کاوە مەنسووری، جێگری سەرۆک وەزیرانی ویلایەتی هەسنێ و ئارمەند زورن، ئەندام پەرلەمانی فیدراڵی ئەڵمانیا لە پارتی SPD کە بەشدارییان لە جەژنی نەورۆزی فرانکفۆرتی ئەڵمانیا کرد، وڵامی پرسیارەکانی ئاژانسی هەواڵی فورات (ANF)، سەبارەت بە نەورۆز و بانگەوازە مێژووییەکەی ڕێبەر ئاپۆیان دایەوە.

نەورۆز لە بەرامبەر گوشارەکاندا، هێمای بەرخۆدانە

کاوە مەنسووری سەرەتا جەژنی نەورۆزی لە گەلی کورد پیرۆز کرد و ڕایگەیاند کە نەورۆز سەرەتایەکی نوێیە، نیشانەی هیوا و ئاشتییە، هاوکات بۆ گەل لە بەرامبەر گوشارەکاندا بەرخۆدانە. مەنسووری سەرەڕای بە گرنگ زانینی نەورۆز  وتی: "بۆ من زۆر گرنگە ئەمڕۆ لێرەین و پەیامەکەمان بگەیەنین. ئەمساڵ خەڵکێکی زۆر هاتوونەتە فرانکفۆرت بۆ ئەوەی جەژنی نەورۆز بە شێوەیەکی ئاشتیانە پیرۆز بکەن منیش بەوە زۆر دڵخۆشم."

'نەورۆزی ئەمساڵ واتایەکی تایبەتی خۆی هەیە'

مەنسووری لە درێژەی قسەکانیدا ئاماژەی بە مافی مرۆڤ کرد لە دیاریکردنی چارەنووسی خۆیان و ئاماژەی بەوەدا کە ئەمە بۆ گەلی کوردیش یەکسانە و وتی: "گرنگە بە گەل نیشان بدەین کە چی بۆ کۆمەڵگەی کوردی گرنگە. بۆیە ئامادەبوونی زۆر کەس لەم جەژنەدا ئەمڕۆ بۆ ناساندنی کولتوری کوردی مایەی دڵخۆشییە. دیسان لە کۆتایی قسەکانیدا جەژنی نەورۆزی لە هەمووان پیرۆز کرد و هیوای نەورۆزێکی پڕ لە سەرکەتنی بۆ گەل خواست.

'هیوا و هێز بۆ جیهان گرنگی خۆی هەیە'

هەروەها ئارمەند زورن، ئەندام پەرلەمانی فیدراڵی ئەڵمانیا، ڕایگەیاند: "نەورۆز جەژنی هیوا، ڕووناکی، یەكێتی و یەکگرتوویییە، بۆیە من زۆر دڵخۆشم کە ئەمڕۆ بە شێوەیەکی ئاشتیانە لێرە نەورۆز پیرۆز دەکەم." هەروەها بانگەوازەکەی ڕێبەر ئاپۆی بە "هەنگاوێکی بوێرانە" وەسف کرد و وتی: "پەیامێکی وەها کە من ئامادەم بۆ ئاشتی، ئامادەم بەشێک بم لە چارەسەری کە هەمووان بتوانن بە شێوەیەکی ئاشتیانە و ئاسایش پێکەوە بژین، ئەمە هەنگاوێکی زۆر بەهێزە، بۆیە ئەرکی حکومەتی تورکیایە ئەم هەنگاوە قبوڵ بکات و هەوڵبدات بە هەنگاونانی ئاشتی بەرقەرار بکات."

زورن لە میانەی قسەکانیدا وتی: "ئەندامێتی تورکیا لە یەکێتی ئەورووپا بابەتێکە کە ماوەیەکی زۆرە گفتوگۆی لەسەر دەکرێت. یەکێتی ئەورووپا پێوەری خۆی هەیە. سەروەری یاسایی، پێوەرە ئابوورییەکان و دیموکراسی بەشێکن لەو پێوەرانە. ئێمە بەردەوام بۆ هەڵسەنگاندنی ئەو بابەتانە ئامادەین."

زۆرن سەبارەت بە ڕۆڵ و ئەرکی ئەڵمانیا لە پرۆسەی ئاشتی و گفتوگۆدا وتی: "ئەڵمانیا هەمیشە نێوەندگیرییەکی باش بووە لە جیهاندا، بۆیە ئەڵمانیا دەتوانێت لەم بارەوە نێوەندگیریەکی باش بگێرێت، ئێمەش دەتوانین لەم بابەتەدا بەشدار بین و ڕەوڵی پێویست بگێڕین."

زورن لە کۆتایی قسەکانیدا باسی لەوەشکرد کە ئەگەر لایەنەکانی کورد و تورک داوای نێوەندگیری لە وڵاتانی دەرەوە بکەن، ئەڵمانیا دەتوانێت لەم بارەوە ڕۆڵ بگێڕێت.

زۆرن لە بانگەوازییەکی بۆ حکومەتی تورکیا وتی: "بۆ درێژەدان بەم پرۆسەیە، پێویستە حکومەتی تورکیاش ئیرادەیەکی جددی نیشان بدات. دانوستانەکان پێویستە کراوە بن و هەوڵبدرێت ئەنجامی ئەرێنی بکەوێتەوە هەتا لە کۆتاییدا ئارامی و ئاسایش بۆ هەمووان بەدی بهێنێت. ئێستا هەنگاوی یەکەم نراوە، بۆیە دەبێت لایەنی بەرامبەریش هەنگاو بنێت."

ئاماژەی بەوەشکرد کە گەلی کورد هەمیشە بوێرانە و بەهێز تێکۆشانی کردووە و وتی: "بەم شێوەیە بەردەوام بن. هەوڵدانەکانتان بۆ بەرگریکردن لە دۆزی ڕەوای خۆتان، یەکێتی و یەکگرتوویی ئێوە لەگەڵ یەکتر و لایەنە جیاوازەکان هەمیشە بۆ ئێمە سەرچاوەی ئیلهام بووە. بۆیە هیوادارم بەم شێوەیە بەردەوام بن."