پەدەکە بە هامکاری دۆڵەتو تورکی پلانێوە ساختەکاری جە هۆرچنیەینە جابەجێ مکەرۆ و چی چوارچێوەیچەنە ١٥٠٠ جەردەوانێش جە ناوچەو جۆلەمێرگو سەرنیشتوو کوردەسانیوە ئاردێنۍ پانیشتوو کوردەسانی و کارتو دەنگدایش پەی بەرئاردێنۍ.
قەرارا ٢٠/١٠/٢٠٢٤ هۆرچنیەو پەرلەمانو هەرێمو پانیشتوو کوردەسانی بلۆڕاوە و سەرەڕاو ئانەی بەشێوە فرەو بەرەکا ساختەکاری جە پەدەکەی وزیێنێرە، بەڵام بە هامکاری دۆڵەتو تورکی هەوڵ مڎۆ گرڎو کەلێن و دەرچەکا ساختەکاری قۆزۆوە و باری لارو ۋێش چی هۆرچنیەنە کەمێ راس بکەرۆوە.
چی چوارچێوەنە بە پاو زانیارییەکا ئاژانسوو رۆژنیوزی دۆڵەتو تورکی ئەرەگیری پەی ڕزگارکەردەی پەدەکەی چا ئاژەی کۆتەنشەنە زیاتەر جە ١٥٠٠ هامولاتیاش جە هەرێمو جۆلەمێرگی کە ناوچەکا گەڤەری و شەمزینانی گێرۆوە ئاردێنۍ پانیشتوو کوردەسانی پەی ئانەی دەنگ بڎا بە پەدەکەی.
بەقسۍ یۆ چا کەسا کە تورکیا و پەدەکە ئاردەنشا پەی پانیشتی پەی ئەنەی بەشداری دەنگدای بکەرا و باری لارو پەدەکەی ڕاس بکەراوە، جە لایەنو ۋەرپەرسا پەدەکەیۆ کارتو دەنگدایشا پەی وەشکریان و تەمامو کارئاسانیشا پەی کریان تا جە ڕۆو دەنگداینە جە مەسڵەحەتوو پەدەکەینە دەنگ بڎا.
هەر بە پاو ئا سەرچەمەیە کە ۋێش یۆن چا کەسا کارتو دەنگدایش پەی وەشکریان و ئاردەنشا پەی پانیشتوو کوردەسانی، تەمامو ئا هاموڵاتیا سەرنیشتوو کوردەسانی کە پەدەکە گەرەکشا ئیسفاڎە جە دەنگەکاشا هۆرگێرۆ جە عەشیرەتەکا دۆسکی و گەردینۍ کە جە ناوچەکا گەڤەری و شەمزینانینە ئەرەنیشتێنۍ و لایەنگرۍ پەدەکەینۍ و خزمەتو دۆڵەتو ئەرەگیرو تورکی و دژ بە گەلوو ۋێشا چا ناوچانە کارمکەرا.
هەر بە پاو زانیارییەکا جە لایەنو پەدەکەیۆ پەی هەر یۆ چا دەنگدەرا میقدارۍ فرە زەڕ تەرخانکریان، هامکات هەر بەپاو زانیارییەکا بەشێوە فرەو ئانیشاپەدەکە ئاردێنێش ناوچەکا دهۆکی و بادینانی چەتۍ و جەردەوانێنۍ.
