دەسەو ڕاوەبەریی پاژک، بە بۊنەو ٢٥و تشرینو دووەمیوە ڕۊو وەرگێریکەرڎەی جە تنڎوتیژیی دژوو ژەنا، ئەرەیاوناێوەش وەڵا کەرڎۊ و ماچۊ: "٢٥و تشرینوو دووەمی، ڕۊو مدرامانی و کۊشیای گردوو ژەنان. پێویسا گردما پێوە وێما ڕێک وزمێ".
دەسەو ڕاوەبەریی پارتی ئازاڎو ژەناو کوردستانی (پاژک) واتش، ڕابەروو گەلوو کوردی عەبدوڵڵا ئۊجالان کۊشیای ژەنێش پێسە "خەباتی داستان‌ئامێزوو وێش" نرخنۊ و ئەرەیاونۊش: "ئی خەباتە داستانئامێزە وەروو ڕۊشنایی ئایدۊلۊژیا و فەلسەفەو ڕابەرێتینە وەڵۍ کەوت. پێسە ژەنا، ئێمە سەروو بناغەو بەسوپابییەی و حزبیبییەی ژەنۍ، هێزوو ڕێکوستەی وێما بونیاد نیا".
ئەرەیاوناکەی واتەن:
"ژەنی ژیوای ئازاڎی، ڕاسیی مدرامانوو ژەنێش گردوو جیهانی و بەتایبەت وەورکەوتنە بەر وست، بە گرد لێوەش نیشانە دا، حیچ هێزێوە دەسەڵاتدار نمەتاوۊ ڕا جە ئازاڎی و مدرامانوو ژەنۍ گێرۊ. ئێمە وەڵیوستەی کۊشیای ژەنا پێسە هەرمانێوە ورگێرمۍ. کۊنفرانس و پەروەرڎە و ڕاپیمای و چالاکی و مەراسیمی نۊعاونۊع چەنی جمیەرە جیاوازەکاو ژەنا پەرەش پەنە مدریۊ. ئی پراکتیک و ڕێکوستەیۍ ڕاو شۊڕشوو ژەنا کەراوە، کە بە ویرۊکەو ڕزگاریی ژەنا وزیان وەڵۍ. هەرمانەی سەرەکییەمانە ئینەیە گەورەتەر کەرمۍ و فاشیزم و سیستموو تاتەسالاری ماڕمۍ. کۊشای و مدرامانوو ژەنا، جە ئەنجاموو گەشمەرڎەبییەی و قوربانیدایۊ ئاندەی تەر کەوتەن وەروو چەما. ئینەیچە قۊناغێوە گرنگا پەی وەڵێوستەی زیاتەروو مدرامانوو ژەنا. خاڵەی سەرەکییە پەی یاونای کۊشیای ژەنا بە سەرکەوتەی، ڕێکوستەی و پارێزنای جەوهەری و پەشتیوانیی ژەنان.
٢٥و تشرینو دووەمی، ڕۊو مدرامانین، دژوو تنڎوتیژی و فشاری و ستەمی و دەسدرێژی، ڕۊو مدرامانی و کۊشیای گردوو ژەنان. پێویسا گردما پێوە وێما ڕێک وزمۍ، ئی ڕۊیە کەرمۍ بە ڕۊو کۊشیای و ڕێکوزیای دژوو تنڎوتیژی".
