لێکۆڵەرانی شوێنەوارناسی ڕایانگەیاند، لە هەرێمی بارانکای باکووری پیرۆ شارێکی دێرینیان بەناوی 'پێنیکۆ' دۆزیوەتەوە و ئاماژەیان بەوە کرد، مێژووی شارەکە دەگەڕێتەوە بۆ نزیکەی ٣٥٠٠ ساڵ.

بەگوێرەی بی بی سی، شارەکە لەنێوان ساڵانی ١٨٠٠ بۆ ١٥٠٠ـی پێش زاییندا یاخود سەردەمی دەرکەوتنی شارستانییەتە سەرەتاییەکان لە ڕۆژهەڵاتی ناوەڕاست و ئاسیا، دروستکراوە.

ئەو شارە مێژووییە، نزیکەی ٢٠٠ کیلۆمەتر لە باکووری لیمای پایتەختی پیرۆوە دوورە و ٦٠٠ مەتر لە ئاستی ڕووی دەریاوە بەرزە.

ئاماژە بەوە کراوە، لەئەنجامی لێکۆڵینەوەکاندا کە هەشت ساڵ بەردەوامبوون، پەرستگای ئایینی و خانووی نیشتەجێبوون، لەنێویاندا ١٨ هەیکەلی خانوو دۆزراونەتەوە. هەروەها لە خانووەکاندا پەیکەری قوڕین لە شێوەی مرۆڤ و ئاژەڵ، ملوانکەی دروستکراو لە مرواری و پێستی ئاژەڵیش دۆزراونەتەوە.

شاری پەنیکۆ کە لە نزیکی شوێنی شارستانیی کاراڵە، یەکێکە لە کۆنترین شارستانییەتە ناسراوەکانی ئەمریکا. ئەم شارە نزیکەی پێنج هەزار ساڵ لەمەوبەر لە دۆڵی سویپ دروستکراوە.