کۆمیتەی پەیوەندییەکانی دەرەوەی پەکەکە رایگەیاند، پەدەکە و بنەماڵەی بارزانی خیانەتی خۆیان گەیاندووەتە دۆخێکی بەرزتر و ئەو هێزانەی هاوکاری دەوڵەتی تورک ناکەن دەکەنە ئامانج. پەکەکە لە دژی هاوکارییەکانی پەدەکە لەگەڵ دەوڵەتی تورک بانگەوازێکی راگەیاند.
راگەیەندراوەکەی کۆمیتەی پەیوەندییەکانی دەرەوەی پەکەکە بەم جۆرەیە:
بزوتنەوە گەورەکان و رێبەرە بە پرەنسیپەکان، بە شێوەی ژیان و تێکۆشانی خۆیان، بزوتنەوە بچوک و سەرکردە بچوکەکانیش بە بێ پرەنسیپی و خیانەتەکانیان دەچنە مێژووەوە.
لە شەڕی ئازادیدا کە گەریلاکانی ئازادیی کوردستان بە گیانبازی و قارەمانێتی بەڕێوەی دەبەن، دەسەڵاتی پەدەکە لە دژی گەریلا لەگەڵ سوپای تورک و میت کاردەکەن. لە هەولێر ناوەندی هەماهەنگی هاوبەش لە نێوان سوپای تورک و پێشمەرگەکان؛ لە نێوان میت و پاراستنیش دا ژووری هاوبەشیکردنی زانیاری هەواڵگری دامەزراوە. وەزیری دەرەوەی دەوڵەتی تورک هاکان فیدان زۆر جار لە بەدەم کامێرادا ئەو هاوکارییەی ئاشکراکردووە. لە ماڵپەڕەکانی سەرۆکایەتی فەرماندەیی گشتیی و وەزارەتی دەرەوەی تورکدا نەخشەی بنکە و بارەگا سەربازیەکانی تورک کە بە هاوکاری پەدەکە دروستکراون بە ئاشکرا بڵاوکراوەتەوە.
بەڕێوەبەرایەتی پەدەکە و بنەماڵەی بارزانی خیانەتیان گەیاندووەتە ئاستێکی بەرزتر
پەدەکە و بنەماڵەی بارزانی باش دەزانن کە هاوکاری لەگەڵ دەوڵەتی تورک، لەگەڵ سوپای تورک و میت بەواتای هاوکاری لەگەڵ دوژمنە، لەناو گەلیشدا ئەوە بە وتنی خیانەت پێناسە دەکرێت. بۆ ئەوەی بتوانێت لەو پەیوەندییە شووم و نەفرەتلێکراوەیدا بەتەنیا نەبێت، هاوکاریکردن لەگەڵ دەوڵەتی تورک لەسەر حکومەتی بەغدا و بەڕێوەبەرایەتی یەنەکەش دەسەپێنێت، بۆ ئەوەش لەگەڵ دەسەڵاتداری ئەردۆغان دیپلۆماسی هاوبەش بەڕێوەدەبات. سەردانەکانی هاکان فیدان، ئیبراهیم کاڵن و تەیب ئەردۆغان بۆ بەغدا و هەولێر بەشێک لەو کارەن.
بەڕێوەبەرایەتی پەدەکە و بنەماڵەی بارزانی لە بەرامبەر داگیرکەری دەوڵەتی تورک و هێرشەکانی بۆ سەر باشووری کوردستان هەڵوێستێکی بچووکیش نیشان نادەن و بە وشەیەکیش دەرنابڕن، ئەو خیانەتەی کە کردوویەتیە پیشە، گەیاندویەتیە ئاستێکی بەرزتر. ئەو هێزانەی وەک ئەو خیانەت ناکەن و نابنە داردەست و هاوکاری دەوڵەتی تورک، دەکاتە ئامانجی تورکیا.
رۆژنامەی خەباتی پەدەکە لە ژمارەی ١٤ی ئایاری خۆیدا بە مانشێتی 'پەکەکە لە سلێمانی هێزی چەکدار دروست دەکات و دەیاننێرێتە قەندیل و رۆژئاوا' شاری سلێمانی و ئیدارەی شارەکەی کردووەتە ئامانجی دەوڵەتی تورک. پەدەکە بە بڵاوکردنەوەیەکی لەو جۆرە تورکیا هان دەدات هێرش بکاتە سەر سلێمانی. پەدەکە کە بەر لە ئێستا خیانەتی ٣١ی ئابی ١٩٩٦ی کرد و لەگەڵ تانکەکانی سەدام چووە ناو هەولێر، ئێستاش لە رێگەی دەوڵەتی تورکی داگیرکەرەوە هەڕەشە لە گەل و بەڕێوەبەری سلێمانی دەکات. پەدەکە، بنەماڵەی بارزانی و رۆژنامەی خەبات باش دەزانن کە نە رێکخستنێکی پەکەکە لە سلێمانی هەیە، نە هێزێکی سەربازی لەوێ هەیە. ئەمە درۆیەکی گەورەیە، بە مەبەست کراوە، درۆیەکی ئامانجدارە.
خیانەت لەبیر ناکرێت و لێپێچینەوەی لەگەڵ دەکرێت
باش و راستی و راستەقینە چییە؟
پەکەکە و گەریلاکانی ئازادیی کوردستان لە بەرامبەر هێرشەکانی دوژمن بۆ پاراستنی کوردستان هەموو کات و لە هەموو شوێنێک لە خزمەت کوردستان و مرۆڤایەتیدان.
وەک ساڵی ٢٠١٤، ئەو کاتەی چەتەکانی داعش هێرشیان کردە سەر هەولێر، کەرکوک، مەخمور و شەنگال، لەسەر بانگەوازی هاریکاری مەسعود بارزانی وەک رووبارێک لە چیاوە خرۆشان. مێژوو هەروەها خیانەتیش تۆمار دەکات. بەڵام دەبێت لەبیر نەکرێت کە کات بە سەر خیانەتدا تێپەڕ نابێت، خیانەت لە بیرناکرێت و زوو یان درەنگ لێپێچینەوەی لەگەڵ دەکرێت.
لە وەها کاتێکدا کە گەلی کورد لە چوار پارچەی کوردستان بە هەمان رۆح و هەستەوە تێکۆشانی ئازادی بەڕێوەدەبات، بەڕێوەبەرایەتی پەدەکە و بنەماڵەی بارزانی لەگەڵ دوژمنی گەلی کورد یەکدەگرن، خیانەتیان بۆ خۆیان کردووە بە پیشە و پێداگری لەسەر خیانەت دەکەن. بارزانییەکان کە لە هەڵبژاردنەکانی باکووری کوردستانیدا بۆ پشتگیری بەشدارییان لە هەڵمەتی بانگەشەی ئاکەپەدا کردبوو، پشتیوانیان لە بلۆکی ئاکەپە-مەهەپە-هوداپار کردبوو کە لە قڕکردنی کورداندا هاوبەشی تاوانن. لە بری ئەوەی لە رۆژئاوا لە تەنیشت هێزەکانی خۆپاراستن و خۆبەڕێوەبەریدا بوەستن، پشتیوانی لە دەوڵەتی تورک و چەتەکانی داعش دەکەن. لە باشووری کوردستان لە بری ئەوەی لەبەرامبەر هێرشە رۆژانە و داگیرکەرییەکانی دەوڵەتی تورک بوەستنەوە، بەرامبەر بە گەریلاکانی ئازادی دەوستنەوە کە لە دژی ئەو هێرشانە تێدەکۆشن.
دۆخی ئۆبژەکتیف، راستی سەربازی و سیاسی و راستەقینە ئەمەیە. هەربۆیە ئەو گرێیەی کە دەبێت سەرەتا بکرێتەوە ئەم گرێیەیە. نەبینینی ئەو هەڕەشە و خراپەکاریە، بە بچووک بینینی خیانەت و ئاسایکردنەوەی، مامەڵەی سست و لاواز لە بەرامبەر هاوکاری لەگەڵ دوژمن بە واتای پشتیوانییە لە خیانەتی پەدەکە و بارزانیەکان. هەربۆیە دەبێت کوردستانیانی وڵاتپاڕێز، حزب، رێکخراو، رۆشنبیران، نوسەران و هونەرمەندان لە بەرامبەر هاوکاری و داردەستەیی پەدەکە بۆ دەوڵەتی تورک و خیانەتەکە بوەستنەوە و نەهێڵن ئەو خیانەتە پەرەی پێبدرێت".
هـ . ب
