سەرۆکی پەرلەمانی تورکیا نوعمان کورتولموش لە چوارچێوەی دیدارەکان لەسەر هەمواری دەستوری هەمیشەیی سەردانی دەم پارتی کرد. دەم پارتی لەبارەی هەمواری دەستورەوە، باسی لە پێویستی خاوێنکردنەوەی رێگەکە کردەوە.
سەرۆکی پەرلەمانی تورکیا نوعمان کورتولموش لە چوارچێوەی دیدارەکانی تایبەت بە دەستوری نوێ سەردانی پارتی دیموکراسی و گەلان (دەم پارتی)ی کرد. دیدارەکە کاتژمێر ١٢:٠٠ لە ناو بینای پەرلەمان دەستیپێکرد و ماوەی نیو کاتژمێر بەردەوام بوو. هاوسەرۆکانی گشتیی دەم پارتی تونجەر باقرخان و تولای حاتەمئۆغیولاری و هەروەها سەرۆکانی فراکسیۆنی دەم پارتی گوڵستان کلیچ کۆچیگیت و سەزایی تەمەلی بەشداری کۆبوونەوەکە بوون.
لەدوای کۆبوونەوەکە کۆنفڕانسێکی رۆژنامەوانی سازکرا و تیایدا کورتوڵموش باسی لەوەکرد، لە چوارچێوەی کارەکانی هەمواری دەستور لە رۆژی سێ شەممەوە دەستیان بە دیدار کردوە و لە دووەم رۆژدا سەردانی دەم پارتییان کردووە. وتیشی، "ئەمرۆ لە گەڵ سێ فراکسیۆنی ناو پەرلەمان کۆدەبینەوە. سەرەتا سەردانی دەم پارتیمان کرد. روانینی خۆمان و داواکارییەکانمان بۆ ئەوان خستەڕوو. دوای ئەوەی لەگەڵ بەڕێزان هاوسەرۆکانی گشتی و سەرۆکەکانی فراکسیۆنەکە دیدارمان کرد سەبارەت بەوە دواتر روانینی خۆیان بۆ رای گشتی ئاسکرا دەکەن. هیوادارین کە کارەکانی پەیوەست بە هەمواری دەستور بە بەشداری زۆرینەی پارتەکانی ناو پەرلەمان بەڕێوەبچێت و تێپەڕێندرێت. ئێمە دواتر و پاش کۆبوونەوە لەگەڵ هەر سێ فراکسیۆنەکە، بە راگەیەندراوێک وردەکاری دیدارەکانی ئەمڕۆ ئاشکرا دەکەین".
لای خۆیەوە هاوسەرۆکی دەم پارتی تولای حاتەمئۆغیولاری رایگەیاند، " ئێمەش وەک دەم پارتی بڕوامان وایە کە پێویستمان بە دەستورێکی دیموکراتیک هەیە. روانین ئێمە لەبارەی گۆرینی دەستوری ١٢ی ئەیلول و داڕشتنی دەستورێکی دیموکراتیک دەزانرێت. دەبێت رێگەکەی بۆ هەموار و خاوێن بکرێت. بەلامانەوە زۆر گرنگە پرۆسەی سەرکوتی هەنوکەیی کۆتایی پێبهێندرێت، خاڵەکانی دەستوری هەمیشەیی و بڕیارەکانی دادگای دەستوری هەمیشەیی جێبەجێ بکرێن.
ئێمە ئەوەمان خستەڕوو، کە توندوتیژیەکەی دوێنێ یەکی ئایار ئەنجام درا بە نەرێنی و رەتکراوە دەبینین و بەڕێوەچوونی پرۆسەی هەمواری دەستوری هەمیشەیی لە وەها کەش و بارودۆخێکدا رووبەڕووی ئاستەنگ دەبێتەوە. بێ گومان ئەمڕۆ بۆ ئێمە زۆر گرنگە کە پرۆسەی داڕشتنی دەستوری هەمیشەیی لە سەر بنەمای هاوڵاتیبوونی یەکسانی هەموو گەل و ئایینەکان لە پانتاییەکی بەرفراوانی پەیمانی کۆمەڵایەتی دەستپێبکەین. تورکیا بە قەیرانی قووڵ و هەژاریدا تێپەڕ دەبێت.
وەک هەموو پارتەکان بەرپرسیارێتیەکمان هەیە کە پرۆسەکە بە جۆرێک کە ئەو کێشە هەنوکەییە بەپەلە و ترسناکە نەشارێتەوە، بەرەوپێش ببرێت".
هـ . ب
