شەنگالەنە ١٠ەمین ساڵوەگەڕوو قڕکەردەی ٣/٨/٢٠١٤ نزیک بۆوە و ڕۆژەڤوو سەرەکی گەلوو شەنگالی مژاروو گێڵایۆ کۆچبەران جە کامپەکا پانیشتوو کوردسانیوە و ئەرەمەرزنای ئیدارەی تازەو شەنگالین. ڕاوەبەروو خۆسەری شەنگالی ئینا حۊڵوو ئاسانکارینە پەی گێڵایۆ کۆچبەرا و ئیدارەی تازە بە پاو ویستەکا گەلی ئەرەمەرزنۆ. پەدەکەیچ پېسە هەمیشەی بە گرڎ جۆرێوە دژوو گێڵایۆ کۆچبەرا و ئیراڎەی تازەی مردۊوە.

دادگای فیدراڵی عێراقی سەبارەت بە گێڵایۆ کۆچبەرییە شەنگالییەکا دلۍ کەمپەکاو پانیشتوو کوردسانی، قەرارێوە گرنگش بەرکەرد. بە پاو ئا قەراریە جە ٣٠ی تەموزوو ٢٠٢٤ینە گرڎوو ۋەننگەکا دلۍ کەمپەکا وزیێرە و جارێوەتەر مەکریاوە. پۊکاتی ئیتر زاوڵۍ ئێزیدیۍ مەتاوا دلۍ کەمپەکانە بوۋانا. بەڵام مافوو ئانەیشا هەن جە وەختوو گێڵایۊیشانە پەی شەنگالی بەردەوامۍ با جە ۋەنای. وەزارەتوو پەروەردەو پانیشتوو کوردسانی پەی بەتاڵکەردەیۆ ئی قەراریە سەردای دادگاو فیدراڵی عێراقیش کەرد. بەڵام دادگا ئی داواکارییەشە ڕەڎکەردۆ  جەختش سەروو قەرارەکەیش کەردۆ.

پەدەکە ئیدارەو شەنگالیش دیل کەردەبۍ

هامسەرۆکوو ئەنجوومەنوو خۆسەری دیموکراتیکی شەنگالی (مەخەدەشە) نایف شەمۆ پەیوەس پی پێشئامایاوە قسۍ و زانیاریۍ تازێش وستۍ ڕووە ئاماژەش پانەی کەرد ئیدارەی وەڵینوو شەنگالی چێروو هەیمەنەو پەدەکەینە بۍ و واتش: "پەدەکە دەسش سەروو کەش و شەنگالیرە گرتەبۍ و هامشێوەو سوڵتێوە دەسەڵاتداری مامەڵە چنی فرەو چێوا کەرۍ. بە ویسوو ۋێش جە چنڎین لێوە ئیدارەو ۋێش پەیڕەو کەرۍ. جە ٣٠٠٣ێوە هەتا ٢٠١٤ پەدەکە هیچ خزمەتێوەش بە شەنگالی نەکەرد. جە ٢٠١٤ تا ئیساتۍ ئیدارەو ناوەندی شەنگالی و شارۆچکڵەکێش بەشێوێوە ڕسمی وابەستێنۍ بە حکومەتوو هەرێموو کوردسانیوە."

'ئیدارەی تازە بەپاو ویستەکا گەلی پێکمۍ'

نایف شەمۆ ئانەش دیاریکەرد نەگەلوو شەنگالی و نە ڕاوەبەری خۆسەری گێڵایۆ ئیدارەی کۆنوو پەدەکەی قبوڵ مەکەرا و پی جۊرە بەردەوام بۍ جە قسەکاش: "ئیدارەی تازەو شەنگالی بە پاو یاساکا ئەنجوومەنوو موسڵی پێکئامان. ئەنجوومەنوو موسڵی مافوو ئانەیش هەن ئیدارەی تازە ئەرەمەرزنۆ. بەڵام پێویسا بە پاو ویستەکا خەڵکوو هەرێمەکەی بۆ. ڕاوەبەری خۆسەر بەپاو ویستەکا گەلی جمۊوە."

نایف شەمۆ دەربارەو مژاروو گێڵایۆ کۆچبەرا ئێزیدی جە کەمپەکا پانیشتوو کوردسانینە ئاماژەش پانەی کەرد وەزارەتوو کۆچ و کۆچبەرا قەرارش دان هەتا ٣٠ تەمووزی بەرەو کەمپوو کۆچبەرا وزیۆرە و واتش: "بەڵام داخەم مەشۆ کەسێوە پېسە ڤیان دەخیلۍ ڕا جە کۆچبەرا مگێرۆ و پنەشا ماچۆ کە نەگێڵاوە پەی شەنگالی. ڤیان دەخیلە کە بەنامۍ خەڵکوو شەنگالیوە قسۍ مکەرۆ و هەر بەنامۍ شەنگالیوە پەی پەرلەمانوو عێراقی هۊرچنیێنە و خیانەت جە خەڵکوو ۋێش مکەرۆ. موینمۍ ڕاگیری مکەرۆ و نمازۆ گەلەکەما گێڵۊوە پەی ماواو ۋێشا."

'ۋەننگۍ دلۍ کامپەکا وزیارە'

نایف شەمۆ دەربارەو گێڵایۆ کۆچبەرا، سەرەنجش وست سەروو ئا قەرارە گرنگەی پەیوەس بە گێڵایۆ کۆچبەرا و ئی زانیارییەشە باسکەرد: "دادگاو فیدراڵی عێراقی سەبارەڎ بە گێڵایۆ کۆچبەرا قەرارێوە تازەش دان کە پێویسا گەلوو ئێمە بزانۊش. جارێوەتەر ۋەننگەکۍ جە کامپەکانە مەکریاوە. شەڵای گەلەکەما جە کەمپەکانە ئینەشا زانابیۍ و بە دڵێوە ئاسوڎۆ گێڵاوە سەروو ماواو ۋێشا. پېوەرە شەنگالی ئاوەڎان بکەرمێوە."