یۊ جە فەرماندەکا قەرارگەو ناوەندی پارېزنای گەلی (نەپەگە)، ئامەد مەلازگرت، ئەرەیاۋناش، دژوو هجوموو دەوڵەتوو تورکی ٨ ساڵېن بێ مردای کۊشیەیمۍ. مەلازگرت ۋیرش ئارڎۆ، بەتایبەتی چی ٢ ساڵە دمایینەنە، دوژمن جە هەرێمەکا پارېزنای مەدیاینە گرڎ جۆرە چەکێوە قەڎەغەکریا بەکارمارۆ، واتش، باجەکە حەرچی بۊ، ئاڎۍ مدرامان کەرا.

مەلازگرت سەرنجش وست سەروو هجومەکا ئیسرائیلی پۍ سەروو فەڵەستینی، ئەرەیاۋناش ئینە قبووڵ نەکریان، ژەنی و زارۊڵۍ و هەزاران مەدەنیۍ کوشیا. ئەرەیاۋناش، ئەردۆگان و دەوڵەتوو تورکی پاسە ۋېشا بەروزا، گوایا خۊتانکەرڎەی جە گەلوو فەڵەستینی کەرا، بەڵام جە ڕاسینە چنی دەوڵەتوو ئیسرائیلی درێژە بە بازرگانی سەروازی و ئابووری مڎا.

یۊ جە فەرماندەکاو قەرارگەو ناوەندی پارېزناو گەلی، ئامەد مەلازگرت، پۍ ئاژانسوو هەواڵی فورات (ANF)ی  قسېش کەرڎۍ.

هۊرسەنگناکۍ مەلازگرتی پی جۆرەنۍ:

"سەرەتا، ساڵیاڎوو ئەرەمەرزناو پەکەکەی، جە ڕابەر ئاپۆی و گەلوو کوردی و دۆسا و کەسوکاروو گەشمەرڎا پیرۆز کەروو، سڵام و ڕێزوو ۋېم ئەرەیاۋنوو. ڕابەرما ٢٤ ساڵېن زینڎانوو دەوڵەتوو تورکینە زینڎانی کریان. دەوڵەتوو تورکی ماچۊ من دەوڵەتوو یاساینا، بەڵام ڕابەرما بەبێ حیچ تاوانێوە زینڎانی کریان. ئەگەر دەوڵەتوو تورکیای دەوڵەتۍ یاسایی بیۍ، ڕابەرما ئازاڎ بۍ. به ڵام به پێچەوانۊ یاسای تازۍ دژوو ڕابەرایەتیما بەرکەرۆ و گۆشەگیری قووڵتەر کەرۊوە و نمازۊ فیکروو ڕابەر ئاپۆی بیاوۆ بە گەلەکەیما و تەڤگەرەکەیما و جەهانی. ڕا جە دیڎاروو پارێزنەر و بنەیانەکەیش گېرۊ. جە ۋەران ۋەروو ئینەینە گەلەکەما و تەڤگەرەکەما خۊتانکەرڎەی جەڕابەرایەتی کەرا. جە گرڎ مېڎانېنە سەرمەشقی گلېرۊبیەی و چالاکییەکا کەرۊ. ئینۍ کۊمەڵە چېوۍ ئەرێنیێنۍ. بە تایبەتی ئا گەلۍ کە پەشگیری دما هەڵمەتۍ کەرا کە جەلایەن و دۆسەکاماوە دەسش پنە کەرڎەن، فرېوە جە وڵاتا جەهانینە گلېرۊبیەی ئەنجام مڎا. گەلوو کوردی کە جە چوار پارچەو کوردسانی و ئەوروپای و ۋەرکەوتوو میامینینە بەشدارېنۍ چی هەڵمەتېنە سڵام پۍ گرڎوو ئا کەسا کە کۊشیای پۍ ئازاڎیی جەستەیی ڕابەرایەتی کەرا و بەشدارېنۍ چا گلېرۊبیانە، ڕێزوو ۋېم بەربڕوو هیواو سەرکۊتەیشا پۍ موازوو. قەناعەتم پاسەن ئی هەڵمەتۍ فراوانتەرە بۊ.

ئیسە جەنگوو بەینوو ئیسرائیلی و فەلەستینی ئینا ڕۆژەڤوو جەهانینە. دووۍ هێزۍ چەکڎارۍ جەنگ کەرا، بەڵام هاموڵاتیۍ مەدەنیۍ بەینشانە کوشیا. گەلوو فەلەستینی ساڵانێوەن قوربانیۍ مڎۊ و مدرامان کەرۊ و مافەکا ۋېش پارېزنۊ. ۋینمۍ بەفرەیی زارۊڵۍ و ژەنۍ و پیرەکۍ جە بۆردومانەکا سەروو غەززەینە کوشیا. سەرەڕاو ئی هجومە دڕنڎانەیە، خاکوو ۋېشا جیانمازا. مرۆڤەکۍ وابەستۍ خاک و وڵاتەکەیشانۍ، بێگومان ۋەران ۋەروو ئی هجومانە قوربانیۍ مڎا، ئېش چەشا، بەڵام من قەناعەتم پاسەن ئانەی جە دمایینە سەرگنۊ ئانېنۍ کە خاکەکەیشا جیانمازا. گەلوو فەلەستینی وەڵتەر دۆسایەتیش چنی کوردی بیەن. تەڤگەرەکەما ماوېوە پۍ قەزیەو فەلەستینی قوربانیش بەخشا، هەڤاڵۍ فرېما گەشمەرڎۍ بیۍ. دەوڵەتوو تورکی پاسە مامەڵە کەرۊ کە خۊتانکەرڎەی جە قەزیەو فەلەستینی کەرۆ، بەڵام ئینە ڕاس نییا، تەنیا پڕوپاگەندەن. پۍ نموونەی فرېوە جە وڵاتا بەروو تورکیاینە ۋېنیشاندای پۍ فەلەستینی هەن. دەسەڵات گلېرۊبیەیېش ڕېکوست، بەڵام پۍ نەرمکەرڎەیۊ ڕای گرڎیی کریا.

بە واتەی پاسە بەرگنۊ کە خۊتانکەرڎەی کەرۊ، بەڵام بە کردەوە پاسە نییا. نامۍ گلېرۊبیەکەی 'گلېرۊبیەی گۊرەو فەڵەستینی' بۍ، بەڵام ئەردۆگان جە قسەکاشەنە سەرنجش وست سەروو دووۍ چېوا. یوۋەم; ئا مەسەلۍ کە بە سیاسەتوو دلېینەیۊ لکەدریان. هۊرچنیەو شارەوانییەکا ئینا وەڵېمانە، پۊگەی پڕوپاگەندەو هۊرچنیەیش کەرڎ. دووەم; سەبارەڎ بە پەکەکەی هەڕەشېش جە گەلوو کوردی و سیاسەڎمەداراو کوردی کەرڎ. گوایە حکومەتوو تورکی بە تایبەتی حکومەتوو ئەردۆگان – باخچەلی هەڕەشۍ جە ئیسرائیلی کەرۊ، مەسەلەن باخچەلی واتش "من ئینانی چنی قەزیەو گەلوو فەڵەستینی، چا زوڵم هەن. ئەگەر گەلەکەم ڕام پنە بڎۊ ، منیچ ملوو فەلەستین و دژوو ئیسرائیلی جەنگ کەروو. بێگومان ئەگەر دەوڵەتەکەیچم ئینەی پەسەنڎ کەرۊ". ئا ۋېش شەریکا حکومەتەنە. ئێمە قسۍ قەڎیمیەما هەنە ماچۊ، بڕۍ جەنگ کەرا، بڕۍ ماچا دەسېما مەگېردۍ و ملمۍ پۍ جەنگی. جە ڕاسینەکەس دەسش نەگرتېنۍ. دماتەر وەختۍ پنەش وچیۊ کەس ڕاش ۋنە نەگرتەنی بلی پۍ جەنگی، ماچۊ دەسم گېردۍ. مەسەلەکۍ باخچەلیچ پاسەنە. ئەگەر قسۍ کەری، جابەجێش کەرە. ئێمە میاومېنە کە تۆ جە جەنگی تەرسی، لاوکەمیۊ باسوو سیاسەتەکا دەوڵەتەکەو ۋېت کەرە.

دەوڵەتوو تورکی و ئەردۆگان خەموو کوشیاکا غەززەیشا نییا

پۍ نموونەی فرېوە جە وڵاتا بایکۆتوو ئیسرائیلیشا کەرڎ. پەیوەندی سەروازی و سیاسییشا پڕچنان و نوێنەرەکېشا کیشنېوە. دەوڵەتوو تورکی کامە پەیوەندی سەروازییش پڕچنا، کام نوێنەری سیاسی ۋېش کیشناوە پۍ ئانەی هەڵوێسوو ۋېش نیشانە بڎۊ، تەنانەت ئیسرائیل هاموڵاتیۍ و دیپلۆماتکارەکۍ ۋېش کیشنېوە. بەڵام دەوڵەتوو تورکی تا ئیسە حیچ هەنگامېوە پراکتیکیەش نەنیېنە. تەنیا باسوو پرسوو فەلەستینی کەرۊ، بەڵام پەیوەندییەکاش چنی ئیسرائیلی بەقوەتتەر کەرۆ. وەختۍ ئەردۆگان پرسوو فەلەستینی مارۊنە ئاراوە، پەیوەندییەکاش چنی ئیسرائیلی بەقوەتتەر کەرۊ. ئیسرائیلیچ هجوم کەرۊ سەروو گەلوو فەلەستینی. پۊکەی پی جۆرە. ئەردۆگان هەمیشە جە میدیاکانە ماچۆ من لایەنگروو ستەم ۋنەکریاکانا، بەڵام ۋیر چانەی مەکەرۊوە چېش سەروو گەلوو کوردی ماچۆ. بەڕاو من وەختۍ ئەردۆگان باسوو گەلی فەلەستینیش کەرڎ، پەنەوازەن چاپەمەنی ئازاڎ ئا قساشە هامشان چنی قسەکاش سەبارەڎ بە گەلوو کوردی پەخش کەرۆ. یان وەختۍ باس چانەی کەرۆ دەوڵەتوو ئیسرائیلی غەززەنە چېشش کەرڎ، با وێنەو ئا دڕندەییا دەوڵەتوو تورکی جە سەرنیشت ۋەران ۋەر بە گەلوو کوردی کەردش، وەڵا کەراوە. حکومەتوو ئاکەپە-مەهەپەی و دەوڵەتوو تورکی نیا خەموو ئا کەسانە کە غەززەنە کوشیا.

دەوڵەتوو تورکی پۍ ئانەی بە میانجیکەر، بە زۆر ۋېش خزنۊ دلۍ گرڎ چېوۍ و ماچۊ من بوو بە وەسی. ئەگەر دەوڵەتوو تورکی بۊ بە وەسی، ئی مدرامانە فەلەستینیچەنە مەمەنۆ. چاپەمەنی تورکی هەمیشە پا جۊرە هەواڵۍ وەش کەرا کە "ئەردۆگان فرە بە تنی قسېش کەرڎۍ"، بەڵام وەختۍ تەماشەو نەواخنەکەیش کەری، حیچ نییا. نە هەڵوێس هەن و نە پراکتیک. کەس دەوڵەتوو تورکی بە جددی هۊرمەگېرۊ، بەتایبەتی ئەمریکا و یۊبیەی ئەوروپای. چونکی ئامانجوو دەوڵەتوو تورکی وەڵېوستەی ۋېشا و پێڎاکەرڎەی زەڕین سەروو حسابوو ۋنەو گەلوو فەلەستینی. ئەردۆگان ۋېش جە قسەکاشەنە ماچۊ، چېوی سەرەکی مەسڵەحەتوو وڵاتەکەیمانە. هەڵوێستێوە پا جۊرە وەڵۍ وزۆ. جیاوازیېوە گەورە نییا بەینوو ئانەینە کە دەوڵەتوو تورکی ۋەران ۋەروو گەلوو کوردی کەرڎەنش چنی ئانەی ئیسرائیلیەکۍ ۋەران ۋەر بە فەلەستینییەکا کەرۆش. چی جەنگەنە بەفرەیی زارۊڵۍ و ژەنی و پیرۍ کوشیېنۍ. هەرکەسۍ ۋېش بە ئینسان بزانۊ، وەختۍ ئی دیمەنا ۋینا ئېش چەشا. بەمەڵامەتوو مەرڎەی زارۊڵا و خەڵکی مەدەنیۆ، فرېوە جە وڵاتا جەهانی یۊشا گېرت و ناڕەزایی ۋېشا ۋەران ۋەر پینەی نیشانەدا. ئینە بەڵگەو قسەکا ڕابەرایەتین سەبارەڎ بە گەلا. سەبارەڎ بە کێشەکاو ۋەرکەوتوو دلېڕاسەی، ڕابەرایەتیما ساڵانێوەن جەختش  سەروو واڵە و برایەتی گەلا کەرڎەنۆ. چارەسەروو ئی کێشا خەتەو ڕابەرێتینە.

سەرەتاو جەنگوو مەڕەکا، چارچەلەنە دەسش پێنەکەرد

٨ ساڵە بەینوو ئێمە و دەوڵەتوو تورکینە زموو هامن، بەبێ مردای، جەنگ هەن. وەختۍ ساڵەو ٢٠١٥ ینە هجوم کریا سەرما، جەنگی سەرەتایی مەڕەکاما چارچەلەنە دەسپنەکەرڎ. ٤٧ ڕووېش خواینا. جە بڕۍ یاگانە جەنگ جە مەڕەکانە ڕووەشدا، بڕۍ یاگېنە سەروو زەمینیۊ. دماو ساڵەو ٢٠١٦ یۊ جەنگوو مەڕەکا خەتەو ئاڤاشینینە دەسش پنەکەرڎ و گرڎ ساڵێوە زیاتەر پەرەما بە جەنگوو مەڕەکا دا. بێگومان ئێمە جە قۆناغە سەرەتاییەکانە تەجرووبەما نەبۍ ، ئامانجی سەرەکیما شکسپنەئارڎەو دەوڵەتوو تورکی بۍ سەروو زەمینیۊ. پۊکەی جەنگوو مەڕەکا تاکتیکێوە بنەڕەتی نەبۍ. جەنگی زەمینی تاکتیکېوە سەرەکی بۍ، مەڕەکېچ پېسە ئامرازێوە بەکارئېنۍ. بەڵام وەختۍ جەنگەکە گەورەتەر بی، سەرنجما سەروو مەڕەکاوە بۍ. یوۋەم یاگۍ کە جەنگوو مەڕەکاما پېسە تاکتیکی بەکارئارڎ، گارە بۍ. دەوڵەتوو تورکی بڕۍ ئامانجېش پۍ گارەی وستۍ وەڵۍ. کە بە ئۆپەراسیۆنێوە پڕېنە گارەی ئەرەگیر کەرۆ و چا ئەرەنیشتە بۆ. دیلەکۍ ئاڎیشاما چېروو دەسینە بېنۍ، گەرەکشابۍ ئا سەرواز و پۆلیسا ئازاڎ کەرا و سەروو ئینەی سیاسەت کەرا.

هەڤاڵەکېما چا مەڕانە هەم گورزەشا جە دوژمنی شاناو. هەمیچ ناستشا دەوڵەتوو تورکی سەرگنۆ. دماو ساڵەو ٢٠٢١ی هجومشا کەرڎ سەروو ئاڤاشینی، چا چن مانگێوە جەنگوو دلۍ مەڕاما کەرڎ. پۍ نموونهی گرڎوو هێزه کاشا ڕه وانەو تەپەسوری کەرڎۍ، بەڵام سەرنەکۊتۍ. ئیسە دەوڵەتوو تورکی ماچۊ ئیسرائیل بۆمب بە توتاوە بەسۊ و وزۊشا دلۍ مەڕەکا، بەڵام جە واقیعەنە تاکتیکشا فێرکەرۊ. ماچۆ، ئێمە ئینەما دژوو پەکەکەی کەرڎ، شمەیچ هەمان چېو کەرڎۍ. دەوڵەتوو تورکی کۊمەڵۍ چېوۍ ماچۊ کە مەژگوو ئیسرائیلیرە نمەیا. وەختۍ دەوڵەتوو تورکی نەتاواش سەروو مدرامانوو گەریلایرە زاڵ بۊ، کامێرۍ بەسۍ توتەکاوە و ڕەوانەو دلۍ مەڕەکاشا کەرۍ. دیمەنوو ئینەیچ هەن. ئی شێوازۍ هینۍ دەوڵەتوو تورکینۍ. ۋەرووچەما گرڎوو دنیېوە چەکی کیمیاوی و قەڎەغەکریاشا دژوو گەریلای بەکارئارڎ. بە مانېوەتەر دڕندەیی دەوڵەتوو تورکی تەنانەت جە ئیسرائیلییچ خراپتەرا.

وەختۍ هجومەکۍ پۍ سەروو حەفتانینی دەسشا پنەکەرڎ، ئێمە بە تیمی گېڵیاری جوابما دېوە نەک جەنگوو مەڕۍ. دماتەر دلۍ ۋېمانە باسما چانەی کەرڎ کە تاکتیکی سەرەکیما مشۊم چېش بۊ. پۍ ئانەی یەکلایەنە نەبیمۍ، تاکتیکوو تیمە گېڵیارەکا و  مەڕەکا جەنگیما پېوەرە بەکارئارڎۍ و واتما، یان ئۆپەراسیۆنوو دەوڵەتوو تورکی مردنمۍ یان پووچش کەرمېوە. ساڵەو ٢٠٢١ینە، جە جەنگوو ئاڤاشینینە، دەوڵەتوو تورکی هۊرسەنگنایش پۍ گېرتەی ۋەروو ڕاو جاکا ۋەران ۋەر بە مەڕەکا کەرڎ. بێگومان ئێمەیچ ئامادەکاریما بۍ. دەوڵەتوو تورکی جە ١٤و نیسانوو ٢٠٢١ ینە سەرەتا جە ئاسمانۊ هجومی وەرفراوانش دەسپنەکەرڎ، دماتەر جە ١٧و نیسانیەنە دەسشا بە هجومی زەمینی کەرڎ. سەرنج دەیدۍ ئیسرائیلیچ هەمان تاکتیک بەکارمارۆ. دماو ئا چالاکییەو حەماسی، ئیسرائیل پڕېنە هجومی زەمینیش نەکەرڎ، سەرەتا بەشێوېوە قورس شارەکەش بۆردومان کەرڎ، دماتەر بە دەبابېوە لوۍ دلۍ غەززەی. دەوڵەتوو تورکی ساڵەو ٢٠٢١ ی ئی تاکتیکەشە تاقیکەرڎۆ. ٢ ساڵېن جەنگېوە گەورە جە زاپ و ئاڤاشینەنە بەردەواما. دەوڵەتوو تورکی هەمیشە ماچۆ هەرێمەکۍ پارېزنای مەدیایما ئەرەگیر کەرڎېنۍ و پەکەکەما دلېنەبەرڎەن. بەڵام جەنگوو ئێمە دژوو دەوڵەتوو تورکی جە گرڎ مېڎانېنە بەردەواما. ڕاسا، دەوڵەتوو تورکی بڕۍ مېڎانېش ئەرەگیر کەرڎېنۍ، بڕۍ هەرێمۍ ستراتیژیېش ئەرەگیر کەردېنۍ، بەڵام چا هەرێمانەی گەریلا هەن و ڕووانە چالاکیی دژوو دەوڵەتوو تورکی ئەنجام مڎا. ماوەو ٢ ساڵان دەوڵەتوو تورکی نەتاوانش پارچە زەمینېوەیچ کۆنتڕۆڵ کەرۆ.

"هامڕا ئەرداڵ و ڕۆژهات، دلۍ دڵوو دوژمنیەنە چالاکیشا کەرڎ و پەیامشا دا بە دوژمنی"

گرڎوو جەهانی چەمش جە دڕندەیی دەوڵەتوو تورکی کۊر کەرڎەن. دەوڵەتوو تورکی گرڎوو ئا چەکە کیمیاۋییا کە هەنېش دژوو گەریلاکا بەکارشا مارۆ. وەختۍ ناڕەزایی تن نەبۆ، مېڎانەکە پۍ دەوڵەتوو تورکی چۆڵ بۆ. بڕۍ کوردۍ خائینېچ هامکاری دوژمنی کەرا، چنی ئانەیچ، دەوڵەتوو تورکی مەتاوۊ واچۊ، سەرکەوتەنا. ئی جەنگە چانەیچ سەختتەر بەردەوام بۆ. ئیسە ٢ هێزۍ هەنۍ. هێزێوە پۍ مەسڵەحەتاکا ۋېش جەنگ کەرۆ، هێزێوەتەر دڵسۆزانە پۍ خاکەکەیش جەنگ کەرۆ. ئانۍ سەروو خاکەکەیشاوە دڵسۆزۍ و بەئیراڎېنۍ، سەرگنا. ڕاسا ئێمە قوربانیۍ فرە قورسۍ مڎەیمۍ، ئېش چەشمۍ، چی ساڵاو دماینە چنڎین گەشمەرڎۍ قارەمانېما بەخشېنۍ، بەڵام جوابېوەیچ هەن پۍ قوربانیداکەی. پۍ نمونەی دەوڵەتوو تورکی ماچۊ پەکەکە تەمام بیەن، بەڵام ماچا ڕووانە چنڎین ئۆپەراسیۆنۍ جە سەرنیشت ئەنجام مڎا. ئەگەر تەمامت کەرڎەن، ئی ئۆپەراسیۆنا ۋەران ۋەروو کێنە ئەنجام مڎەی یان ئانە چېشا ڕووانە سەروازۍ جەدەس مڎەی [ئەگەر پەکەکە تەمامیان]؟ ئینەیچ واتە هێزێوە هەن دژوو تۆ چالاکی کەرۆ، گورزەت ۋنە شانۆ و تۊیچ ئۆپەراسیۆن کەری. کەواتە پڕوپاگەندەو شمە دروېنە. ماچا سەرنیشت ئینا دەس و ئاڎیشاوە، بەڵام ڕووانە سەروازېشا کوشیا. پڕوپاگەندەو دەوڵەتوو تورکی پۍ ڕای گرڎی جیاوازا و ڕاسییەکۍ جە یۊترینی جیاوازېنۍ.

پۍ نموونەی چالاکییە فیداکارییەکەو ئەنقەرەی؛ هەڤاڵا ئەرداڵ و ڕۆژهات ئەندامۍ تابووری نەمرانی بېنۍ. پەیامێوەشا پۍ دوژمنی کیاست. دەوڵەتوو تورکی واچۍ، گەریلاکۍ سەرنیشتی بێکاریگەرۍ بیېنۍ. حەرپاسە ئی هەڤاڵۍ پەیاموو 'متاوو بەونە و دلۍ دڵوو تۆنە چالاکی کەروو'یشا دا بە دوژمنی. وە بەڕاسی دلۍ دڵوو دوژمنینە چالاکیشا کەرڎ. ئامانجوو پەیامەکەی یاوا و چالاکییەکە یاوا بە ئامانجوو ۋېش. نیشانەشادا کە فیداکارا پەکەکەی متاوا جە هەر شۊنېنە گەرەکشابۆ چالاکی ئەنجام بڎا. هەڤاڵا ئەرداڵ و ڕۆژهات بە چالاکییە فیداییەکەیشا ئینەشا سەلەمنا. فرېوە جە فیداکارا پەکەکەی متاوا جە هەر شۊنېنە گەرەکشابۊ و جە هەر شۊنېنە کە دەوڵەتوو تورکی هەست بە سلامەتی کەرۆ، چالاکییەکا ئەنجام بڎا. ئامانج و وەخت و پەیاموو چالاکییەکەو ئەنقەرەی بەتەمامی دروس بۍ. سەرنج دەیدۍ، دەوڵەتوو تورکیش لەرناوە. دەوڵەتوو تورکی فرە متمانەش ۋېش هەن، چونکی جە ڕوو تەکنیکییوە بەقوەتتەر بیەن و میتش گرڎ یاگېنە نیانەرە، بەڵام پا جۊرە نییا. بە تایبەت جە سەرنیشت جە فرەو بوارانە چالاکیی کاریگەر هەن. ڕاسا چاپەمەنی ئینا چېروو کۆنتڕۆڵوو دەسەڵاتینە، بەڵام ڕاسیېوەیچ جە مېڎانەکەنە ۋینیۊ.

جە گرڎ یاگېنە جەنگ بەردەواما. دەوڵەتوو تورکی ماچۊ 'من دژوو تیرۆری گژیەو'، بەڵام گەورەترین تیرۆر دەوڵەوو تورکی ۋېشا. باسوو مافەکا مرۆڤی کەرۊ و ماچۊ بەپاو یاسۍ مامەڵە کەروو. بەڵام پیېوە پیروو ئێمەش جە دۆڵېنە ئېستۊ و ئەشکەنجەشا دا و جە کۆپتەرەنە فڕەشادارە واری، زارۊڵۍ دەورووبەروو دەگایەکا گەشمەرڎە کەرۊ و ماچۊ "تیرۆریستۍ بېنۍ"، پیرۍ ٧٠ ساڵش کوشت و ماچۊ پەکەکەن. ماچۊ ئەمریکا و وڵاتا ئەوروپای پەشتیوانیما کەرا. دەوڵەتوو تورک ئەندامێوە سەرەکی ناتۆیا. گرڎوو یاساکا پاشێل کەرۆ، گرڎ جۆرە ستەمێوە جە گەلوو کوردی کەرا، گرڎوو پەشتیوانییەکاش جە ناتۆی هۊرگېرۆ و حۊڵ مڎۊ جەنگەکەی بەرەو خاڵێوە تەری بەرۊ. ناتۆ پەشتیوانی دەوڵەتوو تورکی کەرۊ، وڵاتا یۊبیەی ئەوروپای چەمېشا جە ۋەران ۋەروو بەربەرییەتی دەوڵەتوو تورکینە وستېنێرە و بە پاو مەسڵەحەتەکاشا پەشتیوانیشا کەرا و سەرەڕاو ئینیشا گرڎی دەوڵەتوو تورکی گرڎ جۆرە تاوانێوە جەنگی دژوو گەریلای ئەنجام مڎۊ، بەڵام هەڵای گلەیېش هەنۍ. ئەگەر جەهان دنیاو مەسڵەحەتی نەبیۍ، دەوڵەتەکۍ بەشێوېوە مرۆڤانە تەماشەو ئی مژارەیە کەرېنۍ، ئەگەر دیېشا دەوڵەتوو تورکی چېشش سەروو گەلوو کوردیرە ئارڎەن و کاروەدایشا بیۍ، مەراقما بزانوو ئا وەختە دەوڵەتوو تورکی چېش کەرۍ؟

جەنگاوەراو پەکەکەی ۋنەپەرسایۊ جە دەوڵەتوو تورکی ستەمکاری کەرا

دەوڵەتوو تورکی ماچۊ من بوو بە ئەنداموو یۊبیەی ئەوروپای، بەڵام حیچ یاسېوە جابەجێ مەکەرۆ، تەنانەڎ ماچۊ پێویسا یاساکام جابەجێ کەرڎۍ، ماچۊ من ئەنداموو ناتۆینا، بەڵام حیچ یاسېوە وەرچەم مەگېرۆ، ماچۊ ناتۆ بېنە خزمەتوو من. ماچۊ حەرچېوۍ بە گەلوو کوردی کەروو، شمە بێدەنگۍ بیدۍ. بێدەنگېنۍ. پی حاڵۊ قازانج کەرا. حیچشا نمەیا و مەواچا شمە ئی قسا سەروو غەززەی ماچدۍ، بەڵام جە پەشتیتاوە تەماشەو ئانەی کەرڎۍ کە چېشتا بە کوردی کەرڎەن، ئەی ئەردۆگان نەبۍ؟ سەبارەڎ پا گەلە بێ چەک و بێ ۋەرگریەو کوردینە کە بەتەنیا جە مېڎانەکانە بۍ، واتش: "ژەنی بۊ، زارۊڵەبۊ ، گولەۋارانش کەرڎۍ"، دماو ئی قسۍ چن زارۊڵۍ گەشمەرڎۍ بیۍ؟ حەرپاسە ماچۊ ئیسرائیل بەپاو یاساو جەنگی هەڵسوکۊت مەکەرۊ، بەڵام ئانەی جە ۋەرنیشت کەرڎەنش یاگۍ سەرنجیا. عەفرینەنە چېششا کەرڎ و ئیسە چېش کەرا؟ جە سەرێکانی چېشا کەرڎ؟ بە بەکارئارڎەی چەکی قەڎەغەکریای گەلشا کوشت. نەوەشخانەو عەفرینیشا بۆردومان کەرڎ و بازاڕوو سەرێکانیشا بۆردومان کەرڎ و سەڎان هاموڵاتیۍ مەدەنیېشا کوشتۍ. چن جارۍ عەفرین و سەرێکانینە بۆمبی فسفۆڕیشا بەکارئارڎ و گرڎوو جەسەو زارۊڵېوە ١١ ساڵانیش ۋەرووچەما جەهانینە سۊچنا؟ دماتەر بریا شۊنېوە تەر و چارەسەرش پۍ کریا. کێ هەن گرڎوو ئا تاواناو دەوڵەتوو تورکی ئاشکرا کەرۊ و داواو ۋنەپەرسایۊ کەرۊ و جە داڎگاکا مافوو مرۆڤینە وزۊش ۋەروودەموو داڎگای؟ پەکەکەی بە تیرۆریس نامۍ بەرا، بەڵام تیرۆریستە ڕاسەقینەکۍ ۋېشانۍ. گرڎوو ئا شێوازا دەوڵەتوو تورکی بەکارش مارۊ، شێوازوو تیرۆرینۍ. ئنڎە گەلوو کوردسانی و مەدەنیۍ و ژەنی و زارۊڵۍ کوردی گەشمەرڎۍ بیۍ، ئایا گەلوو کوردی تۆڵەو ئینەی مەکەرۊوە و داواو ۋنەپەرسایشا ۋنە مەکەرا؟ زوڵموو دەوڵەتوو تورکی دژوو گەلوو کوردی تەنانەڎ جە ئیسرائیلیچ خراپتەرا. بەڵێ گرڎوو دەوڵەتەکا دڕنڎېنۍ و خەڵکی ستەم ۋنەکریایچ هەن، بەڵام دەوڵەتوو تورکی پۍ گرد دڕندەییېوە کە کەرۊش بەهانېوە مارۊوە، جەهان چەمش چنەن و کەس هەڵوێسش نییا. گرڎوو ئا هەرمانە خراپا کەرڎېنېش مسڕیاوە، بەڵام فیڎاکاراو پەکەکەی ۋنەپەرسایۊ جە دەوڵەتی ستەمکاری کەرا. تۆڵەو گرڎوو گەشمەرڎەکاما کەرمېوە. ئینە وەعدوو گرڎوو جەنگاوەراو پەکەکەین.

باجەکەش هەرچی بۊ، ئێمە مدرامان کەرمۍ

دەوڵەتوو تورکی بە دروۍ پارېزنای یەکپارچەیی خاکوو سوریای بڕۍ هەرێمېش ئەرەگیرکەرڎۍ. جە گرڎوو چەتەکا هێزێوەش وەش کەرڎەن، دژوو ڕژێمی جەنگ کەرۊ، بەڵام ماچۊ یەکپارچەیی سوریای پارېزنوو. کێ باوەڕ پی دروا کەرۊ؟ ۋېشا ماچاش و ۋېشا باوەڕش پنەکەرا. ئەردۆگان ١١ ساڵۍ چېوەڵتەر واتش "ئێمە دڎان مەنیەیمۍ پەیماننامەو لۆزانینە ". جە ۋېشۊ ئینەش نەوات. پڕۆژېوە ۋەرشەنە بۍ، واچېنۍ شارە دۊڵەمەنڎە نەوتییەکېشا چنە هۊرگېرتیمۍ و جوگرافیېوە تەسکشا پنەدایمۍ. جە هەلومەرجوو ئا قۆناغەینە قبوڵ کریا، بەڵام ئیسە سنوورەکا لۆزانی قبوڵ مەکەرمۍ. ئاوەختە ڕێکوستەی ۋېش ئەرەمەرزنا و میساقی-میللیش کەرڎ بە ڕۆژەڤ. هەڵبەت بە پاو ئی پلانا جەنگ مەکەرۆ، بەهانۍ پۍ ۋېش مارۊوە. پی مەڵامەتاوە بەشێوە جە هامکارە کوردەکاش پېسە پەدەکەی جە ۋېش گېرۊ و بڕېوەتەریچ بە نەیاروو ۋېش مزانۊ و بێگومان پەکەکەی بە تیرۆریس نامۍ بەرۊ. ئینجا ماچۊ ملوو دلۍ ئا شۊنا پەکەکەش چنەن. هەر جە ئیسۊ بە ڕۊشنی ماچۊ بڕۍ مەنتیقۍ کەرکوکی و پانیشتی، کوردسانی و کوردی نیەنۍ، هینۍ تورکمانەکانۍ. وەڵتەر فرېوە جە ئەنداما مەهەپەیشا چەکڎار کەرڎ و ڕەوانەو کەرکوکی کریۍ.

دماو ئانەی دەوڵەتوو تورکیای پەکەکەی بێکاریگەر کەرۊ، بە نۆرە هجوم کەرۊ سەروو هێزە کوردییەکا تەری. کێ ماچۊ ئانە ڕووەمەڎۊ؟ بڕۍ کەسۍ تەرسەو ئینەینە قسۍ مەکەرا. ئی تەرسۍ تا چنڎا؟ وەختۍ لایەنێوە درک پانەی کەرۊ کە لایەنەکەی تەر چنەش تەرسۊ، ئا وەختە گرڎ چېوېشا جە لایەنەکەی تەری گەرەکا. ئیسە دەوڵەتوو تورکی ئینەی بە پەدەکەی کەرۊ. مانگ و نیمېوە چېوەڵتەر ئیسە دەوڵەتوو تورکی بە پاڵپەشتی پەدەکەی سەروازەکېش جە بارزان وەزنېرە و ئەرەگیرش کەرڎ. ئێمە چا هەرێمەنە پېوەرە بېنمۍ، مشۊم بڕۍ چېوۍ بە دروسی بیاومېنە. دەوڵەتوو تورکی هجوم کەرۊ سەروو ئا کوردا کە ئیراڎەو پارېزنای بیەی و ئشناسنامەو ۋېشا هەن، ئاڎۍ سیاسەت کەرا و پۍ ئینەی کۊشیای کەرا. جەلایۍ تەریچۊ بڕۍ هامکارۍ کوردېشا ملکەچ کەرڎېنۍ و بڕۍ دەرفەتشا دان پەویشا تەری کە متاوا جارێوەتەر جە دەسشا هۊرشگېرا وەختۍ گەرەکشانە و پەیامێوە پۍ ڕای گرڎی کیانا پۍ ئانەی بزانا من هیچ کێشېوەم چنی کوردی نییا. جەنگ جە مەنتیقەکا پارېزنای مەدیاینە بەردەواما. هەپەگە ۋېش گرڎ ڕووۍ گەلی جە جەنگەکەی ئاگادار کەرۊوە. جە ئاڤاشین و زاپ و مەتینا ماوەو ٢ ساڵان جەنگوو مەڕەکا بەردەواما. دەوڵەتوو تورکی بۆردومانەکېش زیاتەر کەرڎېنۍ و جارێوەتەر چەکی کیمیاۋیی و چەکی نایاسایی بەکارمارۊ پۍ بەدەسئارڎەو ئەنجامۍ، بەتایبەتی جە ٢ مانگا ۋیەرڎەینە. دەوڵەتوو تورکی پا ئاسانییە ئەنجام بەدەس نمارۊ. ئێمە تەڤگەری گەریلایېنمۍ، جە هەر شۊنېوەنە پەنەواز بۊ، باجەکەش هەر چی بۊ، مدرامان کەرۊ".