ئەندامی پەرلەمانی پارتی چەپی سەوز لە ڕحا، فەرید شەنیاشار ڕاگەیاندراوێکی لە پەرلەمان خوێندەوە دەربارەی سکاڵاکەیان لە ساڵی ٢٠٢١ لە دادگای ڕحا، ئێستە دەیانەوێت ئێشکگریەکەیان ببەنە ئەنقەرە، ئامینە شەنیاشاری دایکی و چەند پەرلەمانتارێکی پارتی چەپی سەوز بەشداری ڕاگەیاندراوەکە بوون.

فەرید شەنیاشار گوتی:

"پێنج ساڵە بۆ ساتێک ئازارمان کەمی نەکردووە، پێنج ساڵە ستەم بەردەوامە، پێنج ساڵە دادپەروەری بەدی نەهات، ئەمڕۆ دایکم لە ئەنقەرەیە لەپێناو دادپەروەری.

دایکم ٦٨ ساڵ تەمەنێتی و ٨٤٦ ڕۆژ چالاکی ئێشکگرتنی لەبەردەم دادگای ڕحا ئەنجامدا، یەک ئامانجی هەیە ئحەویش بەدیهاتنی دادپەروەرییە و بەرپرسان گوێبیستی داواکەیان بن، بەڵام بەداخەوە بەرپرسانی ئەنقەرە کە ئەرکیان بەدیهێنانی دادپەروەرییە هاوار و فرمێسکی دایکمیان فەرامۆشکرد.

چالاکییەکەمان گواستەوە بۆ ئەنقەرە لەپێناو ژیانێکی دادپەروەر، پاش ئەم ڕاگەیاندنە داوای دیداری وەزیری داد دەکەین، ئەگەر بەڵێنی بەدیهێنانی دادپەروەریمان پێ بدەن، دایکم لە ئەنقەرە نامێنێت و دەچێتەوە پیرسوس، چونکە دایکم نایەوێت لێرە بمێنێتەوە، پێویستی بە نەشتەرگەرییە لە چاو و ئەژنۆ، دەڵێت نەشتەرگەری ناکات تا دادپەروەری بەدی نەیەت، ئەگەر دادپەروەری نەهاتەدی، تێکۆشانەکەمان لە ئەنقەرە درێژە پێ دەدەین".

پاشان ئامینە شەنیاشار قسەی کرد، ئاماژەی کرد بەوەی دژی ستەم ئێشکگرتنی دادپەروەری ڕێکخستووە و گوتی: "با کوڕەکەم ئازادبکەن، بەسە، منیش دەگەڕێمەوە ماڵەوە لای نەوەکانم. تاوانی کوشتنیان بەرامبەر خێزانەکەم ئەنجامدا، کوڕەکەمیان دەستگیرکرد، ئەگەر کوڕەکەم ئازاد نەکەن، لەبەردەم وەزارەتی داد دادەنیشم و لەوێ درێژە بە ئێشکگرتنی دادپەروەری دەدەم. ئەردۆگان باش دەزانێت، حکومەت باش دەزانێت، کوڕەکەم تاوانی نییە، با تۆمارەکان دەربکەن ئەگەر تاوانبار بوو، با کوڕەکەی تریشم دەستگیربکەن".