ژەناو جەهانی بۆنەو ٨و ئاداریۆ مجېیارە مېڎانەکا و ئی ڕووەیە مبارەک مکەرا، بۊنەو ئی ڕووەیۆ ژەنا کانتۆنو فوراتی پەی ئاژانسوو هەواڵوو فوراتی (ANF)ی قسێشا کەرڎۍ.

'چنی ڕابەر ئاپۆی ژەنی سەرجەنۆ ژیۋێوە'

کوردیناسیۆنو ستارو قینەی سەر بە کۆبانێ سوعاد شێخ دەمیرە ئی ڕووەشە جە تەمامو جەهانی پیرۆز کەرڎ و واتش: "ڕابەر ئاپۆ بە تایبەت پەی ژەنا ڕوێوە تازە و ژیوایێوە تاریخیا. ٥ هەزار ساڵۍ ژەنی کۆیلۍ بۍ، بە بەرکۊتەی ڕابەر ئاپۆی گرڎ چێوۍ فاڕیا و ژەنی جە گرڎ بوارێنە یاگێشا گێرتە. چڼین شۆڕشگێڵنۍ ژەنی جە نمونەو بێریتانۍ، زیلانۍ، سارۍ بە سەرمەشقی ۋێشا جە ۋەرا ۋەرو ئەرەگیرا کوردەسانینە مڎرامانشا کەرڎ ".

'ئامانجو ژەنا، ئازاڎیی بەڎەنی ڕابەر ئاپۆیا'

سوعاد شێخ دەمیرە واتیچش: "جە گرڎ وەختۍ زیاتەر پەنەوازما بە مڎرامانی هەن، پېسە ژەنا ئیتر تەنیا یەک ئامانجما هەن، ئاڎیچ ئازاڎیی بەڎەنی ڕابەر ئاپۆیا. پەی ئێمە ڕابەر ئاپۆ تاریخێوە تازەش دەسپنەکەرڎ. پېسە ژەنا کوردی ئەرەپڕمێنە".

'تاریخ بە دەسو ژەنۍ منویسیۆوە'

هامسەرۆکۊو پەیەدەی جە کانتۆنو فوراتی بێریڤان ئیسماعیلە واتش: "ئی ڕووەیە جە ڕابەر ئاپۆی و تەمامو جەنگەوانا جە سردەو قەرەقۆزاقی و تشرینینە پیرۆز مکەرمۍ. ئا نێرگزەی جە ئیمراڵیوە پەیما ئاما فرە قیمەتدارا. پېسە ژەنا قەول مڎەیمۍ سەرو هێڵۊو ڕابەرەکەیماوە بیمۍ و مڎرامان بکەرمۍ. پېسە ژەنا بیمۍ بە یاگۍ چارەسەری، تاریخ جارێوەتەر بە دەسو ژەنا منویسیۆوە".

ڕاوەبەرەو مێڎانوو گلېرگەو کانتۆنو فوراتی هێڤین محمود ئیسماعیلە ئی ڕووەشە پیرۆز کەرد و واتش: "ئێساڵ ٨و ئاداری جیاوازا، ڕابەرەکەما سڵامش پەی تەمامو ژەنا کیاست. ئا ژەنۍ پېسە کۆیلەی تەماشەش کریۍ، ئارۆ ڕاوەبەری پەی ئەوەکۊشای مکەرۆ و سەرمەشقیش مکەرۆ. پېسە ژەنا تا ڕابەر ئاپۆ ئازاڎ نەبۆ ئێمەیچ ئازاڎۍ نمەبیمۍ. پەنەوازا چی ڕووەنە ئازاڎیی بەڎەنی ڕابەر ئاپۆی مسۆگەر بکەرمۍ".