ماڵپەڕی سبەی نزیک لە بزووتنەوەى گۆڕان بڵاویکردەوە، قادرى حاجى عەلى، کەسایەتى دیار و سیاسەتمەدار و یەکێک لە دامەزرێنەرانى بزوتنەوەى گۆڕان بەهۆى توشبونى بە ڤایرۆسى کۆرۆنا،  کوچى دواییکرد.

هاوکات هەر ئەمڕۆ سێشەممە، بنەماڵەى قادرى حاجى عەلى رایانگەیاند: "بەداخ و پەژارەیەكی زۆرەوە هەواڵی مەرگی ناوەختی سەركردە و سوارچاكی شۆڕش و ورەو بەرەنگاربونەوەی نادادی بەڕێز (قادری حاجی عەلی)  رادەگەیەنین".

بنەماڵەکەی راشیانگەیاندووە، ئەمڕۆ ( 2020/11/9 ) دوای ململانێیەكی زۆر لەگەڵ نەخۆشی كۆرۆنا گیانی لەدەستدا.

قادر حاجی عەلی ساڵی 1955 لە سلێمانی لەدایکبووە.  کۆلێژی جیۆلۆجی تەواوکردووە و ساڵی 1980 چووەتە شاخ و بووەتە پێشمەرگە.

قادری حاجی عەلی  لە تەمەنی 28 ساڵی بووەتە ئەندامی سەرکردایەتی کۆمەڵەی رەنجەدەرانی کوردستان و ساڵی 1994 دەزگای زانیاریی یەکێتی دامەزراندووە و پۆستەکانی ئەندامی سەرکردایەتی و مەکتەبی سیاسیی یەکێتیی هەبووە.

هەروەها لە ساڵانی  1998 بۆ 2000 کارگێڕی مەکتەبی سیاسیی یەکێتی بووە و دوای دەستهەڵگرتن لەکاری سیاسی لە ریزەکانی یەکێتیی نیشتمانیی کوردستاندا لە ساڵی 2009 لەگەڵ کۆمەڵێک هاوڕێیدا بزووتنەوەی گۆڕانیان دامەزراند.

دوای کۆچی دوایی نەوشیروان مستەفا لە بەڕێوەبردن و ئەدائی بزووتنەوەی گۆڕان نیگەران بوو و بەو هۆیەوە لەو بزووتنەوەیەش خۆی دوورخستەوە.

ژ.ت