جە گوزارشتەکۍ ئەنجومەنوو قەڵەموو ئەمریکاینە ئاماژە پانەی کریان، جە ساڵەو ٢٠٢٣ێنە ئێران گەورەتەرین زینڎانوو ژەنە نویسەرەکا بیەن و ئاماژەش پانەیچ کەردەن کە فرەیی ژەنە نویسەرەکا جە ئێرانەنە بە مەڵامەتوو دژایەتیکەردەی و رەڎکەردەیۆ حیجابی زۆرەملێنە گیریێنۍ.

حەرپاسە ئەرەیاۋنانیچش، سەروو ئاستوو نویسەرانە جە هەردووە جنسیچەنە ئێران دماو چینی ئینا پلەی دووەم و ئا وڵاتا جیهانیانە کە فرەتەرین نویسەرێشا زینڎانیۍ کەردێنۍ.

حەر چا گوزارشتێنە ئانەیچ ئامان، حەرچنڎە کە ژمارەو نویسەرا زینڎانی جە ٥٧ کەسا جە ساڵەو ٢٠٢٢ پەی ٤٩ کەسا جە ساڵەو ٢٠٢٣ ێنە وەستەنەرە، بەڵام گێرتەی بەردەوام و وەر وەڵاو ئا نویسەرا کە پەشتیوانی جە سەرهۊردای ژەنی، ژیۋای، ئازاڎیی مکەرا، نەمردان و سەرکوتکەردەی ئازاڎیی رابەربڕیەی ئێرانەنە بەردەواما.

ئانەیچش وستەن ڕووە، کە ئا نویسەرێچە ئازاڎۍ کریێنۍ، بە نیایرەو بارمتەی بیەن و بەردەوام تەرسەو گېرتەیۆی و سەپنای سزای زیاتەرێشا سەرا.

دماو دەسپنەکەردەو سەرهۊرداو ژەنۍ، ژیۋای، ئازاڎیی فشارەکۍ پەی سەروو نویسەرا، هونەرمەنڎا و رۆشنۋیرا ئێرانی چڕتەر بیەنۆ.