زینڎانەکاو دەوڵەتوو تورکینە پاشێلکارییەکۍ مافەکاو مرۆڤی ئینۍ زیاڎبیەینە، فشار و کردەوە هەڕەمەکیەکۍ دژوو زینڎانیا ڕۆ دماو ڕۊی زیاتەرۍ با. پارێزنەر زەکی بین بیر ئانەش وست ڕووە کە جە ئیساتێنە نزیکەو ٤٠٠ زینڎانیا بەشێوێوە بێ بنەما و هەڕەمەکی ڕا جە ئازاڎبیەیشا مگیریۆ.

هامواتەواچوو کۆمسیۆنوو زینڎانیا جەمەو مافناسا ئازاڎیی (ئۆهەدە)ی زەکی بینبیر قسێش پەی ئاژانسوو هەواڵوو فوراتی کەردۍ و واتش: "سەروو دەسوو دەسەڵاتی دادوەرینە ئاستەنگ پەی زینڎانیا وەش مکریۆ. ئا ڕاگیریە جە ڕاو 'دەسەو چەمڎاری کارگێڕی'وە کە ساڵەو ٢٠٢٠ وەشکریان، جابەجێ مکریۆ. وەڵۍ گرڎ چێوێنە مشۊم ئینسان گفتوگۆ سەروو یاساو جابەجێکەردەو سزۍ بکەرۆ. تا ئیساتۍ ٣٢ جارۍ یاساو جابەجێکەردەی سزۍ هەموار کریانۆ، بەڵام نەبیەن بە مایلوو چەسپنای ئارامی. جە ڕاو ئا فاڕیایۆ کە جە ئاداروو ٢٠٢٠ ئەنجامدریا دەسەڵاتی فرە بە ڕاوەبەرا زینڎانەکا دریان. جە ڕاو ئا ۋەرفراوانی دەسەڵاتیۆ کە دریانشا پنە، ئا زینڎانیۍ کە ماوەو سزاکێشا تەمامیان بەشێوەی بێ بنەما و هەڕەمەکی ئازاڎۍ مەکریا. پېسە کۆمەڵەکەیما سەبارەت پانەی ئێمە ئەرەکۊشیەیمۍ. جە ئیساتێنە نزیکەو ٤٠٠ زینڎانیا کە مشۊم ئازاڎۍ بکریا، بە بەهانۍ هەڕەمەکی و بێ بنەمای ڕا جە ئازاڎبیەیشا مگیریۆ ".

قەرارەکە پێچەوانەو دەستوری هەمیشەییا

بینبیر ئانەش وست ڕووە کە 'پەشیمانی' سەروو زینڎانیارە سەپیۊنە و واتش، "چا ڕووانگۆ ڕاوەبەرایەتی زینڎانی فشارێوە قورس وزۊنە سەروو زینڎانیا. بەتایبەتی ۋەرا ۋەر پا زینڎانیا کە ٣٠ ساڵێن زینڎانی کریێنۍ. ئینەیچ بە ڕۊشنی جە دەستور و یاساو تورکیاینە بیەیش نییا، پېسە مژاروو تۆمەتبارکەردەی ئازاڎکەردەی زینڎانیا دما وزیۆ. ئینەی دژوو دەستوری هەمیشەییا. ئا ئاژە داخەم مەشۆ کاریگەری مکەرۆ سەروو بنەیانەو زینڎانیایچ. ڕووێوە وەڵۍ ئازاڎبیەیشانە، یاخود جە ڕۊو ئازاڎبیەیشانە بە قەراروو دەسەو چەمڎاری کارگێڕی ئازاڎکەردەکەیشا پەی شش مانگا یاخود یەرۍ مانگا دماوزیۆ".

یەکسانی جە جابەجێکەردەی یاساکانە پەیڕەو مەکریۆ

بینبیر باسش چانەیچ کەرد، کە زینڎانیا سیاسی بە تایبەتی زینڎانیا سیاسی کوردی رووبەڕوو جیاکاری باوە و دماو ٣٠ ساڵا مەنەیۆی جە زینڎانەنە ئازاڎۍ مەکریا. ئینەیچ مامەڵێوە سیاسیا، "داخەم مەشۆ یاسا بە شێوێوە یەکسان جابەجێ مەکریۆ".

پاشێلکارییەکۍ ئینۍ زیاڎبیەینە

هامواتەواچوو کۆمسیۆنوو زینڎانیا جەمەو مافناسا ئازاڎیی (ئۆهەدە)ی زەکی بینبیر باسش چانەی کەرد، کە پېسە کۆمەڵەکەیشا سەبارەت پا زینڎانیا کە ڕاگیری جە ئازاڎکەردەیشا مکریۆ پلانێوە ۋەرفراوانەشا دەسپنەکەردێنە و واتش، "چەمڎاری ئا مژاریە مکەرمۍ، بە پاو ئا بەڵگەنامە و قەرارا بە دەسما میاوا، پرۆسېوە یاسایی و تانەدای دەسپنەکەرمۍ. ئیساتۍ جە تورکیانە زینڎانیا سیاسی گرڎشا کریێنۍ ئامانجوو پاشێلکەردەی مافەکاشا. بەتایبەتی مافوو ژیۋای و تەندروسی پاشێل مکریۆ. زینڎانیۍ پەی ژیۋایشا ۋێڕاگری مکەرا، بەتایبەتی ئا قۊرتۍ کە تا مۍ جە زینڎانەکانە زیاتەرۍ با".