بە پاو هەواڵێوە ئاژانسوو مێزۆپۆتامیای پارێزنەرا نوسینگەو یاسایی سەڎەی سەبارەت بە رابەروو گەلوو کوردی عەبدوڵا ئۆجالانی و موەکیلە گۆشەگیرکریایەکا تەریشا جە ئیمراڵی؛ عومەر خەیری کۆنار، وەیسی ئاکتاش و حامیلی یەڵدرمی جە ١٧و ئایارینە داواکاری 'چالاکی و هەنگامەی دەموودەسیشا' ئاراسەو ریپۆرتەری تایبەتی نەتەوەیۊگېرتەکا پەی ۋەرەنگاربیەیۆ ئەشکەنجەی کەردەن.

پارێزنەرا جە سەرداکەیشانە بە شێوەی هەمەلایەن هەلومەرجوو راگېرتەی موەکیلەکاشا جە ئیمراڵی و کێشەکاو ڕا گېرتەی ۋەروودەم و ئەرکە یاساییەکاشا جە چوارچێوەو رێساکا نەتەوەیۊگېرتەکانە وست ۋەروودەم و ریپۆرتەرا و ئەرەیاۋناشا، کە پێویسا داواکارییەکۍ دەموودەس پەسەڼۍ بکریا. پارێزنەرا سەرنجشا وست سەرو ئانەی کە پەی ناستەی ئا زەرەرا جە ئیمراڵینە قەرەبووکەردەیۊیشا محاڵا، مشۊم دەموودەس داواکارییەکەشا بەهەند هۊربگیریۆ و کارش سەر بکریۆ.

پارێزنەرا جە بارەو داواکاری کۆمیتەو مافەکا مرۆڤوو نەتەوەیۊگېرتەکا پەی گېرتەی ۋەروو رێکارەکا کە جە ٦و ئەیلولوو ٢٠٢٣ وزیابۍ ڕووە، ئەرەیاۋناشا کە قەراروو کۆمیتەو ئاماژەپنەکریای پاڵپەشت و پەشتیوانا پەی ئا ئاژەیە. ئا یاساشناسۍ جەختیچشا کەردۆ کە تورکیا تائیساتېچ ئا قەرارەو کۆمیتەکەو نەتەوەیۊگېرتەکاشا جابەجێ نەکەردەن.

بانگەواز پەی وستەی گەڕوو کۊششەکا

پارێزنەرا جە داواکارییەکەشانە ئانەشا وست ڕووە کە ۋەربەس پەی داواکاری پارێزنەرا (پەی ئەنجامدای دیڎار)ی سازمکریۆ و داواشا کەردە ریپۆرتەری نەتەوەیۊگېرتەکا پەی هۊرگېرتەی ئا ۋەربەس و ئاستەنگیا کۊششەکاش بوزۆ گەڕ.

دەقوو داواکارییەکا

پارێزنەرا حەرپاسە جە داواکارییەکەیشانە ئی داوېشا ئاراسەو ریپۆرتەری نەتەوەیۊگېرتەکا کەردۍ:

*ئی سەردای و داواکارییە دەموودەسین و مشۊم جە ماوېوە کەمەنە هۊرسەنگنایش پەی بکریۆ

*مشۊم دمایی بە ئاژەو پڕچنای پەیوەندییەکا بۍ و دەموودەس داوا جە حکومەتی بکریۆ ڕا بە سەردای پارێزنەرا و بنەیانەکا بڎریۆ.

*مشۊم سەردای دوورگەو ئیمراڵی بکریۆ و ئەوەکۊڵیای جە هەلومەرجوو ئاگەی بکریۆ و سەردانیکەرا بتاوا رووبەڕوو دیڎار ئەنجام بڎا.

*مشۊم ئەنجاموو سەرداکەی و تێبینییەکاو سەردانیکەرا بکریۆ بە گوزارشتە.

* مشۊم ئەنجاموو ئا زانیاریا بەڕەسمۍ جە کۆنفڕانسێوە رۆنامەوانینە ئاشکرا بکریا.