بە بەشداریی جەمې سیاسەتمەدار، ڕۆشنۋیر، هونەرمەڼې و نوێنەرا گلېرگەی مەدەنی کۆنفرانسەکە لواڕاوە. جە چالاکییەکەنە ئەرەیاۋېیا کە پەنەوازا پڕۆسەو ئاشتی سەرجەنۆ بنیاڎ بنریۆوە و ڕا وەشە کریۆ پەی چارەسەریی دیموکراتیکی.

جە سەرەتاو کۆنفرانسەکەینە ڕەزا تورمەن، دادوەری وەڵینو دادگاو مافەکا مرۆڤو ئۊروپای دەسش بە قسا کەرد و سەبارەت بە چارەسەری پرسو سیاسیی کوردی سەرنجش وست سەرو گرنگیی بەشداریی کۆمەڵایەتی و دیموکراسیبیەی.

تورمەن ئاماژەش پانەیە کەرڎ، ئاشتی تەنیا نیایرەو چەکی نییا، بە ناستەی مەڵامەتەکا هۊرگېرتەی چەکی پێکمۍ و واتش، "پەی ئانەی پڕۆسەو ئاشتی سەرگنۆ، پەنەوازا گەل بکریۆ بە بنەما. ئەر مەڵامەتەکۍ جەنگی دوورۍ نەوزیاوە سەرجەنۆ جەنگ دەسپنەمکەرۆوە." تورمەن ئەرەیاۋناش، جە تورکیانە ڕژێمی ستەمکار کۊسپو ۋەردەمو کۆمەڵایەتیبیەی ئاشتییا و باسش چانەیە کەرد، پەنەوازا واز جە سیاسەتو ئەمنگەرایی بێنە.

جە درێژەو قسەکاشەنە تورمەن باسش چانەیە کەرد، پرسو سیاسیی کوردی تەنیا پرسێوە بەینو کورد و دۊڵەتی نییا و واتش، "پرسەکە عیلاقەش بە سەرانسەرو وڵاتیوە هەن. هەرپۊکەی چارەسەریچ بە مەنەیۆ ژیۋای هامبەشی بۆ. پەی ئانەیچ پەنەوازا زوانێوە چارەسەریی هامبەش بێزمېوە."

تورمەن باسش جە نیایرەو چن کۆمسیۆنێوە کەرد کە پلانە هەنە جە پەرلەمانەنە بنریارە و واتش، چی پڕۆسەنە پەنەوازا جەهەپە نەک تەنیا پەشتیوان بۆ، بەڵکم بە پێشنیارو چارەسەری پېسە کارەکتەرێوە چالاکی دەورش بۆ.

پەیامو دەم پارتی

هامسەرۆکاو گرڎیی پارتو یەکسانی و دیموکراسی گەلا (دەم پارتی) پەیامێوەشا پەی کۆنفرانسەکەی کیاست و جە پەیامەکەنە سڵام جە ئەنجام دای کۆنفرانسەکەی کریان و سەنج وزیان سەرو پێشئامایەکا ۋەرکۊتوو مېیامینی، کە بە جەنگو ئی دماییەو بەینو ئیسرائیل و ئێرانی قوڵتەر بیەنۆ.

هەر جە پەیامەکەنە جەخت سەرو گرنگی مردنای جەنگەکا کریانۆ و ئامان: "ئاشتی بنیاڎنیای ژیۋایۍ یەکسان، ئازاد و دیموکراتیکا.ئاشتی ئڼە گرنگ و کاریگەرا کە نمەتاویۆ پەی ڕەحمو دەسەڵاتی جیا مەنۆ. پەیلوایما چامنەن کۆنفرانسەکەتا هامکارێوە عالو هیواکا ئاشتی مکەرۆ."