سەدانور ئۆگور و سیبەل ئۆرکمەزە سەروەختوو ناڕەزایەتییەکاو وانینە گیریێ و وزیێ زیندانۆ، تندوتیژی و پاشێلکەردەی مافەکا زیندانوو ژەناو شاکرانینە وەراوەرشا کریان، ژەنی پەی شەرمەزارکەردەی ئەشکەنجەو سەروو هامڕایەکاشا وەردەموو زیندانەکانە جەمێ بیێوە و درووشمێ و پانکارتێشا بەرزێ کەردێوە.

پەرلەمانتاراو پارتو یەکسانی و دیموکراسیی گەلا (دەم پارتی) پەریهان کۆجا و بورجوگول چوبوک و چندین کەسێ تەرێ بەشدارێ بێنێ.

ئەندامەو پارتوو ئازادی جڤاکی (تۆپ) مەلەک باکشییە واتش، پەی پارێزنای واڵە و هامڕاکاما ئینایمێ چێگە، پێسەو پارێزنەراو ئیرادەو گەلی و کۆماری دیموکراتیکی و سۆسیالیزمی هەنمێ.

پەرلەمانتارەو دەم پارتی پەریهان کۆجا واتش زیندانەکێ بۆنەو گۆشەگیرییوە فاڕیێنێ پەی ئەشکەنجەخانەی، هامڕایەکێشا بۆنەو خاوەندارێتیی جە ئیرادەو گەلوو وانینە گیریێنێ، ئینە ٣٧ ڕوێن بە شێوازو ئەشکەنجەی جیاواز و فەرمانی سیاسی زینداننە گیریێنێ، واتش: "سڵامەتیی گیانوو هامراکاما چی زیندانەنە پارێزیا نییا. چند جارێ هەوڵێما دێ چەنی ڕاوەبەراو زیندانی کوێ بیمێوە، کۆبییەیوەما چەنی وەزارەتوو دادی بەردەواما. بەڵام وەختێوە پەرسەکێ مێ سەروو دادپەروەری بەرەکێشا بانێ بە دیوار. بە هاندای ڕاوەبەرا و پاسەواناو زیندانی، هامڕێما ڕووبەڕوێ مەردەی باوە. ٣٧ ڕوێن هەڕەشێ و پەلاماردای و کوشتەیشا وەنە مکریۆ، لاو ٣٠ زیندانییاوە ڕووبەڕوو هجوومی بیێنێوە".

کۆجا واتش وەزارەت و ڕاوەبەرایەتیی زیندانەکەی تاوانبارێنێ و هەوڵێ مدانێ هەڕەشێ و کوشتەی زیندانەکانە ئاسایی بکەرانێوە، واتش: "هامرێکێما بە هێزی ڕەواو وێشاوە بەردەوامێنی و فرە خاسێنێ، سڵامشا پەی گەلوو وانی هەن".

دمایی کۆجا پەیاموو سەدانور ئۆگور و سیبەل ئۆرکمەزێش زیندانۆ، واناوە.

پەرلەمانتاروو دەم پارتی بورجوگول چوبوک واتش هامڕێکێما تەنیا نییەنێ و ئێمە گردما پەشتگیرێشانمێ، ئادێ بۆنەو پەشتگیریی وەنەو گەلوو کوردیوە ئینێ زینداننە، ئەوەخوایش کەردۆ، پی هەوڵا نمەتاوانێ ئیرادەو هامڕایەکاما ماڕا.