دەوڵەتوو تورکی هێزێوی فرەش پانیشتوو کوردستانینە بنێ پنە وستەن و بەردەواما جە زیادکەردەیش. ئەردۆغان ئاماژەش پانەیە کەردەبێ، هامنوو ئێساڵینە ئۆپەراسیۆنەکا پەرە پنە مدانە. ئیساتێوە سەرنیشتوو  کوردستانینە چالاکیی سەروازیێ فرێ هەنێ. هەواڵەکێ باسوو ئانەیە مکەرا، کە فرەو هەرێمەکانە جەنگ قۆمیان، حەرپاسە هجوومەکێ پەی سەروو وەرنیشتی بەردەوامێنێ. وەرنیشت بۆنەو  ورچنیەیەکاو دلێوە هەڕەشێش ئینا سەر. بەردەوام ئەوەخوایش مکەراوە، کە بە پانایی 30 کیلۆمەترا وەرنیشتی موزانە چێروو کۆنتڕۆڵیشاوە. بەکوڵی گردوو کوردستانی ئینا وەردەموو هجوومێوی ڕۆشن و ئاشکرایەنە و جەنگەکە گرد یاگێوەنە وەڵا بییەنۆ.

ئەردۆغان و باخچەلی گردوو سەرچەمەکاو تورکیایشا پەی ئی جەنگی و داگیرکارییە بەکارێ ئاردێ. دۆخی ئابووری فرە خراپا. تواناو سانای خەڵکی کەم بییەنوە. جەهەپە پەی مووچە کەمەکا و خانەنشینی زەمینش گەرەکا. پەوکای ئەرەیاونای مکەرۆ و جەم بۆوە. بەڵام جگە تاڵانی و دزی، سەرچەمەی دارایی پەی جەنگوو دژوو گەلوو کوردی خەرج مکریۆ. ئی جەنگە دەرفەتەکاو دیموکراسییچ تورکیانە دلێنە مبەرۆ. هەرپاسە یاسای دووەلایەنێ وەڵاتانە میاونیۆ یاگێ. وەرنیشتوو تورکیاینە دەس سەروو شارەوانییەکارە نمەگێرۆ، بەڵام مەنتێقە کوردنشینەکانە دەس سەروو شارەوانییەکارە مگێرۆ. ئیساتێچ ئی دەسملەرەگێرتەیە بەردەواما.

ئاکەپە و مەهەپە گەرەکشا نییەن باسوو کێشە هەقەتینەکاو تورکیای بکەرا. پەرسەو کوردی کێشێوی ئارۆییە نییەنە. بەڵکوم تارێخییەنە و گردوو گەلاو تورکیای مگێرۆوە. وەختوو جەنگینە دیموکراسی بێکاریگەر مکریۆ. یاسا پاشێلە مکریۆ. مەژگوو خەڵکی بە پڕوپاگەندەی ڕەگەزپەرسی و فاشیستی پەڕ مکریۆوە. لایەنە سیاسییەکێ ئاستەنگێ مکریانە و ئۆپۆزسیۆن گۆشەگیر مکریۆ. بەکوڵی جەنگەنە بەتایبەتی سەروو سەرەو گەلوو کوردی و گەلی هەژاری و کرێکارانە مەڕیۆوە.

بەپاو هەواڵەکا، هێزی تازێ ئامێنێ دلێ پانیشتوو کوردستانیوە. زیاتەر جە دە هەزار سەروازە تازا و سەدان زرەپۆشێ ئامینێ دلێ خاکوو هەرێمیوە. بەردەوام ئاردەیوەی هێزی ئینا زیادبییەنە. هجوومەکێ پەی سەروو هەرێمەکاو مدرامانی زیادشا کەردەن. چەکی کیمیایی قەدەغەکریا دژوو گەریلاکاو ئازادیی زیاتەر و زیاتەر بەکارمەیانە. میدیاکاو پەدەکەی کە فرە پەرسێ نیشانە مدانە، چەمپۆشیی جە هجووم و داگیرکارییەکا مکەرۆ و چارەنویسوو مەنتێقەکەی دریان دەسوو سوپاو تورکیایوە! ڕۆشنویرێ و لایەنە کوردییەکێچ زانیارییشا سەروو دۆخەکەی هەن. بەڵام هیچ ناڕەزایەتیێوی جیددی و جەماوەریی نیشان نمەدان. پەدەکە پەی بەرژەوەندی و دەسەڵاتە گەندەڵەکەیش گردوو کوردستانی موزۆنە تەرسێوی گەورێوە. دەوڵەتوو تورکی کە ئامان مەنتێقەکەوە خاسا دمایی گێڵۆوە! ئەگەر حەرکەسێوە باوەڕش پی قسێ بۆ ئانە قەت دەوڵەتوو تورکیش نەشناسان، لاو کەمیوە ئیساتێ گەریلاکێ دژوو سوپاو تورکی جەنگ مکەرا، ئەگەر گەریلاکێ چا نەمەنێ، ئایا پەدەکە هێز و ئیرادەو ئانەیش هەن، تورکیای چاگە کەرۆ بەرۆ؟ بەدڵنیاییەوە نا. ئیتر یانێ گردوو دەسکەوتەکاو پانیشتی دەسشا ملەرە مگیریۆ.

جەهەپە و هێزەکاو دیموکراسی تورکیانە نمەبۆ پاسە مامەڵە بکەرا، کە گوایا چیوێ نییەن نامێش پەرسەو کوردی بۆ. جەهەپە پەی مووچە کەمەکا و خانەنشینی زەمینش گەرەکەن، قسێ مکەرۆ و کۆبییەیوی ڕێک موزۆ گەرەکشەن ئی داواکارییا بوزۆنە بەرنامەو هەرمانێوە. بەڵام سەروو پەرسەو کوردی کە پەرسێوی گەورێنە و کێشەو وەڵاتینە، نمەوینۆنە و بێدەنگا. فاشیزم بە پەشتگۆشوستەی و بێدەنگی شکس نمارۆ و دیموکراسیی نمەگنۆنە وەڵێ. ئەگەر جەهەپە و هێزە دیموکراتیکەکێ تەرێ ئۆپۆزسیۆنێ کێشەو خاسسازیی ئابوورییشا بۆ، ئەوەڵ مشۆم دژوو جەنگی و داگیرکاری بمدرانێوە. شییەینەو ئی جەنگەیە بواری ئابوورییوە چندەن؟ ئایا لایەنێوە هەن هەیە ئینەیە بزانۆ و سەرش ڕۆشنۆکەردەی بدۆ؟ بێگومان نا. ئەردۆغان و باخچەلی ئۆپۆزسیۆنشا بێکاریگەر کەردەن و گەرەکشانە هیچ کاردایوێوەشا نەبۆ. پنەوازا  گردوو هێزە دیموکراتیکەکا و ئانێ چەنی جەنگی و فاشیزم نیییەنێ، بە ناڕەزایی و هەڵوێستوو وێشا دژوو ئی دۆخەیە بمدراوە.

سەرچەمە: ئوزگور پولیتیکا