کتێبی ڕێبەری گەلی کورد عەبدوڵا ئۆجالان "شارستانییەت، سەردەمی خوداوەندە دەمامکدارەکان و پاشا داپۆشراوەکان" کە بەم دواییە وەرگێڕاوە بۆ زمانی ئەرمەنی لە قوتابخانەی پەروەردەیی مختار سیباساتسی ئەریڤان بە خوێندکاران ناسێنرا.

مامۆستایان و دەیان خوێندکار لە مەراسیمەکەدا ئامادەبوون. مێژوونووس ئارمەن ڤۆسکانیان، هاوسەرۆکی کۆمیتەی کوردستان سیلۆ دربۆیان و ڕۆژنامەوان لیانا میهۆیان وەک قسەکەر بەشداربوون.

ئارمەن ڤۆسکانیان ڕایگەیاند دەمێکە چاوەڕێیە ئەم کتێبە وەربگێڕدرێت بۆ زمانی ئەرمەنی، ئاماژەی بەوە کرد ئەم کتێبە لە هەلومەرجی سەختی گۆشەگیری نوسراوە و زۆر بەنرخە و گوتی: "ئەم کتێبانە لە ٥ بەرگ پێکدێت، بەرهەمی لێکۆڵینەوە و خەباتێکی بەرفراوانە. هەموو مژارێک بە قووڵی و بەرفراوانی وتوێژی لەسەر کراوە".

ئاماژەی بەوە کرد سەرەڕای ئەوەی ٢٠ ساڵ تێپەڕیوە هێشتا پێشبینی جدی تێدایە و کاتێک خوێندمەوە باوەڕم نەکرد ٢٠ ساڵ پێشتر نووسراوە، گوتی: "پێشبینییەکانی عەبدوڵا ئۆجالان یەک بە یەک دێنەدی. وەرگێڕانی بۆ ئەرمەنی بۆ هەردوو میللەتەکە گرنگە. دەوڵەتی تورک هەرچەند زەخت و گوشار لە فەلسەفە و ئایدۆلۆژیای عەبدوڵا ئۆجالان بکات، سەر ناکەوێت. عەبدوڵا ئۆجالان هەرچەن لە زیندانە، بەڵام بە کتێبەکانی فیکر و فەلسەفەی خۆی گەیاندۆتە هەموو جیهان. خاوەنی چەندین شێوازی بەرخۆدانە. یەک لەوانەش ئەم کتێبەیە".

ڕۆژنامەوان لیانا میهۆیان ڕایگەیاند پردێکی پەیوەندی لەنێوان کورد و ئەرمەن دروستبووە، گوتی: "ئەم پەیوەندییە لەسایەی ئەم کتێبەی عەبدوڵا ئۆجالان و فەلسەفەکەی بەگشتی، بەهێزتر دەبێت".

هاوسەرۆکی کۆمیتەی کوردستان سیلۆ دربۆیان لەسەر پارادایمی ڕێبەری گەلی کورد عەبدوڵا ئۆجالان دوا و ڕایگەیاند سیستەمێکی کۆنفیدراڵی ئافراندووە و ئەم سیستەمە لای هەموو بندەستان و خوازیارانی یەکسانی و دادپەروەری قبووڵکراوە، ئێستەش گەلان دەیانەوێت خۆیان لە قەیرانەکانی سەرمایەداری ڕزگار بکەن و ژیانێکی ئازاد بژین، گوتی: "تاکە ناونیشانی ژیانێکی نوێ و ئازاد و یەکسان و دادپەروەر لە فەلسەفە و ڕامانی ڕێبەر عەبدوڵا ئۆجالاندایە. کتێبەکانی ڕێبەر ئۆجالان، دەرمانی ئەو نەخۆشییانەیە وا سەرمایەداریی ئافراندوویەتی. سیستەمێکی دامەزراندووە هەموو گەلان دەتوانن پێکەوە بە یەکسانی و ئازادی بژین. لە کتێبەکانیدا بە قووڵی و بەرفراوانی باس لەمە دەکات".

لەکۆتایی چالاکییەکەدا کتێبی "شارستانییەت، سەردەمی خوداوەندە دەمامکدارەکان و پاشا داپۆشراوەکان" بە دیاری بەخشرایە خوێندکاران.