بە بۆنەی چلەی تیرۆرکردنی وڵاتپارێزی کورد محەمەد زەکی چەلەبی، لەشاری سلێمانی مەراسیمێکی یادکردنەوە بەڕێوەچوو و شیرینی دابەشکرا. لە مەراسیمەکەدا خانەوادەی زەکی چەلەبی، کەسایەتییە سیاسییەکان، پیاوانی ئاینی، ڕۆژنامەنووسان و کەسوکاری شەهیدان ئامادەبوون و مەراسیمەکە بە خولەکێک ڕێزگرتن لە شەهیدان دەستیپێکرد.

لە مەراسیمەکەدا ئیسنان ستێرک هاوڕێی چەلەبی وتی: "با حکومەتی هەرێم و سلێمانی باش بزانن، ئێمە ئەوەندە لاواز نین، کە ببینە بەرخی بەر چەقۆی دوژمن. بیر و باوەڕی ئێمە تێکۆشانی ئێمەیە، ئێمە مافەکانی خۆمان دەوێت. ئێمە زوڵم لە کەس ناکەین و کەس ناچەوسێنین و ستەمیش لە هیچ کەسێک قبوڵ ناکەین. تۆڵەی زۆربەی شەهیدانمان کرایەوە، بە دڵنیاییەوە تۆڵەی شەهید زەکی چەلەبیش دەکرێتەوە. داواکارین ئیدارەی سلێمانی خۆی کەڕ و لاڵ نەکات، بکوژ و بکوژان و خائینەکان دەستنیشان بکات، ئەو هەموو هاوڕێیەمان شەهید دەکرێن و چیتر ئارامیمان نەماوە".

هەروەها مەلا نادر لە مەراسیمەکەدا وتی: "شەهید زەکی چەلەبی کەسێکی زیرەک و بەهرەمەند بوو. سەری بۆ هیچ وڵاتێکی دەسەڵاتدار دانەنەواند و خزمەتکاریی قەبووڵ نەکرد".

لە درێژەی مەراسیمەکەدا نورتەن چەلەبی هاوژینی محەممەد زەکی چەلەبی وتی: "دەزانم زەکی گوێی لێمە. من لەگەڵ زەکی چاوم کرایەوە، لەگەڵ ئەو وڵات و کولتووری خۆم ناسی. من زۆر خۆشحاڵم زەکی باوکی منداڵەکانمە".

نورتەن چەلەبی ڕاشیگەیاند، محەممەد تەنها بۆ ئەو هاوژین نەبوو، بەڵکو لە هەمان کاتدا بۆ ئەو دایک و باوک و وڵاتیش بوو.

دوای وتەکان فیلمێک لەبارەی ژیانی محەممەد زەکی چەلەبی-یەوە نمایشکرا.

مەراسیمەکە بە درووشمی "شەهید نامرن" کۆتایی پێهات.

ژ.ت