بە سەرمەشقایەتیی تەژەئای، چوارچوەو هەڵمەتەو"ئازادیی پەی عەبدوڵا ئۆجالانی، چارەسەری سیاسی پەی پەرسەو کوردی"، چالاکیی وانایوە کریا. چالاکیی وانایوە جە باخچەو بارەگاو پارتوو یەکسانی و دیموکراسیی گەلا شاروو وانینە کریا. فرەو کەسا چالاکییەکەنە بەشدارییشا کەرد.

هاموەخت چەنی دەسپەنەکەردەی چالاکییەکەی، ئی نویسیایێ پێسەو دروشمێوە بە لقوپۆو درەختەکاوە ورواسیابێ. "ئازادیی بە وێپەروەردەکەردەیوە بە دەس پنە مکەرۆ"، "دمایی بە گۆشەگیری باردێ"، " پەی مسۆگەرکەردەی ئاشتی، پێویس بە هەنگامەی یارایانێن " و "ئێمە بە هومێدوو ئانەیوە مژیومێ کە شۆرشش پەی مکەرمێ نەک بە موعجیزە".

پەرلەمانتارەو دەم پارتیی وانی گوڵجان کاچماز سایگیتە، چالاکییەکەنە قسێش کەردێ و واتشا، دۆخی بێ زانیاریی ڕەها دژوو ڕابەروو گەلوو کوردی عەبدوڵا ئۆجالانی درێژە پەنە مدانێ.

کاچماز درێژەو قسەکاشنە واتش: "ئێمە پەی پارێزنای ویرۆکەکاو بەڕێز عەبدوڵا ئۆجالانی گردوو بوارەکانە درێژە بە کۆشیای یاسایی وێما مدەیمێ و پەی ئازادیی جەسەیی بەڕێز عەبدوڵا ئۆجالانی هەم جە حەرچوار پارچەو کوردستانینە و هەم سەرانسەروو جیهانینە درێژە بە چالاکیی وانایوەی ویرۆکەکاش مدەیمێ. چا چوارچوەنە ئارۆ پێوە ویرۆکەردەیەکاش موانمێوە و باسسا سەر مکەرمێ."

دمایی جە نویستەیەکاو عەبدوڵڵا ئۆجەلانینە، "ژیوای ئینسانەکا و یاواینەی جە حەقیقەتی پەی ئینسانە وەڵێکەوتەکا موعجیزەن" ونیاوە.

میانەو چالاکییەکەینە بەردەوام دروشموو "بژیوۆ سەرۆک ئاپۆ"، "بژیوۆ مدرامانوو زیندانا" و "ژەنی، ژیوای، ئازادی"ی بەرزێ کریێوە.