ڕێکخراوەکانی ژنان لە ئەدەنە دژی دەستبەسەراگرتنی ئیرادە پێکهاتەی "ژنان بۆ دیموکراسی"یان دامەزراند. ژنان بەم بۆنەیەوە لەبەردەم بینای شارەوانی شاری مەزنی ئەدەنە کۆنگرەی ڕۆژنامەوانیان بەست، بە درووشمی "ژن، ژیان، ئازادی" و چەپڵەڕێزان وەڵامی گەمارۆی پۆلیسیان دایەوە.

"ڕێگە نادەین بە دەستبەسەراگرتن"

دەلال ئۆزبەی لەسەر ناوی پێکهاتەکە ڕاگەیاندراوی خوێندەوە، ئاماژەی بەوە کرد تاوانەکانی دژی ژنان بەبێ سزا تێدەپەڕن، گوتی: "ڕێگە نادەین ئەو مافانەی بە یاسا بەدەستمان هێناوە، دەستیان بەسەردا بگیرێت".

ئۆزبەی ڕایگەیاند قەیوم هاوکات کودەتایە دژی سیستەمی هاوسەرۆکایەتی، گوتی: "سیاسەتی بەڕێوەبردنی قەیوم کە دان بە ئیرادەی گەلی کورد نانێت، ژنان مەحکوم دەکات بە توندوتیژی جەستەیی و دەروونی و سیاسەتی دوژمنکارانەیان قبووڵ ناکەین. پێویستە ئەم دەسەڵاتەی ئیرادەی گەل دەستبەسەر دەکات، دەست لە دانانی قەیوم هەڵبگرێت. لێرەوە، دیسانەوە بانگەواز لە دەسەڵات و لایەنگرانی دەکەین، ڕێگە نادەین بەناوی قەیومەوە ئیرادەمان زەوت بکەن و دەسکەوتەکانمان لەناوببەن. بانگەواز لە هەموو ژنان دەکەین لەپێناو ماف و ژیانمان خۆیان ڕێکبخەن و تێبکۆشن".