بە پاو ئاژانسو ڕۆیتەرزی، ۋەرپرسێوە ئێرانی قسێش پەی تەلەفیزیۆنو دۆڵەتی کەردەن و باسش چانەیە کەرڎەن وەڵۍ هرووژمەکا ئەمریکاینە پەی سەرو ئەرەمەرزیا ئەتۆمییەکا، ئێران یۆرانیۆمی پیتیاش فاڕانۆ پەی شۊنێوە جیاوازی و گرڎو ئا کەسا جە ئەرەمەرزیاکەنە هەرمانە مکەرا مېیانە ئەتۆمییەکێشا چۆڵکەردێنۍ.

ئا ۋەرپەرسە ئاماژەش پانەیچکەرڎەن، " یۆرانیۆمی پیتیا جە ئەرەمەرزیا ئەتۆمییەکانە فاڕیانۆ و حیچ کەرەسێوە جە ئەرەمەرزیا ئەتۆمییەکانە نەمەنەن بۆ بە مەڵامەتو تیشکدایۆ و مەترسی پەی سەرو خەڵکی."

بەپاو شرۆڤەکارێوە کۆمپانیاو مانگۊو دەسکردو ماکساری کە قسېش پەی ڕۆنامەو واشنتۆن پۆستی کەردەن، وێنې مانگە دەسکردەکا بەرش وزا وەڵې هرووژمەکەو ئەمریکاینە جە دەوروبەرو ئەرەمەرزیاو فۆردۆینە جموجۆڵی نائاسایی بیەن. جە ١٩و حوزەیرانینە، ١٦گەڵابۍ چا ڕێنە کە ملۆ گلېرگەو چېرزەمینیوە مردێبێنۍ، بەڵام دماو ڕوێوە دیارۍ نەمێنې بێنې.

ئا دیمەنې پەشتڕاسش نمەکەرۆوە یۆرانیۆمە پیتیاکې فاڕیێباوە، بەڵام ئاماژەن پەی ئانەی زانیان ئەمریکا هرووژمو مکەرۆ سەرو ئەرەمەرزیا ئەتۆمییەکا.

تاران ئاگاڎیش دا: هرووژم پەی سەرو خامنەیی هێڵې سوورەنە

ۋەرپەرسێوە باڵاو ئێرانی بە ئاژانسوو ڕۆیتەرزیش ئەرەیاۋنا،  ئەر هەر هرووژمېوە پەی سەرو ڕابەرو ئایینی ئێرانی عەلی خامنەیی ئەنجام بڎریۆ 'بەرەو گرڎو گفتوگۊیەکا وزیارە'. بەپاو قسەکا ئا ۋەرپەرسیە، هەوڵێوە پا جۊرە بەزنای هێڵەی سوورەنە و ڕا وەشکەر بۆ پەی جوابێوە 'بێسنوور'ی.

سوپاو پاسدارا: پەشیمانۍ باوە

دماو هرووژمەکۊو ئەمریکای پەی سەرو وێستگە ئەتۆمییەکا ئێرانی، سوپاو پاسدارا قەولو جوابێوە تنیش دا. بەپاو ئەرەیاۋناکەی، بارەگاکۍ ئەمریکای جە ناوچەکەنە نوقتۍ لاوازېنې و حیچ هرووژنېوە نمەتاوۆ تەکنەلۆجیاو ئەتۆمیی ئێرانی جە بەین بەرثۊ.

جە هروژمەکانە پەی سەرو ئیسرائیلی لاوکەمیۆ ٨٦ کەسۍ زامڎارۍ بیۍ

چا بەینەنە بەپاو ئەرەیاۋنێوە وەزارەتو تەندروسیی ئیسرائیلی جە هرووژمەکاو ئێرانینە هېزی شەوۍ جە ئیسرائیلەنە لاو کەمیۆ ٨٦ کەسۍ زامڎارۍ بیێنې.