ئیمە خاون ئی ئمزایل خوارە، لەسەر بنەمایل ئەو پرنسیپ و گامە‌یلە ک لێرە هاتنە، داوای یەکبۊن و یەکڕێزی لە حزبەیل و ڕێکخراوەیل سیاسیی کوردستان کەیمن. بارودووخ و هەستیار ئێسەی کوردستان و ئێران، ئالینگاری چارەنۊسسازێ لە وەر دەم نەتەوە و جمشت ڕزگاریخوازی لە ڕۆژهەڵات کوردستان ناس. گریمانەی گۊەڕیان بنەڕەتی لە ڕۆژهەڵات، وەرپرسایەتیی مێژویی ئەڕا گشت ئەو حزبەیل ڕۆژهەڵاتە، ئەڕا یەک-هەنگاویی و لەوەر چەو گرتن ستراتژی هاوبەش، لەسەر بڕێگ بنەما و خاڵ سەرەکی، درس کردێیە. کۆمار ئسڵامی جوور سیستمێگ تۆتالیتر، هاتێ لەئاکام وەروەڵاوەیی ناڕەزایەتی، خوەینیشاندانەیل و مانگرتنە گشتییەگان، لەناکاو وە زرانی دەرباید. هەر لێوا، داڕمیان ڕژیم کۆمار ئسڵامی بێگومان دەرفەت زێڕینێگە ئەڕا نەتەوەی کورد ئەڕا دەستەوەرکردن سەروەری سیاسی خوەی درس کێد. هاتێ لە نەبۊن ئامادەگی هێزەیل سیاسی کورد، ئالینگاری و مەترسیی فرەی مێژوییش ئەڕا کورد وە دۊایا بارێد.

لە ئەگەر هەڵوەشیاین دەمودەزگایل ئەمنی دەوڵەت داگیرکەر لە کوردستان، هەم وەمدوو دەستەوەر کردن ماف سەروەری ئەڕا نەتەوەی کورد و هەم ئەڕا دارەڕا کردن ئاسایش نیشتمانی ئەڕا شاروەندان، هێز و ڕێکخراوەیل سیاسیی ڕۆژهەڵات وەرپرسایەتی ئەخڵاقی و نەتەوەیی دێرن. لە لێوا بۆشایێگ و نەبۊن یەکگرتوویی دامەزراوەیی لەناوەین هێز و ڕێکخراوەگان کوردستان، ئمکان دووجارەبۊن ئەزمان تاڵ باشور کوردستان وجود دێرێ. یەکگرتن دامەزراوەیی لە ڕۆژهەڵات لەسەر بنەمای پلاتفۆرمێگ نیشتمانی، هەمیشە هەوەجە بۊیە. ئەمان لەی بارودووخە، ئی یەکگرتنە هەوەجەیگ ئێسکەیی و خواست و تواستن نەتەوەییێگە. هەر وەی خاترە، گشت حزب و ڕێکخراوەیل سیاسیی ڕۆژهەڵات کوردستان داوەت کەیمن ک لەسەر ئی بنەمایلە، ئەڕا یەکگرتن دامەزراوەیی نەتەوەیی، ک دەنگدانەوەی فرە ڕەنگیی ڕۆژهەڵات کوردستان بوون، ڕێکبکەفن.

بنەماگان ڕێککەفتن:

ا. لەسەر بنەمای دەستەوەرکردن یەکسانی سەروەریی سیاسی نەتەوەیی ئەڕا ڕۆژهەڵات کوردستان.

ب. وە بنەماوەرگرتن پرنسیپ ماف سەروەری سیاسی ئەڕا گشت نەتەوەگان جۆغرافیای ئێران وە مدوو هاوئاهەنگی، هاوپشتی و درسکردن بەرەیگ ئەڕا هاوکاری کردن وەگەردیانەو.

پ. وە بنەماوەرگرتن یەکسانی ڕەگەزی و قەبووڵێ جوور کردەی یەکسانی، ڕێبەرایەتی و کارگەری ژن لە جمشت ڕزگاریخوازی کوردستان.

ج. وە بنەماوەرگرتن پرنسیپەیل دمۆکراتیک لە دامەزراوەییکردن یەکگرتن جمشت نەتەوەیی، پێشگیری کردن لە درسکردن ناوچەی ژێر دەسەڵات حزبی.

چ. وە بنەماوەرگرتن و گارانتی کردن ماف یەکسانی جیاوازییەیل (دینی، زاراوەیی و ڕەگەزی) لە کۆمەڵگای کوردستان.

ح. وە بنەماوەرگرتن سەروەری قانوون و پەیڕەو کردن شەفافییەت ئداری لە گشت دامەزراوەگان.

وە بنەماوەرگرتن ئی پرنسیپەیلە، خوڵک گشت حزب و ڕێکخراوەیل سیاسیی ڕۆژهەڵات کەیمن ک وە مدوو وەدیهاوردن یەکگرتن دامەزراوەیی نەتەوەیی، وە کردەوە ئی گامەیلە هێز بێیەن.

1.     دامەزانن شەورای باڵای ڕێبەرایەتی و بڕیار، پیەکهاتێ لە حزب و ڕێکخراوەیل سیاسیی ڕۆژهەڵات.

2.     یەکخستن هێز پێشمەرگە و گەریلا و درسکردن ستاد ناوەندیی فەرماندەیی سپای نیشتمانیی ڕۆژهەڵات، ک گرێدریاسە بڕیارەیل شورای باڵای ڕێبەرایەتی و بڕیار.

3.     درسکردن کۆمیسیون پەیوەندییەیل شورای باڵای ڕێبەرایەتی و بڕیار ئەڕا چالاکی دیپلۆماتیک و نوێنەرایەتی سیاسەتی یەکگرتوویی کورد لە ڕۆژهەڵات.

4.     درسکردن دەزگا دادوەری سەربەخۆ.

5.     درسکردن میدیای نەتەوەیی ک زوان حاڵ شورای باڵای ڕێبەراتی و بڕیار بوود.

6.     درسکردن دامەزراوەی پاراستن ئاسایش کۆمەڵایەتیی کوردستان.

7.     درسکردن کۆمیسیون بەڕێوبەرایەتی دەمودەزگایل کوردستان وە هەماهەنگی و بەشداریی کۆمەڵگای مەدەنی

8.     ناقانوونی ناسانن هەر جوورە کووشان تاکەکەسی یا حزبی ئەڕا حەقەوسەنن یا سزادان شاروەندیل لە ئەگەر نەمەنن دەمودەزگایل کۆمار داگیرکەر ئسڵامی لە کوردستان.

لە دوماوە، گشت حزبەگان بایس ئاگادار ئی ڕاستیە بوون ک خەڵک ڕۆژهەڵات نە دەتوانێ ئەڕا ماوەیگ نادیار چاوەڕێ یەکڕێزی حزبەگان بوود و نە قەبووڵیش کێد ک لە ئەگەر بۆشایی، ئەو حزبەیلە لە کەڵک وەرگرتن لە هاز چەک گشت جومگەیل دەسەڵات قورخ بکەن و ئەزمان باشوور دووجارە بکەنەو.

ژ.ت