گرووپوو ئێشکگیری ئازاڎیی جە حەفتەو ٦١٩و چالاکیەکەینە ئاماژەشا پانەی کەرد: "پەی خاوەنداری جە ئیراڎەیما و ماڕای گۆشەگیری، پەی ئاینڎێوە ئازاڎیی پەی ڕابەریما، پەی کوردسانی ئازاڎیی چالاکیەکەیما بەقووەتەر بکەرمۍ."
ئێشکگیری ئازاڎیی کە پەی مسۆگەرکەردەی ئازاڎیی جەستەیی ڕابەروو گەلوو کوردی عەبدوڵا ئۆجالانی و دمایی ئارڎەی بە سیستموو قڕکەری ئیمراڵی شاروو ستراسبۆرگ و فەرەنساینە جە ٢٥و حوزەیرانوو ٢٠١٢یۆ دەسشپنەکەردەن، ئینا حەفتەو ٦١٩ینە.
جە چالاکیەکەنە هەر حەفتێوە جە وڵاتێوە جیاوازوو ئەوروپایۆ گرووپێوە چالاکیەکەی ئەنجام مڎا. ئێشکگیری ئی حەفتەیچە پێکئامان جە کوردسانیاو شاروو دوویسبوورگوو ئەڵمانیای و هەریۆ جە مەسعود ئاڤاراس، عەبدوڵا تۆلایمان، موراد ئەرزەم و ئەدیق ئەلتاش بەشدارێنۍ.
'بە کۊشیایما خاوەنداری جە ڕابەروو گەلوو کوردی بکەرمۍ'
واتەواچوو گرووپەکەی مەسعود ئاڤراس ئانەش ئاردۆ وەیاڎ چا یاگێنە کە ئەرەمەرزیاو ئەوروپایش چنەن ١٢ سالېن، بۍ مردای ئینۍ ئێشکگیرینە و واتش: "مزاندۍ، کە ڕابەروو گەلوو کوردی ماوەو ٢٥ ساڵان ئیمراڵینە دیلکریان. چینەیچەنە دەوروو ئەنجوومەنوو ئەوروپای هەن. پەی شەرمەزارکەردەی ئی دەوریە، ئێمە ئینایمۍ چۍ. گوایە ئەوروپا ناوەنڎوو پارێزنای مافوو مرۆڤیا، بەڵام کە مەسەلۍ مېنە سەروو مافوو گەلوو کوردی و تەڤگەری ئازاڎیی ئانە ئەوروپا بێدەنگی هۊرچنۆ. پۊکەی هەڵوێسوو ئەنجوومەنوو ئەوروپای چی ڕوۆ شەرمەزار مکەرمۍ. حەتا ئەنجام بەدەسمارمۍ جە چالاکیەکەیما بەردەوامۍ بیمۍ و خاوەنداری جە ڕابەروو گەلوو کوردی مکەرمۍ."
'پەی ئاینڎێوە ئازاڎیی پەی ڕابەریما، ئەرەکۊشایما گەورەتەر بکەرمۍ'
ئاڤراس پەی وەشکەردەی دما ڕۊیۍ ئازاڎیی داواش جە گەلوو کوردی کەرد و واتش: "گەلوو کوردی ئینا قۆناغێوە گرنگەنە. ئێمە گۆشەگیری ئیمراڵی شەرمەزار مکەرمۍ. با کۊشیایما دژوو پیلانگێڵنی میان نەتەوەی و گۆشەگیری ئێژاتەر بکەرمۍ. پەی خاوەنداری جە ئیرادەیما و ماڕای گۆشەگیری، پەی ئاینڎێوە ئازاڎیی پەی ڕابەریما، پەی کوردسانی ئازاڎیی چالاکیەکەیما بەقوەت بکەرمۍ."
جە دمادمایینە ئاڤراس ئاماژەش پانەی کەرد ئەرەکۊشای مافداروو گەلوو کوردی سەرگنۆ.
