پلاتفۆرمو ڕێکوزیا دیموکراتیکەکا ١٧ و تشرینو دووەمینە جە چوار ڕیانو باسینینە جە ئێلح "گلێرۆبیەی ئازادی و دیموکراسی" ئەنجام مڎۆ. نەخشەڕاو گلێرۆبییەکەی جە لقو ئێلح پیترۆڵ ئیشینە ونریاوە.

هامسەرۆکو گردی کۆنگرەو جەمەو دیموکراتیکی (کەجەدە)ی بەردان ئۆزتورک سەرنجش وست سەرو نیایرەو قەیومی دژو ئیرادەو گەلو کوردی، واتش: "گەلو کوردی ئی فشارا قبووڵ نمەکەرۆ و گرد لێوەنە مدرامان مکەرۆ. یۆ چا شۆنایچە مڎرامانو ئێلحین کە گەلەکەما ڕوانە مڎرامان مکەرۆ. پەی بنیاڎنیای ئاشتیێوە شکۆداری دژو کۆیلایەتی، ١٧ و تشرینو دووەمی جە مێڎانو گلێرۆبیەکەینە بیمۍ ".

ئوچارە: پەی ئازادی ئۆجالانی بەشداری جە گلێرۆبییەکەینە مکەرمۍ

هامسەرۆکۆو گردینەو پارتو هەرێمە دیموکراتیکەکا (دەبەپەی) چیدەم کلیچگون ئوچارە ئەرەیاوناش بە نیایرەو قەیومی گەرەکشانە دەسکۆتەکا گەلوو کوردی ڕادەسو حزبوڵای بکەرا، بەڵام وەران وەرەنە مدرامانو گەلی دژو ئی هەوڵەیە بەردەواما، واتش: "فیکرو بەڕێز ئۆجالانی جە چنین مەنتیقا جەهانینە وەڵابییەنۆ. تاکە هیواو ئی وڵاتەیە، پێشنیارە چارەسەرییەکۍ ئێژا ئۆجالانینۍ. پەنەوازا دەسەڵات ئینەیە وینۆنە و هەنگامە بنیۆ. پەی ئازادی بەڕێز ئۆجالانی و ئاشتیێوە شکۆمەندی داوا جە گرد لێوە مکەرمێ مجیارە سەرو جاڎەکاو بەیا مێڎانەکە. مڎرامانما جە مېڎانەکانە نیشانە بڎەیمۍ. ئی دەسەڵاتە گەرەکشا پەرسەکا بە تنوتیژی چارەسەر بکەرۆ. دژو قەیومی گلێرۆبییەیۍ گۊرە ئەنجام بڎەیمۍ. بە سەرمەشقایەتی فەلسەفەو "ژەنی ژیوای ئازادی" گلێرۆبییەکەی ئەنجام مڎەیمێ".