نووسەران‌، چالاکوانان‌ و ڕێکخراوەکانی بواری جینۆساید له‌باره‌ى ڕه‌وشى ڕۆژئاواى كوردستانه‌وه‌ ڕاگەیاندراوێکیان بڵاوکردەوە و پەیامی پشتگیردانیان بە ڕۆژئاوا دەربڕی و دەڵێن: "حکومەتی هەرێم، دەبێت پابەندییەکانی خۆی بەرامبەر بە ڕۆژئاڤای کوردستان لە دابینکردنی خۆراک‌ و پێداویستی تەندرووستی ‌و لایەنی مرۆیی جێبەجێ بکات." دەشڵێن، هۆشداریی بە هەمولایەك دەدەین، کە ئامانجەکانی ڕژێمی تورکیا، زەنگی سەرەتایەکی ڕوونە بۆ جینۆساید و قڕکردن ‌و لەناوبردنی کورد.

لە ڕاگەیانداوەکەدا ئەوەش خراوەتەڕوو، ڕوداو و گۆڕانکارییەکانی ئەمدواییەی سووریا، کۆتایی بەو حکومڕانی ٥٣ ساڵەی ڕژێمی ستەمکاری بەعس هێنا، زەمینەیەکی لەباری بۆ پێکەوە ژیان ‌و دابینکردنی مافی گەلان لە سووریادا ڕەخساندوە کە هەمووان تیایدا یەکسان ‌و سەربەست بژین.

 

ئەوەش هاتووە، ئەمڕۆ، پێچەوانەی یاساو ڕێسا نێودەوڵەتییەکان‌ و بنەماکانی مافی مرۆڤ‌ و مافی ژیانێکی شکۆدار بۆ هەموو مرۆڤەکان، هەروەها پێچەوانەی مافە بنەڕەتییەکانی نەتەوەکان لە سووریا، دەبینین پیلانێکی شەڕانگێزی دژ بەڕۆژئاڤای کوردستان لەلایەن تورکیا‌ و گرووپە بەکرێگیراوەکانی دەستیپێکردوە.

باسیان لەوەشکردووە، ئەو هەڵمەتە داگیرکارییە فراوانخوازییە، هاونیشتمانیانی کورد و پێکهاتەکانی دیکەی ڕۆژئاڤای کوردستان کە بە”ڕۆژهەڵات ‌و باکووری سووریا”ش ناوزەند دەکرێت، کردووه‌تە ئامانج.

ئاماژە بەوەشکراوە، ئەم پێشهاتە مەترسیدارە زەنگی سەرەتایەکی ڕوونە بۆ جینۆساید و قڕکردن ‌و لەناوبردنی کورد لەڕۆژئاڤای کوردستان ‌و سووریا، بەتایبەتیش دوای گۆڕانکارییەکان ‌و ئەو شڵەژان‌ و ناسەقامگیرییە ڕاستەوخۆیەی لەناوچەکەدا هاتوه‌تە ئاراوە، لەوەها دۆخێکیشدا، ئەرکی هەموو دەستەبژێری سیاسی ‌و حزب‌ و لایەنە کوردستانییەکان ‌و هەموو هاوڵاتییەکی کورد و هەموو ئازادیخوازێکە ڕێگریی لە داگیرکاری بکات ‌و دژ بەو شەڕانگێزیی ‌و فراوانخوازییەی تورکیا بووەستێتەوە.

وتوشیانە، نووسەران ‌و چالاکوانان ‌و ڕێکخراوەکانی بواری جینۆساید، لەم ساتەوەختە مێژوییەدا، بانگی هەموو خەڵکی کوردستان دەکەن، لەسەر هەموو ئاستە حزبی ‌و مەدەنی ‌و هاوڵاتییانی هەر چوار پارچەی کوردستان، ڕۆڵی مێژویی خۆیان ببینن ‌و ڕووبەڕووی فراوانخوازی دەوڵەتی تورک‌ و گرووپە بەکرێگیراوەکانی ببنەوە، لەپێناو ئاشتی‌ و ژیانێکی بەڕومەت بۆ دانیشتووانی ڕۆژئاڤای کوردستان، کە لە ئێستادا هەوڵی لەناوبردن ‌و سڕینەوەی ناسنامەیان دەدرێت.

ئەو نووسەر و چالاكوانانە دەشڵێن، ئەرکی هەموو حزبە کوردستانییەکانی هەرێمی کوردستانە، ڕۆڵی مێژوویی خۆیان ببینن بۆ پاراستنی ڕۆژئاڤا و پاراستنی ناسنامەی کوردبوون‌ و کوردستانیبونی ڕۆژئاڤا، بە گرتنەبەری هەموو میکانیزمە یاسایی ‌و دیپلۆماسییەکان، لە پێناو فشارخستنەسەر دەوڵەتی تورک‌ و بەکرێگیراوەکانی بۆ دەست هەڵگرتن لەڕۆژئاڤا ‌و سەپاندنی ئاشتی سەرتاسەری.

ڕاشیانگەیاندووە، ئەرکی حکومەتی هەرێمه‌ لە چوارچێوەی ڕێکارە یاساییەکان ‌و به‌ گوێره‌ى بڕیاری پەرلەمانی هەرێمی کوردستان، ژمارە (٢٤)ی ساڵی ٢٠١٤، پابەندییەکانی خۆی بەرانبەر بەڕۆژئاوای کوردستان لە دابینکردنی خۆراک ‌و پێداویستی تەندرووستی و مرۆیی جێبەجێی بکات.

لەکۆتاییدا راگەیاندراوەکەدا هاتووە، ئێمە وەك نووسەران ‌و چالاکوان‌ و ڕێکخراوەکانی بواری جینۆساید، بەهەموان دەڵێین ئیدی نابێت جینۆساید دوبارە ببێتەوە، بۆ ئەو مەبەستەش هۆشداریی بەهەمولایەك دەدەین، کە ئامانجەکانی ڕژێمی تورکیا، زەنگی سەرەتایەکی ڕوونە بۆ جینۆساید و قڕکردن ‌و لەناوبردنی کورد لەڕۆژئاڤای کوردستان‌ و سووریا.

ناوی ڕێكخراوەكان و چالاكوانان بەمجۆرەیە:

١- ڕێكخراوی كوردستان بێ جینۆسای-.KWG

٢- گۆڤاری تۆپزاوە ـ تایبەت بە پرسی ئەنفال و جینۆساید.

٣- ناوەندی داكۆكی پشدەر بۆ قوربانیان و جینۆسایدكراوان.

٤- تۆڕی ئایكان كوردستان ــ.IKN

٥- ڕێكخراوی قەدەغەكردنی چەكی كۆكوژ لە كوردستان ــ OAWMD.

٦-ڕێكخراوی چیرۆكەكانی ئەنفال.

٧- تۆڕی رێكخراوە كوردستانیییەكان له پێناو دادگای تاوانی. نێودەوڵەتی-.koncicc

٨- رێكخراوی هەڵمەتی دادپەروەری ــ .OJC

٩-ڕێكخراوی مانەوە بۆ پرسی شەهیدان و ئەنفالكراوان.

١٠-ڕێكخراوی دادپەروەری و ئاشتی جیهانی بۆ مافی مرۆڤ.

١١- ڕێكخراوی چاودێری كوردۆساید – چاك.

١٢- ڕۆژنامەی نوگرەسەلمان.

١٣- ڕێكخراوی جیهانێكی بێ چەكی كیمیاوی و بایۆلۆجی.

١٤- هەڵمەتی ژیان دژ بە ئیعدام لە كوردستان.

١٥-ڕێکخراوی داکۆکی لە قوربانیانی گۆرە بەکۆمەڵەکان.

١٦- هێمن حەسیب ــ نووسەر و چالاكوانی بواری جینۆساید.

١٧ــ عەلی مەحمود ــ نووسەر و چالاكوانی بواری جینۆساید.

١٨- عەدالەت عومەر ــ نووسەرو لێكۆڵەری بواری جینۆساید.

١٩-محەمەد حمە ساڵح تۆفیق ــ نووسەر و لێکۆڵەری بواری جینۆساید.

٢٠- د. ئیبراهیم مەلا زادە ــ نووسەرو لێكۆڵەری بواری جینۆساید.

٢١-شاخەوان شۆڕش ــ نوسەر و لێکۆڵەری بواری جینۆساید.

٢٢- هاوڕێ پێشڕەو ــ پێشمەرگەی دێرین و کەسوکاری ئەنفالکراو.

٢٣-ئەحمەد مەجید ــ چالاکوانی بواری جینۆساید و کەسوکاری ئەنفالکراو.

٢٤-هەژار هوشیار ــ لێکۆڵەری بواری جینۆساید.

٢٥-خەلیل رەحیم ــ چالاکوانی بواری جینۆساید.

٢٦-جەبار ئەحمەد ــ توێژەر لەبواری جینۆساید.

٢٧-حمە زرنگ ــ چالاکوانی بواری جینۆساید.

٢٨-هابیل ئەحمەد کەریم ــ بەڕێوەبەری مۆنۆمێنتی ئەنفال.

٢٩- گەردە مامە حەمە ــ چالاکوانی بواری مافی مرۆڤ.

٣٠-دلێر کەریم ــ نووسەر و چالاکوانی بواری مافی مرۆڤ.

٣١- ئیبراهیم هەورامانی ــ نووسەری بواری جینۆساید.

٣٢- سالار مەحمود ــ نووسەری بواری جینۆساید.

٣٣-هوشیار مرادخان ــ نووسەری بواری جینۆساید.

٣٤- رۆشنا جەمال مەحمود ــ چالاک و پسپۆری جینۆساید.

٣٥- ئارام هەڵەدنی ــ نووسەر و ڕۆژنامەنووس.

٣٦-ڕەشید عەلی سەعید ــ نوسەر لەبواری جینۆساید.

٣٧- مەلاشاخی ــ نووسەر لەبواری جینۆساید.

٣٨- گوڵناز عەزیز ــ نوسەری بواری جینۆساید.

٣٩- قاسم کازم ــ چالاکوانی بواری جینۆساید.

٤٠-ناجی تالیب ــ چالاکوانی بواری جینۆساید.