گەنجانی کەرکووک لە کۆنفرانسێکى رۆژنامەنووسیدا راگەیاندراوێکیان بۆ ئیدانەکردنى بڕیاری داخستنى بارەگاکانى تەڤگەری ئازادی خوێندەوە و رایدەگەیەنن، ئەو بڕیارە، بڕیاری وڵاتانی دەرەکییە و حکومەتی هەرێمی کوردستان بەردەوامە لە جێبەجێکردنی ئەجندای سیاسیی ولاتانی دەرەکی کە دوایین بڕیاریان بڕیاری داخستنی بارەگاکانی تەڤگەری ئازادی بوو.

نافدار حسێن بە نوێنەرایەتیى گەنجانى کەرکووک راگەیاندراوەکەى خوێندەوە و رایگەیاند "ئیدانەی ئەم کارە دەکەین کە حکومەتی هەرێمی کوردستان بە بیانوی نەبوونی مۆلەتی فەرمی هەستاوە بە داخستنی بارەگاکانی تەفگەری ئازادی و قەدەغەکردنی چالاکییەکانیان، بەڵام تەڤگەری ئازادی لە حکومەتی عێراق مۆلەتی فەرمیان هەیە و رێگە پێدراوە لە هەموو عێراق دا کار بکەن.

راشیگەیاند "بەڵام حکومەتی عێراق کار بەم بڕیارە ناکات و ئەم بڕیارە لەلایەن حکومەتی تورکیاوە دراوە و ئەمەش بۆ لاوازی حکومەتی هەرێمی کوردستان دەگەڕێتەوە. ئەم جۆرە بڕیارانە خزمەت بە پرسی نەتەوەیی ناکەن. ئەم بڕیارە ئامانجی ئەوەیە خەتی خیانەت فراوانتر بکات و پێویستە یەکێتیی نیشتمانیی کوردستان هەستیارانە لەگەڵ ئەم بابەتە مامەڵە بکات و لە خەتی نەتەوەیی لانەدات و نەکەوێتە ژێر فشاری دەولەتی تورکیا و لە رێبازی مام جەلال لانەدات".

ئاماژەیان بەوشکرد "ئێمەش وەکو گەنجانی کەرکوک ئەو بڕیارە بە بریارێکی سیاسی و نائەخلاقی لە قەلەم دەدەین بە توندی ئیدانە و سەرکۆنەی ئەو بریارە دەدەکەین. لە کۆتاییدا داوا دەکەین لە هەموو لایەن سیاسییەکان و رۆشنبیری و نووسەر و تەواوی چین تۆژەکانی کۆمەلگا ئیدانەی ئەم ئەم بڕیارە بکەن و ناڕەزایی دەرببڕن".

ر.م