مانگەو نیسانیوە دەسەڵاتداراو ئێرانی ڕاوشۆنی تازە و تندتەرشا پەی سەپنای “حیجابی بە زۆری "سەروو ژەنارە گێرتەنرە وەر، ڕێکوزیاو چەنەویەردەی میاننەتەوەییچ ئانە ڕووە مدۆ بە "جەنگ دژوو ەنا"ش مشناسنۆ.

١٣ـو نیسانینە دەسەڵاتدارێ پلانێوی تازێشا بە نامێ "پلانەو نوور"یوە ئەرەیاونا پەی ڕووەبەڕووبییەیوە ئا کەسا "حجابی بەزۆر" ڕەت مکەراوە و فرەو دامودەزگا و وەزارەتەکانە بەیاگەیاونای پلانەکێنە بەشدارێنێ، جەنی پۆلیسی و دەسەڵاتی دادوەری بۆ ئەو مەبەسیچە بە جلوبەرگی مەدەنییوە ملانە دلێ خەڵکی.

چا بارەوە ڕێکوزیاو چەنەویەردەی میاننەتەوەیی ڕاپۆرتێوەنە ئاماژەش بەزیادبییەی فرەو تندوتیژیی پۆلیسی دژوو ژەناو ئێرانی کەردەن و پەشتڕاسش کەردەنۆ، کە ڕاوشۆنەکاو پۆلیسوو ئەخلاقی ئێراننە ڕاستەوخۆ دماو قسەکاو عەلی خامنەیی و جەختکەردەیوەش سەروو پێویسیی پابەندبییەی ژەنا ئاما ئاراوە.

باسیچ کریان، زیادبییەی تندوتیژییەکا و دەسبەسەرکەدەی ژەنا و کناچا، کە حیجابی بەزۆر و ڕاوشۆنە تازەکا ڕەت مکەرانێوە، هاموەختا چنی زیادبییەی پۆلیسی و کەسە ئەمنییا شار و جادەکانە.

 ڕێکوزیاو چنەویەردەی میاننەتەوەیی ڕاپۆرتەکێشنە ئاماژەش کەردەن: ئا ژەنێ گیریا تووشوو دایوەنەی، تندوتیژیی سێکسی، ئەشکەنجەدای بە کارەبا و چندین جۆرێ تەرێ پاشێلکاری مافەکاو ئینسانی باوە.  هاموەخت، پەیامێوەش ئاڕاسەو لایەنە میاننەتەوەیی و دلێیەکا کەردەن و ئا ڕاوشۆنێشە بە "پاشێلکاریێوە ئاشکراو مافەکاو ئینسانی"پێناسە کەردەن و داوا مکەرۆ، کە فشار بوزیۆ سەروو دەوڵەتوو ئێرانی پەی دماییئاردەی پا مامەڵەیە.