ناوەنڎوو چاپی و وەڵاکریایۆکا بەرهەم و ئەندێشەکاو عەبدوڵا ئۆجالانی کە ماوېوەن سەرحاڵوو ئاماڎەکەردەی بەرهەمەکا ڕابەروو گەلوو کوردی عەبدوڵا ئۆجالانین بەشێوەی فایلی دەنگی، ئیجارە کتێبو "جە دەوڵەتو کاهێنی سۆمەریوە بەرەو شارستانیەتی دیموکراتیکی" جە جەمەو پارێزنامەکاو ڕابەروو گەلوو کوردی عەبدوڵا ئۆجالانی بە شێوەی دەنگی وەڵا کەردۆ.

ناوەنڎوو تۆماری و وەڵاکریایۊکا بەرهەمە دەنگیەکا جە پێوەندی چنی کتێبی دەنگی "جە دەوڵەتو کاهێنی سۆمەریوە بەرەو شارستانیەتی دیموکراتیکی" ئی ڕۊشنکەردەیۆشە دېنۍ:

کتێبو دەنگی "جە دەوڵەتو کاهێنی سۆمەریوە بەرەو شارستانیەتی دیموکراتیکی" جە جەمەو پارێزنامەکا ڕابەروو گەلوو کوردی عەبدوڵا ئۆجالانی وەڵاکریاوە. ئی کتێبە دووە بەرگەو ئیساتۍ دەقوو ۋەرگریەکا"رابەر ئاپۆ"ین کە پێشکەشوو دادگاو مافوو مرۆڤوو ئەوروپای (لاهە)یش کەردەن.

ئی کتێبە دەنگییە دەقێوی تەماموو وەرگێریی ڕابەروو گەلوو کوردی عەبدوڵا ئۆجالانییا، کە زیاتەر چانەیە داواکاریێوی شەخسی و یاسایی بۆ، مانیفێستێوا پەی وەرگێریکەردەی جە مافە تارێخییەکاو گەلوو کوردی، کە سەروو بنەماو شیکاریێوی تارێخیی جە شارستانیەتوو کۆنوو وەرکەوتوو  دلێڕاسەینە نویسیان، چی وەرگێرییەنە ڕابەر ئاپۆ پەرسەو کوردی جە لایەنی جۆراوجۆری تارێخیی، سیاسی، کۆمەڵایەتی و کولتوورییوە موزۆنێ وەروو باسی و داکۆکی وەنەو مافە ڕەواکاش مکەرۆ.

بەرگی یوەموو ئی کتێبەیە چند پەرسێوی تارێخیێ مگێرۆنە وێ. بەشوو یوەمینە دەوروو شارستانیەتوو سۆمەری جە ئەوەڵوو شارستانیەتوو ئینسانیوە و دمایی شارستانیەتەکاو میسری و دەرەو سندی، پەنجاب، چین، هیتی، هوری، میتانی، ئورارتوس، ماد و کریت و... مگێرۆنە وێ، واوەی سەرەوردای ئایینە یەکتاپەرسەکا و دینەکاو پێسەو زەردەشتی، بودا، کۆنفۆسیۆس و ئاخرۆ شارستانیەتوو یۆنانی، شارستانیەتوو کۆیلایەتیی ڕۆم، دەوڵەتوو مێدیای و فارسی، کە گردشا لاو ئادیوە سەردەموو کۆیلایەتینە بیێنێ، گفتوگۆشا سەرۆ کریان. واوەی باس جە خەتەکاو کاریگەری و یاگێ کوردی جە ڕەوتوو شارستانیەتەکاو ئی سەردەمەینە کریان. بەشوو دووەمی تەرخان کریان پەی ئەوەکۆڵیای جە سەردەموو شارستانیەتوو فیۆداڵی سەردەموو دماو ئیسلامینە و بەشوو یەرێچ باس جە "سەردەموو شارستانیەتوو سەرمایەداری" مکەرۆ. بەشوو چوارەمینە باس جە وەخت و یاگێ شوناسی ئایدیۆلۆژی و وەڵێکەوتەی شارستانیەتی تازەی مکریۆ.  بەشوو پێنجەمینە ڕۆشنش مکەرۆەوە کە میراتی کولتووریی وەرکەوتوو دلێڕاسەی، کۆکەردەیوە شارستانیەتی تازەیا.

بەرگی دووەموو کتێبەکەی بەشوو ششەمی تا نۆیەمیگێرۆ وێ و تایبەتا بە باسکەردەی بابەت و دیاردەو "کورد"ی. بەشوو ششەمینە، بارودۆخ و تارێخوو کوردی پی دلێناوە باس مکریۆ: پێناسەو بڕێ زاراوە بنەڕەتییا پێسەو (خێڵ، نەتەوە، دەوڵەت-نەتەوە، هاموەڵاتیبییەی و نەتەوەیی، یاسایی و گلێرگەی مەدەنی، ولاتپارێزنی و ئینتەرناسیۆنالیزم)ی مکەرۆ و بڕێ بوارێ پێوەس بە دیاردەو کوردی و کێشەکاو چارەسەری؛ بشۆنەو چارەسەریرە پەی تارێخوو کوردی سەردەموو سەرمایەداریینە؛ جمیەری نەتەوەیی دیموکراتیک، ڕاو چارەسەروو کێشەو کوردی؛ سەردەموو میرنشینە فیۆداڵییەکا و پاشایەتی؛ قۆناغوو ناسیۆنالیزمی و ئەرەپڕائ و سەرکوتکەردەی؛ قۆناغوو چارەسەری دیموکراتیکی ڕاکارێ و ورسەنگنایەکاش موزۆنە ڕووە. بەشوو حەوتەمینە ڕابەروو گەلوو کوردی عەبدوڵا ئۆجالان باسوو  پیلانگێڵنیی میاننەتەویی دژوو کوردی مکەرۆ، بەتایبەتی دژوو پارتوو کرێکاراو کوردستانی (پەکەکە)ی. هەرپاسە بەشوو هەشتەمینە باسوو دەور و سروشتوو سیستمی یاسایی ئەورووپای و وێستەیوە چارەسەری پەی کێشەو کوردی مکەرۆ. هەرپاسە بابەتەکاو ئاخری پێوەسێنێ بە چارەسەری و ڕاکارەکاو ئاشتی و ئازادییوە."

"جە دەوڵەتوو کاهێنی سۆمەریوە پەی شارستانیەتی دیموکراتیکی"

متاودێ پەی وەزنایرە  فایلە دەنگییەکا سەرێ کەناڵوو تێلگراموو  Ocalanketakb  ورش گێردێ.