کۆڵبەرێک بە تەقەی پاسەوانی سنووری عێراق کوژرا
هێزەکانی پاسەوانی سنووری عێراق لە سنووری هەورامان کۆڵبەرێکی تەمەن ٢٦ ساڵیان کوشت.
بەگوێرەی هەواڵێکی رۆژنیوز ئێوارەی دوێنێ یەکشەممە لە سنووری گوندی هانەی دن لە هەورامان کۆڵبەرێکی خەڵکی گوندی سەرگەت بە بە ناوی ئارام خەلیل تەمەن ٢٦ ساڵ بە تەقەی هێزەکانی پاسەوانی سنووری عێراق کوژراوە.
ئەو گەنجە کە لە رێگەی کۆڵبەریەوە بژێوی دابین دەکرد، فیشەک بەر سنگی کەوت و دوای گواستنەوەی بۆ نەخۆشخانە گیانی لەدەستدا.
لەو بارەوە بارزان عوسمان وتەبێژی پۆلیسی هەڵبجە رایگەیاند، تەرمی ئەو گەنجە رادەستی بنەماڵەکەی کراوەتەوە و رێکاری یاساییش بەرامبەر بەو کەسانە دەگیرێتەبەر کە تەقەیان کردووە.
لە سنوری هەورامان چەند مەرزێكی لاوەكی تێدایە، ڕۆژانە خەڵكی ناوچەكە كاری گواستنەوەی كاڵا و شتومەكی تێدا دەكەن، لەنێوان ڕۆژهەڵات و باشووری كوردستان، زۆرجاریش بەهۆی تەقەی پاسەوانی سنوور و پاسدارانی ئێرانەوە کۆڵبەران دەبنە قوربانی.
