ئەمڕۆ، سەرۆککۆماری دەوڵەتی داگیرکەری تورک، ڕەجەب تەیب ئەردۆگان، ئامادەیی خۆی دەربڕی بۆ کۆبوونەوە لەگەڵ بەشار ئەسەد، بەڵام کشانەوەی هێزەکانی لە خاکی سوریا وەک پێشمەرجی کۆبوونەوەکان ڕەتکردەوە و بە مەرجێکی "قبووڵنەکراو" دایە قەڵەم.

پێش سەردانە سێ ڕۆژییەکەی بۆ سعودیە و قەتەر و ئیمارات، ئەردۆگان بە ڕۆژنامەوانانی ئیستەنبوڵی گوت: "تورکیا هەرگیز دەرگای دانەخستووە لەبەردەم گفتوگۆکان لەگەڵ حکومەتی سوری".

هەروەها گوتی "دەتوانین کۆبوونەوەی چوارقۆڵی ببەستین (لەگەڵ سوریا و ڕوسیا و ئێران)، من ئامادەم کۆبوونەوە لەگەڵ ئەسەد. گرنگ ڕێبازی ئەوانە بەرامبەرمان".

هەر لەم چوارچێوەیەدا، دوێنێ لە کۆنگرەیەکی هاوبەشی ڕۆژنامەوانی لەگەڵ سەرۆک وەزیرانی عێراق، ئەسەد ڕەخنەی لە تورکیا گرت و گوتی: "هەندێک دەوڵەتی دراوسێ ڕاستەوخۆ تێوەگلاون لە پشتیوانی تیرۆر، بە پاساوی پاوانخوازی بێت یان هۆکاری مەزهەبی پاشڤەڕۆ، هەروەها ئاڵنگاری گەورە بریتییە لە دزینی پشکی سوریا و عێراق لە ئاوی دیجلە و فورات، لەگەڵ ئەو برسێتی و تینوێتییەی لەم هەنگاوە کەوتۆتەوە".