لەقوو ڕحاو کۆمەڵەو مافشناسا پەی ئازادی (ئۆهەدە) بۆ تیشکوستەی سەروو گۆشەگیریی ڕابەروو گەلوو کوردی عەبدوڵا ئۆجالانی بە ناموونیشانوو "دیای پەی  گۆشەگیری جە گۆشەنیگای ئازادیوازانەوە" پانێڵێوی ڕێکە وستە، پەرلەمانتاروو پارتوو یەکسانی و دیموکراسیی گەلا (دەم پارتی) عومەر ئۆجالان و ئەنداموو نویسگەو یاسایی سەدەی ئۆزگور ئەرۆل قسێشا کەردێ.

قسەکەروو کۆمیسیۆنوو ژەناو لەقو ڕحاو ئۆهەدەی مزگین کورتئۆغلووە پێسەو ڕاوەبەرەو پانێڵی قسەکێش دەس پنە کەردێ و تیشکەش وستە سەروو گۆشەگیریی ڕەهاو سەروو ڕابەروو گەلوو کوردی عەبدوڵا ئۆجالانی.

ئۆزگور ئەرۆڵ بارەو ئیمراڵییوە واتش: "یوەمین یاگێنە ئاستی میاننەتەوەیینە، کە ستاتۆکەش ئا  و یاسێ کە  جە ڕاشۆ ملۆ ڕاوە نەزانییان".

واتش گرد چێوێ ئیمراڵیینە جە ڕابەروو گەلوو کوردی عەبدوڵا ئۆجالانی قەدەغە کریان، حەرچێوێ ملۆ دلێوە یا بێ بەرۆ کۆنتڕۆڵ مکریۆ، دیداروو بنەیانەی و پارێزنەرا ماوێوی درێژا مدرنییان.

ئەرۆڵ واتش وەختێو ڕابەروو گەلوو کوردی عەبدوڵا ئۆجالان و هامڕێکیش مەیا بەرۆ بە بەهانێ ئانەیوە  کە "چی دلێ وێتانە قسێ مکەردێ" سزاو دیسپلینی ملشارە مسەپیۆ، واتش: "پەرسە بنەڕەتییەکێ قووڵکەردەیوەی گۆشەگیری نییا، قووڵکەردەیۆ گۆشەگیری نیشاندەروو ئانەیەنە، کە ئۆجالان چندێو مدرامان مکەرۆ".

ئەرۆڵ جەختش کەردۆ جە  گرنگیی ئازادیی ڕابەرو گەلوو کوردی عەبدوڵا ئۆجالانی پەی چارەسەروو دیموکراسییانەو پەرسەو کوردی، ئاماژەش دا هەوڵەکاو ماندێلای پەی گەلاو پانیشتوو ئەفریقای و پارادایموو نەتەوەی دیموکراتیکوو ڕابەروو گەلوو کوردی عەبدوڵا ئۆجالانی یۆی مسانێ، ئەوەخوایش کەردۆ وینایەکاو ڕابەروو گەلوو کوردی عەبدوڵا ئۆجالانی خەتەو ژیواینێ دژوو قۆرتەکاو وەرکەوتوو دلێڕاسەی.

عومەر ئۆجالان ئاماژە کەرد، بە بێدەنگی هێزە بەنام دیموکراتیکەکا جە پەرسەو گۆشەگیریینە، هەرپاسە دەوروو هێزە هەژموونوازەکاش یاد وستۆ جە پیلانگێلنیی میاننەتەوەیینە، ئەوەخوایش کەردۆ ئانە ئیمراڵیینە ڕووە مدۆ دژوو یاسا دلێی و میاننەتەوەییەکانە، واتش پەی ورگێرتەی گۆشەگیری مدرامانێوی گەورە  زیندانەکانە سەرەش وردان.

عومەر ئۆجالان واتش گرد لاێو مزاندێ موخاتەبوو پەرسەو کوردی ڕابەروو گەلوو کوردی عەبدوڵا ئۆجالانا، واتش: "باسوو ئاسایبییەیوە مکریۆ، ئەگەر ئاسایبییەیوە وەش بۆ، پێویسا بەڕێز ئۆجالان  قسێ بکەرۆ. تا ئینە نێ دی نمەتاوانێ شکسی ئابووری بمدرنا. بە فیکروو بەڕێز ئۆجالانی هەلومەرجوو ژیوای ئازادیی گرد لاێوە فەراهەم مبۆمە ".

پانێڵەکە بە پەرس و جواب دماییش ئاما.