ئەرەگیریەکۍ دەوڵەتو تورکی ئەرەگیری پەی سەرو خاکو پانیشتوو کورڎەسانی بەردەواما و تا ئیساتۍ حکومەتو هەرێموو کورڎەسانی هەڵوێسش نەبیەن و ئینەیچ بیەن بە مەڵامەتوو نارەحەتی جە لاو هاموڵاتیاوە. سەبارەت بە ئەرەگیریەکا دەوڵەتو تورکی، هەر یۆ جە نویسەرا سەلام عەبدوڵا و ئەمیر خانەقینی  ڕۆنامەنویس و عەباس ئەرکەوازی ڕۆشنۋیر پەی ئاژانسوو هەواڵوو فوراتی (ANF)ی  قسېشا کەردە.

' تورکیا ئەڼامو ناتۆیا و هامکاری مکریۆ'

نویسەر و چالاک سەلام عەبدوڵا باسش چانەیە کەرد کە دەوڵەتو تورکی تاوانێوە گەورەتەرە ئەنجامە مڎۆ مقارنە بە وەڵتەری، جە ئیساتێنە بە قوڵای ٣٥ کیلۆمەترا خاکو پانیشتوو کورڎەسانیش بەزنان و واتش: "دەسەڵاتوو تورکیای تاوانێوە گەورۍ ئەنجام مڎۆ سەرو خاکو هەرێموو کورڎەسانیۆ، هرووژم و ئەرەگیریەکۍ دەوڵەتوو تورکی مەترسی گەورەن سەرو خاکو کورڎەسانی. ئی ئەرەگیریەو تورکیای سەربەخۆ نیە و هامکاری مکریۆ جە لایەنو ناتۆیۆ."

باسش چانەیچکەرد کە بێدەنگی گەلی و لایەنەکا مەترسیا و واتش: " داواکارەنا جە ڕۆشنۋیرا و ڕۆنامەنویسا و ڕێکوزیا مەدەنییەکا و پەدەکەی و یەنەکەی و یۆگێرتەی، بێدەنگی بماڕا جە ۋەرا ۋەرو ئەرەگیریەکا دەوڵەتو تورکینە سەرو خاکو پانیشتوو کورڎەسانی."

' هرووژمەکۍ دەوڵەتو تورکی دژوو مرۆڤایەتیەنۍ '

ڕۆشنۋیر عەباس ئەرکەوازی باسش چانەیە کەرد کە هرووژم و ئەرەگیریەکۍ دەوڵەتو تورکی پەی سەرو پانیشتوو کورڎەسانی نایاساییا و واتش: " ئا ئەرەگیریەو تورکیای سەرو خاکو هەرێموو کورڎەسانیۆ مکەرۆش دژوو مرۆڤایەتیا و یاسایی نیا. مشۊم گرڎما پېوەرە هەڵوێس نیشانە بڎەیمۍ دژ بە ئەرەگیریەکاو تورکیای سەرو پانیشتوو کورڎەسانی".

عەباس ئەرکەوازی ڕووەش جە ڕۆشنۋیرا و دەسەڵاتی سیاسی هەرێمی و عێراقی کەرد و واتش: " داوا مکەروو جە لایەنە سیاسیەکا هەرێموو کورڎەسانی و عێراقی و ڕۆشنۋیرا کە مشۊم یەک دەنگ و یەک هەڵوێسۍ بیمۍ پەی ڕوبەڕو بیەیۆ هێزەکاو تورکیای، چونکی سنورۍ فرەو خاکو کورڎەسانی و عێراقیش بەزنان گەر ڕاش پنە بڎریۆ گرڎوو خاکو کورڎةسانی و عێراقیچ ئەرەگیر مکەرۆ."

' دژوو گرڎ ئەرەگیریێوەنمۍ پەی سەرو خاکو کورڎەسانی '

ڕۆنامەنویس ئەمیر خانەقینی باسش چانەیە کەرد کە دەوڵەتو تورکی فرە بێ ویژدانانە و نامرۆڤانە هرووژمش کەردەن سەرو پانیشتوو کورڎەسانی، مشۊم بە تنی ئیدانەش بکەرمۍ و واتش: " دەوڵەتوو تورکیای هرووژم مکەرۆ سەرو ژیۋگەی و دەگایەکا کورڎەسانی و خاکو کورڎەسانی مشێونۆ، ئانەی ئاوەزو مرۆڤبیەیش بۆنە مژۆم دژ پی ئەرەگیریا دەوڵەتو تورکیای بۆ."

ئەمیر خانەقینی داواش جە گەلوو کورڎەسانی کەرد دژوو ئی ئەرەگیریا دەوڵەتو تورکی مرداوە و واتش: " مشۊم گەلوو کوردی جە هەر چوار پارچەو کورڎەسانینە دژ بە ئەرەگیریەکاو دەوڵەتو تورکی مردۆوە. داواکارەنا گلېرگەی مېیاندەوڵەتی و حکومەتو ناوەڼی و حکومەتو هەرێمی هەڵوێسی جدیشا بۆ دژ بە ئەرەگیریەکا تورکیای هەڵوێس نیشانە بڎا."