مامۆ کارکەر مشتێوە جە خاکەکەیش کۆ کەردۆ و پێسەو ئانەیە پەی ویەردەو ئینسانی بدیۆ، بەوردی تەماشەو ننەکاو دلێ مشتێش کەرێ. چا وەختانە خوڵەکێ مجیێرە واری باسوو خاکوو میزۆپۆتامیای کەرێ و بە حەسرەتۆ واچێ  "تەماشە کەرە کناچێم، ئی خاکە گردش نیلۆتیکا." مام کارکەر بۆنەو ئانەیوە کرێکاروو ئی ئەم خاکەیە و تەڤگەروو ئازادیی کوردی بێ، شناسنامەو 'کارکەر'ییش نیابێ وێشۆ. وەروو ئانەیە کرێکاری، پارتیزانی و جەنگەوانی  بە عومر نییەن و عومر نمەتاوۆ ڕاگیر بۆ چا هەرمانانە  بەسەرەبەرزییوە واچێ، 'من بەشداروو دلێ کۆشیای یەپەگەی بییەنا '. چا حەوشێنە کە بە دەسوو وێش وەشەش کەردێبێ، ئەوەمەنەی جەنگیش چەنە جەم کەردێبێوە، هامڕا کارکەر بییەێوی سەرنجکێشنش بێ دلێ ئا ئەوەمەناو جەنگینە، چەنی سەرنجەش وستێبێ سەروو ئەوەمەنەکاو جەنگی و بە ئەوەمەنەیەکا وێوڵیوەش نیێبێرە سەروو نووکوو گوولە هاوەنێوە. جە ٦٠ ساڵەو عومریشنە بێ، خەڵکو سینۆپپیەی بێ، ئەلبانی و ئاپۆیی بێ. نەوەو ئەداپیرێوە بێ، کە وەڵێ جەنگوو یوەموو جیهانیینە گەریلایەتییش کەردەن، کوڕوو کرێکارێوی کانوو ماددەکان کە وڕیای کانەکەینە مەردەن.

١٥و ئەیلوولوو ٢٠١٤ینە چا وەختانە چەتەکاو داعشی هجووم کەرا سەروو کۆبانێ، ڕابەرێتی؛ بانگەوازوو سەفەربەرییش وەنەو گەلوو کوردی و گردوو ئینسانی کەرد. مام کارکەریچ دەموو ئا بانگەوازییوە وێش یاونابێ پیرسوس. بە دڵسۆزی بەروستەیوە پەی قسەکێ ڕابەرێتی 'تارێخ چی وەختەنە منویسیۆوە' تارێخش پەی وێش تۆمار کەرد. تا بۆ بە گەشمەردە و بەشێو جە مدرامانی، ئیرادەو وێش وابەسەو ئیرادەو پارتایەتی کەرد و قەراروو بەشداربییەیش دا.

هامڕا کارکەر وێش پێسەو مێمانوو ڕابەرێتی و کرێکاروو تەڤگەری ئازادیی کوردی تەرخان کەرد. پەوکای هەوڵێش دێ وەختەکاو ژیوایش بە هاڵی نەلا.  قەرارش دا کە پەی زیندەئاستەیوە یادگارییەکاو وەختوو جەنگی، مۆزەخانێوی جە ئەوەمەنەیوەکاو جەنگی وەش بکەرۆ. بە کۆکەردەیوە تۆپ، بۆمبی عاسمانی و مین...هتد مۆزەخانەکەش وەش کەردەن.

حەوشێوی کە ئەوەمەنەیوەکاو جەنگیش دلێنە جەمێ کریێنێ، بە شێوێوی هونەری سەرنجکێش چێوەکێش  ئاستوو یۆینە ڕیزێ کەرێبێنێ، وەیوڵێش پاڵوو گوولەهاوەنیوە نیێنەرە، ولی پلاستیکیێش سەروو نووکوو تۆپەکاوە، ولە سروشتییەکێش دلێ قەوانوو گولە تۆپەکانە نیێبێنێ. پەلی نیمەدڕیاو گۆڤارێوە، کە ڕسموو ڕابەرێتییش سەرۆ بێ گۆشێوی تایبەتینە نزیکوو گوڵەکانە ورواستەبێ.... چندین ئەوەمەنێ جەنگییێ تەرێش حەریۆ و  یادەوریێوە ویروو ئینسانی ماراوە.  دلێ گردوو ئینیشانە مامۆ کارکەر جیهانێوی ڕەنگاوڕەنگی هونەرییش خولقنان. مامۆ کارکەر هەڵای چێوێ فرێش مەنێبێنی کەرۆشا بە یادەوەری، بەڵام بەداخۆ گەشمەرە بی.

هیزی ٩ەمین ساڵوەگێڵوو گەشمەردەبییەی هامڕا کارکەر (ڕفات هۆرۆز) بێ. شەوەو ٢٥و حوزەیرانوو ٢٠١٥ ئەنجاموو هجووموو چەتەکاو داعشینە پەی سەروو کۆبانێ زیاتەر جە ٢٥٠ کەسا لاو چەتەکاو داعشیوە گەشمەردێ کریێ. کە هامڕا کارکەریچشا چەنەبێ، بە دڵسۆزیێوی فرەوە مشتێو خۆڵەش گێرتە مشتەش و ئیساتێ چێروو ئاخەکینە کە جەنگەوانی و هەم کرێکارییش پەی کەرد، بە ئاسوودەییوە وتەن.