پارتوو هەرێمە دیموکراتیکەکا (دەبەپە) و تەڤگەروو ژەنە ئازادا (تەژەئا) و پارتوو یەکسانی و دیموکراسیی گەلا (دەم پارتی) هجوومەکاو تورکیایشا بە هامکاریی پەدەکەی پەی سەروو پانیشتوو کوردستانی شەرمەزار کەردێ. ئەرەیاونایەکەی مەیدانوو شێخ سەعیدینە ئامەدەنە ونیاوە و نوێنەروو چندین ڕێکوزیا و ئەرەمەرزیایا بەشدارێ بێنێ، سەرەڕاو ئاستەنگ و هەڕەشاو پۆلیسی، دلێ گەمارۆو پۆلیسینە جەماوەر ئەرەیاونایشا واناوە.

پەرلەمانتاروو دەم پارتیی ئامەدی، مەحمود کاماچ ئەرەیاونایەکەیش واناوە، ئەرەیاونایەکەنە ئاماژە بە هامکاریی پەدەکەی کریان پەی دەوڵەتوو تورکی جە هجوومە ئەرەگیرکارییەکانە، ئەوەخوای کریانۆ ئیساتێ چندین مەنتێقێ کوردستانی کەوتێنێ چێروو دەسوو دەوڵەتوو تورکی، ماچۆ: "هجوومە ئەرەگیرکارییەکێ پەی سەروو پانێشتوو کوردستانی، بەتایبەت پەی چارەسەروو پەرسەو ستاتۆو کوردستانی دیموکراتیکی ئاستەنگێوی گەورەن. هاموەخت ئی هجوومە زیهنیەتوو یۆتۆپی نیو-عوسمانییا، کە کەرکوک و موسڵیچ مگێرۆ وێ. بەڵام چوارچوەو هجوومەکانە دا چانەیە میاومێنە، پانیشتی گەورەیچ بییەن بە بەشێوە جە میساقی میللی، ئیدارەی سیاسی ئا پارچەیە، ئەکتەری سەرەکیی ئی هجوومانە. هجووم و ئامادەکارییەکاو ئی دمایە ، چۆڵکەردەی دەگایەکا، کۆچبەرکەردەی خەڵکی مەدەنی و وشکنای شناسنامەی دلێ سنوورەکاو عێراقینە، ئی سیاسەتا پەشتڕاس مکەرۆوە".

ئاماژە پانەیە کرایان ئا بەهانێ دەوڵەتوو تورکی وەختوو ئەرەگیرکەردەی عەفرینی و سەرێکانی و گرێ‌سپی-ینە ئارێشاوە، ئیساتێ پێوەس بە ڕەوشوو کوردستانی ئەوەخوایش مکەرۆوە. هەرپاسە جەخت مکەرانێوە، هامشێوەو وەرنیشتی وەراوەروو ئی ئەرەگیرکارییەینە پەی سەروو پانیشتوو کوردستانی مدرانێوە و دەس جە کۆشیای هورنمەگێرا.  

سیاسەتوو پەدەکەی دوورەن جە بەرژەوەندیی کورداوە

 درێژەو ئەرەیاونایەکەینە ئاماژە بە دەورو خیانەتکارانەو پەدەکەی کریان و ماچۆ: "پانیشتوو کوردستانی بە قوربانیدای گەورەی بەدەس ئامان، بەڵام پەی بەرژەوەندیی گولانەی وێران کریان. ئی سیاسەتە پاشڤەڕۆییەو پەدەکەی دوورا جە بەرژەوەندییە دیموکراتیکەکاو کوردی، حەرگیز هامتاییوە کۆمەڵایەتییش نمەبۆ".

پەدەکە خیانەت مکەرۆ

ئەرەیاونیان، ئا کەسێ کە خاکوو کوردستانی پەی ئەرەگیرکەرا مکەراوە، لاو گەلوو کوردستانیوە پێسەو هامکاریی دلێ ئەرەگیرکەرا یاد مکریاوە، ماچۆ: "ئا ڕەوشە پەدەکەش چەنەن، بە مانای هەقەتینە، خیانەتەن. بییەی زیهنیەتێوی چانەی وەراوەروو دەسکەوتەکاو گەلوو کوردینە، کە بە ڕەنجێوی گەورە و مدرامانیوی بێوێنە بەدەسئامێنێ، بێجگە جە خیانەتی هیچ پێناسێوی تەر هورنمەگێرۆ".

ئاخرۆ ئەوەخوای کریاوە، کۆشیای گەلوو کوردی هەرگیز نمەگنۆ چێروو کاریگەریی بنەیانێوە یا هێزێوی مەرکەزییوە، بەڵکوم سەروو بناغەو بەرژەوەندییەکاو گەلی و بەهاکاوە بەردەوام مبۆ، ماچۆ: "بەڵام ئانێ هەوڵێ مدانە ئی کۆشیایە شکۆدارەیە هوربشاناوە و جە ئامانجەکەیش دوورش بوازانێوە و بێبەهاش بکەرا، وەراوەروو دادگاو تارێخینە مەحکومێنێ بە دلێنەشییەی".