ناڕەزایەتییەکێ دژوو نیایرەی قەیومی شارەوانیی جولەمێرگینە بەردەواما، ناڕەزایەتییەکەنە درووشموو "بە مدرامان سەرێگنمێ" و "ئێمە شارەوانیی دزما گەرەک نیا" و "بژیوۆ مدرامانوو هەکاری" بەرز کریاوە.

هامسەرۆکوو دەبەپەی، کەسکین بایندەر واتش نیایرەی قەیومی قبووڵ نمەکەرا، واتش: "ئی سیستمەیە سەیەو مدرامانوو گەلوو کوردیوە موڕیۆ. سەد ساڵێن ئیرادەو گەلوو کوردی قبووڵ نمەکریۆ، ئارۆیچ باخچەلی واتش ئیرادەو گەلوو کوردی قبووڵ نمەکەرۆ. با تارێخوو کوردا، باخچەلی و ئەردۆگان بلانێ، بەڵام گەلوو کوردی سەدان ساڵێن ئینا چێ و مەنۆوە. ئێمە بە هێزوو وێما سیستمەکەیشا موڕنمێ".

هامسەرۆکوو دەم پارتی تولای حاتەم ئۆغۆللاری واتش، ئینە کودەتای سیاسییا و ئینە بەرش موزۆ چەتە دەوڵەتی بەرۆ ڕاوە، واتش: "ئی شێوازەو ڕاوەبەردەی وەڵاتی لاو ئاکەپەیوە، نامێ فاشیزمی و کودەتاین".

حاتەم ئۆغۆللاری ئاماژەش پانەیە کەرد، مافوو دەنگدای و ورچنیەی کوردا ددانش پۆرە نمەنریۆ، واتش: "ئاکەپە ڕاو نیایرەی قەیومیوە ماچۆ "شمە مافوو دەنگدای و ورچنیەیتا نییا. هاموەڵاتێ ئی وەڵاتەیە نییەنێ".

ئۆغۆللاری واتش: "دیموکراسی و گەل و یاسا و ئازادی سەرێمگنا، ئێمە سەرێمگنمێ، نیایرەی قەیومی  جولەمێرگنە تەنیا نیایرەی قەیومی نییا دژوو ئیرادەی سیاسیی کوردین. بەڵکو ماناو نیایرەی قەیومین دژوو دیموکراسی تورکیانە و یاساو ڕاوەبەردەی هەرێمی. دژوو زیهنیەتوو قەیومی، پێویسا گردوو هێزە دیموکراسییەکا هەڵوێستی قەوەت نیشانە بدانێ".

ئۆغۆللاری ئەوەخوایش کەردۆ ئی هەوڵە پەی زەوتکەردەی ئیرادەو گەلوو کوردی قبووڵ نمەکریۆ و مدرامان مکەرا، واتش: "گەل بە شێوێوی قەوەت جواب مدۆوە. ئانێ دژوو فاشیزمی مدرامان مکەرا، سەرێمگنا".