کریستینا کیتسۆس، سەرۆک شارەوانی جنێڤ، لە پارتی سۆسیالیست، کە لە خولی یەکەمی هەڵبژاردنی ئەنجومەنی شارەوانی جنێڤدا بوو بە یەکەم، ئامادەکاری بۆ خولی دووەم دەکات، خولی دووەمی هەڵبژاردنە ناوخۆییەکانی لە ١٣ی نیسان بەڕێوەدەچێت. پارتە چەپەکانی شارەکە لەژێر چەترێکی هاوبەشدا بەشداری هەڵبژاردن دەکەن.

کریستینا کیتسۆس، کاندیدی پارتی سۆسیالیست، سەرۆکی ئێستای شارەوانی جنێڤ کە وەک پاڵێوراو سەیر دەکرێت، لەسەر ئەو پرسە و چەندین پرسیاری دیکە لەگەڵ ئاژانسی هەواڵی فورات (ANF) قسەی کرد.

کریستینا کیتسۆس بە بیرهێنانەوەی ئەوەی کە جنێڤ شارێکی فرە کولتورییە و زیاتر لە ١٩٠نەتەوەی جیاواز لەوێ دەژین، لەم ماوەیەدا  بینەری پێچەوانەبوونەوەی هەرەمی دانیشتووان بووین و ئەگەر ئەم کۆمەڵگایە هێشتا کارامەیە، ئەوە لە سایەی کۆچبەرانەوەیە بۆ سویسرا و جنێڤ. ئاماژەی بە کێشەی کار کرد لە زۆرێک لە کەرتەکاندا بە تێپەڕبوونی تەمەنی هاوڵاتیان و وتی: "بۆیە ئێمە بەدیلێکی یەکلا کەرەوەمان نییە بۆ چارەسەری کێشەکان. یان ئێمە بە باشترین شێوە کۆچبەران قبوڵ دەکەین و بەشداریان دەکەین، یان سیاسەتی بنەماڵە دابڕێژینەوە. لەم وڵاتە کۆچبەران مافی تەواوەتیان لە دەنگداندا هەیە بۆیە وەک هەنگاوی یەکەم پێویستە ئەم پێکهاتانە ئاگادار بکەینەوە و پێیان بڵێین، 'ئێوە مافی دەنگدانتان هەیە و دەتوانن نوێنەرەکانی خۆتان هەڵبژێرن'. بۆ نموونه پێکهاتەی کوردی یەکێکه له پێکهاته چالاک و سیاسیەکان. بنەمای ئەمەش لە تێکۆشانی مێژوویی گەلی کوردەوە سەرچاوە دەگرێت. "بۆیە گەلی کوردیش دەتوانێ لە جنێڤ و ناوچەکانی دیکەی جیهان چالاکیە کۆمەڵایەتی و سیاسیەکانی بەڕێوە ببات."

کریستینا کیتسۆس ئاماژەی بەوەدا کە جنێڤ شارێکی جیهانییە و شوێنی واژۆکردنی ڕێککەوتننامە جیهانییەکانە و وتی: "ئێمە لە قۆناغێکداین کە هەمەچەشنی ڕووبەڕووی هێرش بووەتەوە، ڕێز لە مافە نێونەتەوەییەکان ناگیرێت و پێشێل دەکرێن. دیالۆگ یەکێکە لە پێوەرە بنەڕەتییەکانی مافی مرۆڤ، هاوکاری، ئازادی، دادپەروەری، و مافی چارەی خۆنووسینی گەلان، زۆر گرنگە، و دەبێ ئەم بابەتە بە دەنگی بەرز دەرببڕین. ئەمانە مافی چارەی خۆنووسینی گەلان مسۆگەر دەکەن. شارەوانی جنێڤ پێشتر بەدواداچوونی بە چەندین ڕەشنووسی تایبەت بە ڕووداوەکانی کوردستان کردووە کە لەلایەن ئەندامانی ئەنجومەنەکەمانەوە پێشکەش کراوە. ئامانجی سەرەکی بەدواداچوونەوەکان لەم بابەتەدا وروژاندنیەتی لەسەر ئاستی کانتۆن و فیدراڵی، چونکە پەیوەندییەکانی دەرەوەمان لە بنەڕەتدا لەم ئاستەدا دیاری دەکرێن. هەروەها له پارتی سۆسیالیست له ئاستی فیدراڵیدا هاوڕێی زۆرمان هەیه که له نزیکەوه له گەڵ پرسی کورددا پەیوەندییان هەیە."

'پشتیوانی لە دۆزی ڕەوای گەلی کورد دەکەم'

سەبارەت بە هەوڵ و داواکارییەکانی گەلی کورد لە جنێف بۆ ئازادیی ڕێبەر ئاپۆ، کریستینا کیتسوس ڕایگەیاند: "من خۆم بەشداری هەندێک لەو خۆپیشاندانانەم کردووە کە بە مەبەستی ئازادیی بەڕێز ئۆجالان بەڕێوەچووە. دەمهەوێت جەخت لەوە بکەمەوە کە من پشتیوانی لە دۆزی ڕەوای گەلی کورد دەکەم و دەبێت مافە بنەڕەتییەکانی بپارێزرێت ئێمە دەزانین کە ماوەیەکی زۆربوو هیچ زانیارییەک لەبارەی تەندروستی بەڕێز عەبدوڵا ئۆجالان و بارودۆخی زیندانەوە لەبەردەستدا نەبوو. هەروەها دەبینین کە بانگەوازەکانی بۆ ئاشتی و پێشنیارەکانی لە ئاستی نێونەتەوەییدا پشتگوێ دەخرێن و ئەم دۆخە بەساڵانە بەردەوامی هەیە. داواکاری ئازادیی و ڕێزگرتن لە مافە بنەڕەتیەکان بەردەوام دووبارە دەبنەوە. هەروەها دەبینین بزووتنەوەی گەنجانی نێونەتەوەیی لە جنێڤ بەم ئامانجەوە لە گۆڕەپانی نەتەوە یەکگرتووەکان کۆدەبنەوە. سەرەڕای هەموو ئەم هەوڵانە، دیسان دەسەڵاتداران بەردەوامن لە بڕیاردانی هەڵە و زۆرجار بڕیاری هەڕەمەکی دەدەن. سەرەرات ئەوەش، شەڕەکە هەر بەردەوامە. ئێمە وەک بەڕێوەبەرایەتی شارەوانی هەمیشە پشتگیری ئەم داواکاریانە دەکەین. بەڕێز ئۆجالان پێشتر داوای چارەسەرێکی دێموکراتیک و ئاشتیانەی بۆ پرسی کورد کردووە بەڵام هیچ وڵامێک نەدراوەتەوە و گۆڕانکارییەک لە هەڵوێستی حکومەتدا رووینەداوە، هەروەها نازانین وەڵامی دوایین بانگەوازییەکە دەدرێتەوە. عەقڵییەتی دەسەڵاتداری لە تورکیا کاریگەری نەرێنی لەسەر مافەکانی مرۆڤ و هەموو پارێزەرانی مافەکانی مرۆڤ بەتایبەت ژنان، ڕۆژنامەنووسان، ڕۆشنبیران، نووسەران هەیە. بێگومان هەرکەسێک پشتگیری لەم شەڕە بکات باجەکەی دەدات."

کریستینا کیتسوس لە کۆتاییدا سەبارەت بە خولی دووەمی هەڵبژاردنەکان گوتی: "خولی دووەمی هەڵبژاردنەکان لە ١٣ی نیسانی ٢٠٢٥بەڕێوە دەچێت. ئێمە وەک چوار کاندید لەگەڵ هاوکارانمان لە پارتی سۆسیالیست، جۆێل لە پارتی سەوز، ئەلفۆنسۆ گۆمێز و مارجۆری دی شاستونای لە هاوپەیمانیەتداین. بۆ ئێمە زۆر گرنگە کە هەژموونی چەپ لە ئیدارەی شارەوانی جنێڤدا رابگرین. بۆیە بەردەوامی و زۆرینەی هەژموونی چەپ بۆ ئێمە پرسێکی زۆر گرنگە.

ژنانی گەلی کورد بوونە وانە بۆ هەمووان

له کۆتاییدا دەمەوێت بڵێم که گەلی کورد بەرز دەنرخێنم و پشتیوانی خۆم بۆ گەلی کورد ڕادەگەیەنم، گەلی کورد بۆ مافی چارەی خۆنووسین، ئازادی و دادپەروەری هەوڵدان و بوێری زۆی نیشانداوە. هەروەها ژنانی کورد نیشانیاندا کە بوێری چییە و بوونە وانە بۆ هەر کەسێک، پێشتر لە چالاکیە جیاوازەکاندا بەردەوام وتوومە کە دەبێت عەبدوڵا ئۆجالان ئازاد بکرێت و چارەسەرێکی یەکسان و هەمیشەیی بۆ گەلی کورد دیاری بکرێت."