پەدەکە سەرکردایەتیی سیاسەتوو ئەرەگیرکاری و لکنای خاکوو پانیشتی بە تورکیایوە مبەرۆ ڕاوە. بۆنەو سیاسەتوو پەدەکەیوە کە پەشتی بە دوژمنی مبەسۆ، بەهەزاران سەروازێ، سەدان تانکێ و زرێپۆشێ پانیشتوو کوردستانینە مەرزیێنێرە و بنکێوی سەروازیێ فرێ وەشێ کریێنێ.
حکومەتوو تورکی چوارچوەو لکنای پانیشتوو کوردستانی بە تورکیایوە، سەدان دەگێ مەنتێقەکەی جە هاموەڵاتا چۆڵێ کەردێنێ. وەختێوەنە کە ڕوانە چەک و کەرەسەی سەروازی پەی مەنتێقەو ئامێدی دهۆکی مفاڕیانێوە، سوپاو تورکی پەی پارێزنای وێش و مەنەیوەیش مەنتێقەکەنە هجووم مکەرۆ سەروو ئا مەنتێقە و یاگا کە چنەشنە بنێش وستێنە. چا چوارچوەنە زیاتەر جە ١٠٠ دەگایا چۆڵێ کریێنێ، زیاتەر جە ٦٠٠ دەگایا تەری ئینێ چێروو هەڕەشێ چۆڵکەردەینە. بارزانییەکێ کە پانیشتشا پەی ئەرەگیرکەردەی و وستەیش سەروو تورکیای ئامادە کەردەنۆ، دلێ وێشانە جەنگ پەی پۆست و مەقامی مکەرا.
جەنگ و ملەملێ بەینوو بارزانییەکا
وەختێوەنە کە پەدەکە دەوروو سەرمەشقی جە سیاسەتوو ئەرەگیرکاری و لکنای پانیشتی بە تورکیایۆ مگێڵنۆ، ئیتر نمەتاویۆ ڕەنگدایوە هەوڵە خیانەتکارییەکاو دلێ و دلێ پارتی بشاریۆوە. جەنگوو دەسەلاتوازەکاو دلێ بنەیانەو بارزانی سەروو دەسکەوتەکاو گەلوو کوردی یاوان خاڵەو نەگێڵایوە بەینوو نێچیرڤان بارزانی و مەسرور بارزانی. یۆ جە دما کێشەکا، کۆبییەیوەی مەسعود بارزانیین بەغدانە پێسەو سەرۆکوو هەرێموو کوردستانی کە بەرکەوت.
سوپاو تورکیای پەی پارێزنای دەسەڵات و مەنەیوەی پەدەکەی نامان
پەنەمشۆ تواناو حکومەتوو ئەردۆغانی پەی سەربەستبییەی جە جووڵەکاش پانیشتوو کوردستانینە و کەردەی هجوومی سەروازی تەنانەت مەنتێقە مەدەنییەکایچەنە، هامتاو سیاسەتی مەنتێقەیی پەدەکەی بۆ، کە بە پەشتیبەستەین بە دوژمنیوە. درێژەو ئی سیاسەتەینە، چند ڕۆی ویەردەنە بە هەزاران سەروازێ و سەدان تانکێ و زرێپۆشێش ڕوانەو پانیشتی کەردێنێ و فرەو یاگانە بنکێ سەروازیێ تازێ وەشێ کریێنێ. دەسەڵاتی سەروازیی حکومەتوو تورکی کە جە ئەنجاموو گێڵای شۆنەو خەلافەتێوی تازەیرە پانیشتوو کوردستانینە و عێراقینە ئەرەمەرزیان، پەی پارێزنای دەسەڵاتوو پەدەکەی فرسەتەکاش بەفیڕۆ نمەدۆ. بە پێچەوانەو ئانەیوە کە فکرش چەنە کریێوە، ئاخرۆ تورکیایێوی تازە بە ئەرەگیرکەردەی پارێزگاکاش پانیشتۆ دیزاین مکریۆ.
هەنگام بە هەنگام مبانە بە هێزێوی نیمچە سەروازی
بارزانی گەرەکشەن بە دلێنەبەردەی پەکەکەی دەسەڵاتەنە بمەنۆوە. پەی ئینەیە مبۆنە بە پێشکەشکەردەی دهۆکی و هەولێری بە دەوڵەتوو تورکی. وەڵێئامایەکاو مەنتیقەکەی نیشاندەرێ ئانەینێ، کە سوپاو تورکی بەکردەوە بواروو ئیدارییوە دەسەڵاتش سەروو ئا یاگارە، کە هێزەکاو پەدەکەی پێشکەشش کەردێنێ بەدەسش ئاردەن، ئی دۆخە بە ماناو بییەی بە هێزێوی نیمچە سەروازی تورکیاین چا یاگانە.
جەنگوو بەینوو نێچیرڤان بارزانی و مەسرور بارزانیینە تەسفیەکەردەی دەسش پەنە کەرد
چەنی گەشەکەردەی ملەملێ بەینوو نێچیرڤان بارزانی و مەسعود-مەسرور بارزانی، کە جەنگ سەروو دەسەڵاتین، هەوڵێ تاتەی و کوڕیچ پەی تەسفیەکەردەی نێچیرڤان بارزانی پەرەش سانان.
جەنگوو بەینوو بارزانییەکا، کە وەرە وەرە بابەتوو هەواڵەکانێ، بە کوشتەی موحسین ڕەشیدی، یۆ جە کادیرە باڵاکاو پەدەکەی جەنگەکە زیاتەر بییەن. وەختێوەنە باس چانەیە کریێ کە لایەنوو نێچیرڤان بارزانی دژ پی بابەتەیە کەوتەن هەوڵدایوە، بەرکەوت کە مەسرور بارزانی و دەوروبەرەکەش کەسێ نزیکێ جە نێچیرڤان بارزانی دلێ پاراستنینە (دەزگای هەواڵگێریی پەدەکە)ی پاکتاو مکەرا. چا چوارچوەنە دلێ ئا زانیارییانە، کە دەسێ کەوتێنێ، بڕێ کوشتەێی سیاسیێ شاروو هەولێرینە کریێنێ، کە جە ڕای گردینیش مشارانێوە.
مەسعوود بارزانی پێسەو سەرۆکوو هەرێمی ملۆ پەی بەغدای...
جە لایێوی تەرۆ قەراروو مەسعود بارزانی سەرۆکوو پەدەکەی پەی لوای بەغدای و کەردەیۆسەروو وەرپەرساو حکومەتی ناوەندی عێراقی پێسە سەرۆکوو هەرێمی هەنگامێوی تەر و وەرەچەما چا چوارچوانە. دلێ ئا شاندەینە، کە چەنی بارزانیی لوێ پەی بەغدای؛ ڕابەر ئەحمەد بێ وەختێونە وەزیروو دلێ حکوومەتوو هەرێموو کوردستانین و ئومێد سەباح سەرۆکوو ئەنجوومەنوو وەزیرانە و هەرپاسە فرێو جە وەرپەرسە حکومییاش چەنی بێنێ، سودانی سەرۆکوەزیرانوو عێراقی دماو کۆبییەیوەکەی قسێونە ئەرەیاوناش: "بەدڵنیاییوە هەنگامێوی خاسەنە پەی وەشکەردەی متمانەی جە پەیوەندییەکاو بەینوو ئێمەنە حکومەتی فیدراڵی و حکومەتوو هەرێموو کوردستاینە" بەیاننامەکەیشنە سەبارەت بە کاریگەریی گەشتەکەو بارزانی پەی بەغدای باس کریان. تەسەور مکریۆ جە چند ڕۆی دماتەرەنە قەیرانەکێ بۆنەو سەردایەکەو بارزانییوە پەی بەغدای قووڵتەرێ مبانێوە.
نێچیرڤان بارزانی داواو پەشتیوانییش کەردە
ڕاپۆرتەکێ ئاماژە پانەیە مکەرا، کە نێچیرڤان بارزانی دژوو هەرمانەکاو مەسعود بارزانی، داواو پشتیوانی وەنەو زلهێزە میاننەتەوەییەکا کەردێنە، هەرپاسە بڕێ ناوەندێچ ئاماژە پانەیە مکەرا، کە زلهێزە میاننەتەوەییەکێ زیاتەر جە نێچیرڤان بارزانییوە نزیکتەرێنێ.
مسۆگەرکەردەی مەنەیوەی وێش ڕاو پەکەکەیوە
لاێوە تەریچۆ هەوڵێ هەردووە لایەنا بارزانی هەوڵێ مدانە بە دژایەتیی چەنی پەکەکەی وێشا بسەلەمنا ئینەیچە نموونێوی ڕۆشنا نیشاندەروو ئانەینە کە چندە گێجاوەو خیانەتی بەینوو بارزانییەکانە قووڵە بیێنۆ. دایپەنەی زەڕیوە فرەی لاو پەدەکەیوە بە بەشێو جە دامودەزگاکاو عێراقی پەی بەڕسمی بەئامانجکەردەی یۆبییەی یەکێتی و پەکەکەی سەبارەت بە پەرسەو ئاویرکەوتەیوە جە بازاڕەکانە، یۆ چا نموونە گرنگانە، کە پێویسا سەرش بکۆڵیۆوە. بەروستەی هەڵوێستی تندوو یەکێتی بە واتەی، "ڕسم و ڤیدیۆو کەسانێوی داعشیما هەن لاوە، کە ئاریێنێ پانیشتۆ" بی بایسوو ئانەیە نێچیرڤان بارزانی چا پەرسێ بکێشیۆوە. حەر دماو ئی قسا، بارزانی وەردەموو کامێراکانە بەرکەوت و واتش: "حیچ بەڵگێوە نییەن، کە یەکێتی تلیابۆ چۆوە، بەڵکوم هەرمانەو پەکەکەینە کە ئایرەکێش گیسنێنێنە"، هەوڵێ تاوانبارکەردەی تەڤگەروو ئازادیی کوردستانینێ جە ئەنجاموو ئی سیاسەتەینە سەرەش وردان. پی قسێ نێچیرڤان بارزانی هەوڵێش دێ یەکێتی نیشتمانی بە قازانجوو وێش بارۆ.
واوەی لۆبیگەریی مەسعوود بارزانی بەغدانە جە بەرژەوەندیی ئەرەگیرکاریی حکومەتوو تورکینە پێسەو وەڵێئاماێوی جیاوازی بەرمگنۆ، کە ڕەنگدایوەی سیاسەتوو پەدەکەیا. مەسرور بارزانی هێزی تایبەتیی وێشا بە نامێ پاراستنی و گوڵانیوە هەرێمەکاو پارێزنایی میدیاینە بنێ پنە موزانە و هەوڵێ دەسملەرەگێرتەی ئیرادەو گەلوو شەنگالی مدۆ، پینەیچە ئانە کە جە تاتەو مەسعوود بارزانییوە مەنەنۆ گەرەکشەن بتەمامنۆش.
