پەرلەمانتاروو  یاساشناس زولکوف ئوچار باسش چانەی کەرد دەوڵەت پەی ئانەی درێژە بە نایاساییەکاش جە ئیمراڵینە بڎۆ، سیستموو گۆشەگیری پېسە مانۆڕێوە بەرۊڕاوە. ئوچار ئانەش دەسنیشانکەرد هیچ پاساوۍ یاسایی پەی 'سزاو دیسیپلین'ی بیەیش نیا کە ڕابەروو گەلوو کوردی عەبدوڵا ئۆجالانشا پنە گۆشەگیر کەردەن.

پەرلەمانتاروو وان و دەم پارتی زولکوف ئوچار سەروو ئا مژارا پەی ئاژانسوو هەواڵوو (ANF)ی قسێش کەردۍ و ئاماژەش پانەی دا کە گۆشەگیری ئیمراڵی بە تەمامیی پەی ئامانجی سیاسین، پەی ئانەی کاریگەری عەبدوڵا ئۆجالانی سەروو گلێرگەی بڕیۆ، دەوڵەت سیستموو گۆشەگیری بەرۆڕاوە و واتش: "پیمانەو سەروەری یاسایی جە تەرەفوو دەوڵەتیوە پەی بەیاگۍ یاۋنای دادگاو مافەکا مرۆڤوو ئەوروپای DMME دەسپنەکەردەو فاڕیایە یاساییەکا بە پاو ئی قەرارا، ۋەرپرسیاریی مسەپنۆ. گرڎ وەختۍ ئاستەنگ پەی ئی سەروەرییا وەش کریۆ، بەهیچ جۆرێچ جە ئیمراڵینە جابەجێ مەکریۆ."

قۆناغەو ٢٥ ساڵی ۋییەردە

ئوچار سەرنجش وست سەروو قەرارەکا دادگاو مافەکا مرۆڤوو ئەوروپای DMME و ئانەش دەسنیشانکەرد ئاستوو وەردای بە شەرتوو عەبدوڵا ئۆجالانی پێویسا ٢٥ ساڵەکەی نەۋییەرنۆ، بەڵام دمایی پا قۆناغۍ ئاما. ئوچار ئاماژەش پانەی دا هیچ ڕاسپاردێوە  یاسایی گۆشەگیری نیا و واتش دەوڵەت سیستموو گۆشەگیری پېسە مانۆڕێوە بەردەوام مکەرۆ.

پەیوەندییە یاساییەکێ جابەجێ مەکریا

ئوچار جەختش چانەی کەردۆ کە هیچ پاساوێ یاسایی پەی 'سزاو دیسیپلین'ی نیا کە پېسە مەڵامەتوو گۆشەگیری سەروو عەبدوڵا ئۆجالانی بریۆ ڕاوە و واتش: "گەر سزاو دیسیپلینی بسەپیۆ، ئانە جە ۋەرا ۋەرەنە پێویسا ڕا بە مافوو دەرفەتوو ناڕازیبیەی  و دەرفەتوو ئیسفاڎە ورگێرتەی جە پارێزنەری بڎریۆ. پارێرنەرەکێش مەزانا سەپنای سزاو دیسیپلینی سەروو بەڕێز ئۆجالانیرە ڕاسا یان نا، دلێینەکەش چێشا و ۋێش مسپارۆ بە چ ڕووەدایۍ. پەی ئانەی مافوو ناڕازی بیەی بەکاربۍ ناچارێنۍ کە گرڎ دەرفەتێوە بەکاربارانۍ. پېسە وەڵتەریچ واتم بانگەشەو سزاو دیسیپلینی پېسەنە مانۆڕێوە سیاسی دەوڵەتی. هیچ پەیوەندیێوەش بە یاسێوە نیا. دەوڵەت هیچ یاسێوە جە دورگەو ئیمراڵینە جابەجۍ مەکەرۆ. ڕوانگەو دەوڵەتیچ ۋەرا ۋەر بە بەڕێز ئۆجالانی ڕوانگێوە نایاساییا. دڎان نەنیای بە مافی و جەختکەردەیۆ جە سەختکەردەی گۆشەگیری دەرنجاموو ئی تەماشەکەردەیە نا یاساییەو دەوڵەتین. پۊکەی جە ۋەرا ۋەروو ویستوو جابەجێکەردەی یاسێنە، دەوڵەت فشارەکاش زیاتەر مکەرۆ. سزاو دیسیپلین ۋەرا ۋەر بە زیندانیا مسەپیۆنە. پۊکاتی جە ۋەرا ۋەرەنە بنەیانەو زیندانیا سیاسی ناڕازی بیەیشا بە چالاکی بەربڕا. خاوەنداریکەردەی چی چالاکیا خاوەنداریکەردەین جە یاسۍ و دیموکراسی. پۊکاتی فرە گرنگا گلێرگە چی مژاریە ئاگاڎاربۆ و پەشتگیری جە ئەڎایا بکەرۆ."

گەرەکشانە بڕاشەرە جە گلێرگەی

ئوچار سەرەنجش وست سەروو کاریگەری سیستموو گۆشەگیری ئیمراڵی سەروو تەماموو زیندانیا و واتش: "چی ساڵا دماینەینە دەوڵەت بەشێوێوە خۆبەخۆ چندین سیاسەتمەدارێش گێرتێنۍ و ئی قۆناغە نایاسایۍ بە فشارێوە سەخت سەروو زیندانیا بەردەوامی بە وێش مڎۆ . نەڎای پنەو نامەی و کتێبی، ڕاگێرتەی جە مافی و دەرمان نەکەردەی و چارەسەری تەندروسی، ئاستەنگکەردەی وەردای زیندانیا نەوەشی، هاڵیکەردەیۆ مافوو وەربیەی زیندانیا، کەمکەردەیۆ مافوو چەمپنەکەوتەی هامبەشی ڕەفتێوە فشارکەردەین. پی فشار و زۆرکەردەیە سیستمێوە وەڕەسکەردەی سەروو زیندانیا مسەپیۆنە. گرڎوو ئی پەیوەندییا وەرا وەر بە زیندانیا پەیوەس پا تاک ڕەوییەو دەوڵەتیوە کە بەشێوەی یاسایی مەجمۆوە. بڕیەیرە زیندانیا سیاسی جە گلێرگەی پېسە ڕێبازوو بەقوەتکەردەی تاکڕەوی و سەرەوەری دەوڵەتی مۍ. گەرەکشانە کە کەسایەتی زیندانیا سیاسینە ویستوو ئازاڎیی و یەکسانی جە ڕۆژەڤوو گلێرگەینە بڕارە."