ڕابەر ئاپۆ کە ٢٦ساڵێن ئینا ئەشکەنجە خانەو ئیمراڵیینە و جە گۆشەگیریێ نامرۆڤانەنە زینانی کریان، دماو ٤٣ مانگا چنی بنەیانەکەیش دیڎارش ئەنجامدا. ڕابەر ئاپۆ کە  ٢٣ۍ ئۆکتۆبەرینە دیڎارش چنی برازاکەیش عومەر ئۆجالان ئەنجامدا، باسش چانەیە کەرد کە گۆشەگیری هەڵای بەردەواما و سەبارەت بە مشتومڕەکا سەرو پەرسو کوردی واتش، "ئەگەر هەلومەرج بڕەخسیۆنە، قوەو تیۆری و پراتیکیم هەن تا پرۆسەکەی جە زەمینە و بوارو جەنگینە فاڕووە پەی بواری یاسایی و سیاسی". دۆڵەتو تورکی دماو ئا دیڎارەیە، راسەوخۆ سزاو دیسپلینیش پەی ڕابەر ئاپۆی بڕیۆ.

سەبارەت پا بابەتەیە محەمەد ئەمین نەعیمی هامسەرۆکو دەسوەڵێوستەی پاڕێزنەرا سوریایی پەی داکۆکی جە ڕابەر عەبدوڵا ئۆجالانی قسێش پەی ئاژانسەکەیما کەردۍ.

'هەڵمەتەی میاننەتەوەییە جەهانەنە دەنگشدانۆ'

محەمەد ئەمین نەعمی واتش، "ماوێ فرە بێ حیچ هەواڵ و زانیاریێ جەبارەو ڕابەر ئاپۆیۆ وەردەس نەبێ. ٢٣ۍ ئۆکتۆبەری جە زینانو دوورگەو ئیمراڵینە ڕابەر عەبدوڵا ئۆجالان دیڎارێش چنی بنەیانەکەیش ئەنجامدا. پەیامەکەشەنە ئەرەیاوناش، کە گۆشەگیری سەرو ئاڎی بەردەواما. دماو دیڎارەکەی راسەوخۆ سزاو دیسپلینی تازەی جە دژو ڕابەر عەبدوڵا ئۆجالانی بڕیاوە. یاساکێ دۆڵەتو تورکی ئەرەگیری ئینێ دژو مافەکا مرۊڤینە. هەڵمەتەو 'ئازادیی پەی عەبدوڵا ئۆجالانی، چارەسەری سیاسی پەی پەرسو کوردی' جەهانەنە دەنگش داوە. کاتێ دۆڵەتو تورکی ئەرەگیری ویناش کە وردە وردە ئاڎیچ گنۆ چێرو کاریگەریی هەڵمەتەکێوە، کەرەگش بێ هێواشە و لاوازەش بکەرۆوە. بەڵام ئا ئاواتشە ناما دی".

' وەرا وەرو مافەکا ڕابەر ئاپۆینە چەمێ وێشا وستێنێرە'

محەمەد ئەمین نەعیمی ویرش وستیمێ دۆڵەتو تورکی ئەرەگیری مامەڵێوە نامرۆڤانە و دوور جە گرد بنەما یاساییەکا پەیڕەو مکەرۆ و ئانەش وسڕووە، حیچ یاسا و دەستورێنە نییا کە زینانیێ ٢٦ ساڵێ جە زینانە مەنۆوە و واتش: " ئامانجو دۆڵەتو تورکی ئەرەگیری چا رێبازە چەپەڵانە ئانەن کە مافو هیوای پڕچنۆنە. گرڎو چێوەکا وەرو چەما جەهانینە رووەمڎا و گردما مزانمێنە کە دۆڵەتو تورکی جە دژو یاسا و رێساکا مافناسی هەرمانە مکەرا. بەپاو گردو یاسا میانەتەوەییەکا ڕابەر ئاپۆ مافش هەن، بەڵام گرد چەمێشا سەرو زەوتکەردەی مافەکارە وستێنێرە و بێدەنگێ بیێنێ. جە دماینە گەرەکما واچو کە ڕابەر عەبدوڵا ئۆجالان، بە هەرەکەت و ئیراڎەو گەلی ئاشتیوازی ئازاد بۆنە".