کۆنگرەی نەتەوەیی کوردستان- کەنەکە و یەکێتی پەرلەمانتارانی کوردستان، ٢١ ئەم مانگە بە دروشمی "ڕاوێژ بۆ پەرەپێدانی دیالۆگی ناوخۆیی" کۆنفڕانسێک رێکدەخەن تا ڕێیەوە کۆتایی بەو بارگرژییە بهێنرێت کە لە باشوری کوردستان هاتووەتە ئاراوە.
لە بەردەوامی هەوڵەکان بۆ ڕێگرتن لە هەڵگیرسانی کورد بەکورد و کۆتاییهێنان بەو بارگرژییەی لەباشوری کوردستان هاتووەتە ئاراوە، کۆنگرەی نەتەوەیی کوردستان- کەنەکە و یەکێتی پەرلەمانتارانی کوردستان لە ڕاگەیەندراوێکدا بۆ ڕای گشتی کوردستان ئاشکرایان کردووە: ڕێککەوتی ٢٠٢٠/١١/٢١، بە دروشمی "ڕاوێژ بۆ پەرەپێدانی دیالۆگی ناوخۆیی"لە سەر تۆڕی زووم بەشێوازی ئۆنلاین کۆنفڕانسێک ڕێکدەخەن و بۆ بەشدریکردن تێیدا، بانگهێشتی سەرجەم پارت و لایەن و کەسایەتی و ڕاگەیاندنەکانی کوردستان دەکەن.
دەقی ڕەگەیاندنەکەی کەنەکە و یەکێتی پەرلەمانتارانی کوردستان:
لەسەر ئەو گرژیانەی لە باشووری کوردستان لە نێوان هێزە کوردستانییەکان هاتوونەتە ئاراوە و بە مەبەستی هەوڵدان بۆ کۆتاییهێنان پێیان، هەرەوەها بۆ زەمینەخۆشکردن بۆ دیالۆگ و چارەسەری ئاشتییانە، نوێنەرانی کۆنگرەی نەتەوەیی کوردستان-کەنەکە و یەکێتی پەرلەمانتارانی کوردستان، دوای زنجیرەیەک کۆبوونەوە، گەیشتنە ئەو بڕیارەی کە پێکەوە و لەو پێناوەدا دەست بە کارو تێکۆشان بکەن.
بە مەبەستی پەرەپێدانی دیلۆگ و ئاشتی و زیاتر ئاگادارکردنی ڕای گشتیی کوردستان لە دۆخەکە، هەردو لایەن بڕیارمان دا کۆنفرانسێکی بەرفراوان لە ژێر درووشمی "ڕاوێژ بۆ پەرەپێدانی دیالۆگی ناوخۆیی" رێکبخرێت. بۆ ئەو مەبەستە هەموو پارت و ڕێکخراوە کوردستانییەکان، کەسایەتی رۆشنبیر و سیاسیی سەربەخۆ، میدیاکار و هونەرمەندان بانگهێشتی کۆنفراسی ڕاوێژ ئەکرێن.
کۆنفرانسی راوێژ بۆ پەرەپێدانی دیالۆگی ناوخۆیی، رۆژی شەممە ڕێککەوتی ٢٠٢٠/١١/٢١، لەسەر تۆڕی زووم بەڕێوەئەچێت. لەو بارەیەوە کارنامەو ئاگاداریی زیاتر لە بانگهێشتنامەکەدا بۆ بەشداربووان ئەنێردرێت.
ئێمە دڵنیاین ئەو کۆنفرانسە خزمەت بە پرۆسەی ئاشتی و دیالۆگ ئەکات.
هـ.هـ
