ئۆزگور سەڤیم کە لە زیندانی ئاسایشی باڵای کرشەهیر ڕاگیراوە، لە ١ی نیسان بە تەلەفۆن لەگەڵ دایکی بەهیە سەڤیم قسەی کردووە، لە بارەی پێشێلکارییەکانی مافەکانی زیندانیانەوە زانیاری ڕاگەیاندووە و وتوویەتی؛ بەهۆی ناڕەزایەتییەکانەوە ڕووبەڕووی لێکۆڵینەوە بوونەتەوە و لەئەنجامی لێکۆڵینەوەکاندا سزای ٤ مانگ دیدار لەگەڵ بنەماڵە و ٢٠مانگ قەدەغەکردنی دیداریان بەسەردا سەپێنراوە.

بەهیە سەڤیم، کە بە تەلەفۆن قسەی لەگەڵ کوڕەکەی کردووە ڕایگەیاند: "لەبەر ئەوەی خواردنی زیندان خراپ بووە، زیندانیان بەڕێوەبەری زیندانیان ئیدانەکردووە و بەو هۆیەشەوە سزای ٤ مانگ سەردانی بنەماڵە و ٢٠مانگ قەدەغەکردنی دیداریان بەسەردا سەپاندووە."

بەهیە سەڤیم ئەوەشی ڕایگەیاند، سەرەڕای قەدەغە کردنەکان، قسەکردن بە زمانی تورکی بۆ زیندانیان کراوەتە ئیجبار.

بەهیە سەڤیم "بانگەوازی ئاشتی و کۆمەڵگای دیموکراتیک"ی ڕێبەر ئاپۆی بە بیرهێنایەوە، وتی: "لەلایەک دەڵێن 'ئاشتی'، لەلایەکی دیکەشەوە درێژە بە سیاسەتی گۆشەگیری دەدەن. ئەمە ئاشتی نییە، بەڵکوو ئەمە سیاسەتی فریودان و چەوساندنەوەیە. بۆیە داوا لە هەموو دایکان دەکەم لە دژی ئەم نادادیە یەکگرتوو بن."