لە چوارچێوەی "ڕۆژەکانی دیالۆگ لەگەڵ عەبدوڵا ئۆجالان" کە قۆناغی دووەمی هەڵمەتی "ئازادی بۆ عەبدوڵا ئۆجالان، چارەسەر بۆ پرسی کورد" لە نیکۆسیای پایتەختی قوبرس بەرنامەی شانۆ و خوێندنەوە ئەنجامدرا.

چالاکییەکان بە پێشەنگایەتی مەجلیسی گەلی کوردی قوبرس ئەنجامدرا و بەدەمەوەهاتنێکی مەزنی بەخۆوە دیت. کوردستانی و سیاسەتمەدار و پارێزەر و سەرۆکی پارتە سیاسییەکان و ڕۆژنامەوانان و خەڵکی قوبرس بەشداری چالاکییەکە بوون.

نمایشەکە لەلایەن گرووپی شانۆیی " Bien à vous Armanc Kerboranî" کە ساڵی ٢٠١١ لەلایەن خوان-گۆلان ئەلیبەگ دامەزرا، پێشکەش کرا و سەرنجی هەمووانی ڕاکیشا.

ئەو گرووپە کە لە ئەکتەرانی کورد و فەرەنسی پێکهاتوون، هاواری دایکی محەمەد یاڤوزەلیان هێنایە بەرچاو کە لە ساڵانی ٢٠١٥-٢٠١٦ لە سەردەمی بەرخۆدانی خۆبەڕێوەبەریدا لە جزیرەی بۆتان کوژرا. شانۆکە پەیوەست بوو بەو کارانەی کە دەوڵەتی فاشیستی تورک دوور لە یاسا و ئەخلاقی شەڕ لە سەردەمی بەرخۆدانی خۆبەڕێوەبەری ئەنجامی دابوو، ئەمەش چەند ساتێکی هەستیار لای بینەران خوڵقاند.

بەشی دووەم پێکدەهات لە پیشاندانی سینڤزیۆنێک کە وێنە و وتەکانی ڕێبەری گەلی کورد عەبدوڵا ئۆجالانی دەگرتەخۆ. جەماوەر چەندین جار درووشمی "بژی سەرۆک ئاپۆ"یان بەرزکردەوە. دەقی یۆنانی و کوردی لەسەر ژیانی ڕێبەری گەلی کورد عەبدوڵا ئۆجالان و "تێگەیشتن لە ڕێبەر ئاپۆ" خوێنرایەوە.

بەرنامەکە بە بەرزکردنەوەی درووشمی "بژی سەرۆک ئاپۆ" و هەڵپەڕکێ کۆتایی هات.