو ئەرەنیشتاوە، هەرپاسە جە ڕووەو ژمارەو كورسییەكاو پەرلەمانی و ئەنجوومەنوو پارێزگاكایچەوە، ئینەیچە پاسەش کەرڎەن بۊ بە كێكێوە ئامادەكریۍ پەی لایەنە گەورەكا پەی بەدەسئارڎەی كورسیی.
ئەرەیاونانیچش، لایەنە سیاسییەكۍ بە شێوازی جۊراوجۊر هەوڵۍ مدا، كورسییەكاو ئەنجوومەنوو پارێزگاو نەینەوای بەدەس بارا، بەتایبەت پەدەكە كە هەوڵێوە فرۍ مدۊ پەی كۊنترۊڵكەرڎەی پشكوو كەمینەكا، دلێشانە پشكوو شەبەكی و مەسیحی و ئێزیدییەكا.
پەرلەمانتارەکەو عێراقی ڕۊشنیچش کەرڎەنۊ، ئیساتۍ هێزێوە سەر بە پەدەكەی بڕێوە جە مەنتێقەکاو مەخمووری و دویزاتوو سەر بە زاپی و بڕۍ جە مەنتێقەکاو شنگالینە هەنۍ، كە ئا مەنتێقۍ پێویسشا بە ئەمنێتیی زیاتەرین، پەوکای پێویسا حكومەتی فیدراڵی هاگاش چەنەشا بۊ، تا جە مامەڵەو ئاسایشوو مەنتێقەکەی دڵنیۍ با.
باسوو ئانەیچش كەرد، ئیدارەی وێمانەو نەینەوای جە ڕوانگەی فەرمییوە لاو پارێزگار نەجم جبورییوە بریۊ ڕاوە، وەلۍ ڕاسیینە ئانە پارێزگاكەی بەرۊ ڕاوە، ڕێبەر ئەحمەدا كە وەزیروو دلۍ حکومەتوو هەرێموو كوردستانین، پەوکای تا ئیساتێچ نەینەوا ئینا دەسوو پەدەكەینە.
پەرلەمانتارەکە ئاخرۊ واتش: كەسانێوە هەنۍ بانگەشە پەی ئانەیە کەرا، كە شنگال نائاراما، پەوکای ئاوارێش پەی مەگێڵاوە، وەلۍ ڕاسیینە پێچەوانەكەش ڕاسا، ئیساتۍ شنگال ئینا بارودۊخێوە ئەمنیی سەقامگیرنە، وەلۍ پێویسش بە خزمەتگوزاریی زیاتەرین پێشكەشش کریۊ.
قەرارا ١٨و کانوونوو یوەمینە ورچنیەی ئەنجوومەنوو پارێزگاکا بلۊ ڕاوە و چند ڕوێچا بانگەشەو ورچنیەی دەسش پەنە کەرڎەن.
