بانگەشەو دماییئامای بە ئۆپراسیۆنی سەروازی تورکیای پەی سەرو هەرێمی جە زۋانی ئەردۆغانی و ۋەرپەرسا تورکیوە، شەرت نییا هەر ئیساتۍ دمایش ئامابۆ و کریۆ پەی یەک دوووە مانگۍ تەریچ بەردەوام بۆ، تورکیا فرەش لاوە مەتڵەبا کە گارەی کۆنترۆڵ بکەرۆ، متاوۆ یان نا ئانەشا محاڵا جوابی تەمام بڎریۆوە، ئیساتۍ گارە  نە سنوورو زۆنوو سەوزی و نە کەرکوک و موسڵا، گێلی تورکیای ئینا چانەینە هەڵای ئەجۊشەنە متاوۆ بەچەک کوردی نازۆ، یاگۍ داخېنە دنیایچ جە ۋەرا ۋەرو ئی کوشت و بڕیەینە بێدەنگا، تورکیا گارەی بگێرۆ یان نا نە گەریلا دمایش مۍ، نەکورد متاویۆوە، بەڵام گرنگە گرڎوو کوردی تورکیای بشناسا، نەک ئانەی کورد گنۆ وەڵۍ تورکیای و بواچا بۆ ئانەی تۆ شۊنیشەرە مگێڵی ئینا چۍ، ڕووەدایەکەو کەلاری کە ڕووەدایێوە ناوەش و ناجۆر بۍ، چنی جەمە ڕووەدای وەڵتەرو کفری و سۆچنای بازاڕەکا گرڎ پێوەرە لکەدریێنۍ، چنەشەنە میت کار پەی ئانەی مکەرۆ چنی بەهانۍ دەس وزۆ، تا زیاتەر تورکیا پەلۍ بشانۊ،  ناوەشی چی گەمە قیزەونەنە ئانەنە کورد بە ساڎەتەرین شێوەیچ بەشداری بکەرۆ، یانی ئەگەر بە دووۍ قسېچ بۆ کەواتە ئینە هامکاری ئەرەگیران، گرڎوو سیناریۆکا و هەر سیناریوۍ تەریچ پەی لادای چەمان سەرو ئا گرڎ وێرانیەی سوپاو تورکیای مکەرۊش.

ئەگەر مژار بیەو پەکەکەی بۆ مشۊم گرڎ ئانەی بزانا کە پەکەکە جە ئەستەنبوڵ و ئەنقەرەو هەولێر و تارانیچنە هەن پېسە چنی تەمامو دنیێنە هەن  تا میاوۆ بە ئەرجەنتین و بەرازیلیچ، ئینە حەقەتینا، بەڵام ئایا کامشا هەرمانەو تیرۆری مکەرا پەکەکە کەداواو ئازاڎیی مکەرۆ، یان تورکیا کە گەرەکشا وێرانکاری بکەرۆ و ژەن و زاوڵەیچ کوشۆ، پەی کوردی شەرما دووەدڵ بۆ چانەی جە مابەینوو ئی دووەینە کامیشا هۊرچنۆ، هیچ بەهانێوە نیەنە پەی هۊرچنیەو دەوڵەتو تورکیای، با سەرنج و ڕەخنەیچما سەرو پەکەکەی بۆ، ئەگەر ۋنەکۊڵیای ورد و بێلایەنۍ با بەرۍ گنا فرەیی ئانەی مڎریۆ پاڵو پەکەکەی سیناریۆ و هەوڵو فاڕایۆ نیگاین، پەی کوردی گرنگا نەگنۆ دلۍ ئا گەمە قەبیحەیۆ، کەلار چکۆ و گارە چکۆ،  دماتەر پەکەکە جە تەقنایۆی بۆ ، هەزار کۆڵانۍ و وڵۍ و کەلەبەرۍ ئەستەنبوڵی هەنۍ بایی ئانەیچ کوردۍ هەنۍ، بەڵام پەکەکە تیرۆریست نیا، ئانەی ئا نامێشە دان پاڵ جە من و تۆ عالتەر ئانەی مزانۆ.

تورکیا جەهەمان کاتەنە کە پەلامارەو ژیۋای گارەی مڎۆ، چەولاوە دەسوو تۆقەی پەی ئەسەدی و نامەی دڵداریچ پەی خەڵکی تەری مکیانۆ و تەنانەت داوا جە کەشەکایچ مکەرۆ پەی مامەڵەی، ئانە کوردا بەپاخروا کۊتەنەنە، ئێمە پەنەوازما بە کەمێ ئاوەزی هەن، ڕۆو ئاشتی و ئازاڎیی مۍ و سیاوو چەرمە بەرگنۆ، ئیتر چی مشۆ کەمێ ئاوەزما نەبۆ، پەی کوردی کەلار و شەقڵاوە یۊنۍ کێ قازانج چانەی مکەرۆ، کەلار زەرەرش پنەبیاوۆ، گەلۆ ئی ئاوەزە ئەمنییە پەی حوکمڕانی و پێوەرەبیەی کوردا زەرەری گۊرەش هەن،  واز جە کوردەکا باردۍ با یۆترینشا وەش بسیۆ، ئانەشا جە قینەبەرایەتی خاستەرا.

تا نەبیمۍ پا ئینسانەی سلێمانیما ئڼەو هەولێری و سنەما ئڼەو ئامەدی و عەفرینما ئڼەو خانەقینی وەش نەسیۆ، نمەتاومۍ نەتەوەسازی و مرۆڤسازی بکەرمۍ، پەی دوژمنی ۋێشا وتونی توتەی سیاو و چەرمە یۆن کوردی عال و کوردی خراپ نییا، ۋەرو ئانەی لاو ئاڎیۆ کورد واتە ئانەی ئینا قەبرسانەنە، پۊکەی گرفتەکە ئینا ۋێمانە، ئێمە ۋێما پنە گولانە و کەما، دوژمنیچ پەی زاڵبیەی سەرمارە ئاڼەش وەسێن.